ତେହେରାନ,୧୫।୧: ଇରାନରେ ଚାଲିଥିବା ହିଂସାତ୍ମକ ପ୍ରତିବାଦ ଏବଂ ପ୍ରତିବାଦକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଖୋଲା ଧମକ ସତ୍ତ୍ୱେ ତେହେରାନ ଚୁପ୍ ବସିନି। ଇରାନ ସ୍ପଷ୍ଟ ଭାବରେ ଚେତାବନୀ ଦେଇଛି ଯେ, ଯଦି ଆମେରିକା ସାମରିକ ଆକ୍ରମଣ କରେ, ତେବେ ଏହା ପଡ଼ୋଶୀ ଦେଶଗୁଡ଼ିକରେ ଥିବା ଆମେରିକୀୟ ସାମରିକ ଘାଟିଗୁଡ଼ିକୁ ଟାର୍ଗେଟ କରିବ ଯେଉଁଠାରେ ଆମେରିକୀୟ ସୈନ୍ୟବାହିନୀ ଉପସ୍ଥିତ ଅଛନ୍ତି। ଏହି ଚେତାବନୀ ପରେ ଆମେରିକା ଏବଂ ୟୁକେ ସତର୍କତା ସ୍ବରୂପ କତାରର ଅଲ ଉଦେଦ ଏୟାର ବେସରୁ ସେମାନଙ୍କର କିଛି ସାମରିକ ଏବଂ ବେସାମରିକ କର୍ମଚାରୀଙ୍କୁ ପ୍ରତ୍ୟାହାର କରିନେଇଛି, ଯାହା ଏହି ଅଞ୍ଚଳରେ ଯୁଦ୍ଧର ଆଶଙ୍କାକୁ ଆହୁରି ବୃଦ୍ଧି କରୁଛି।
ପାଶ୍ଚାତ୍ୟ ସାମରିକ କ୍ଷମତା ସହିତ ପରିଚିତ ବିଶେଷଜ୍ଞମାନେ କହିଛନ୍ତି ଯେ, ସାମ୍ପ୍ରତିକ ଘଟଣାକ୍ରମ ଇରାନ ଉପରେ ଆମେରିକାର ସମ୍ଭାବ୍ୟ ଆକ୍ରମଣକୁ ସୂଚିତ କରୁଛି। ଏହି ଭୟ ଯୋଗୁ ଭାରତ, ପୋଲାଣ୍ଡ ଏବଂ ଇଟାଲୀ ସମେତ ଅନେକ ଦେଶ ସେମାନଙ୍କର ନାଗରିକମାନଙ୍କୁ ଇରାନ ଛାଡିବା ପାଇଁ ପରାମର୍ଶ ଜାରି କରିଛନ୍ତି। ଇରାନୀ ଅଧିକାରୀଙ୍କ ଅନୁସାରେ, ଏପର୍ଯ୍ୟନ୍ତ ପ୍ରାୟ ୩,୦୦୦ ଲୋକଙ୍କ ମୃତ୍ୟୁ ହୋଇଛି। ମାନବାଧିକାର ସଂଗଠନଗୁଡ଼ିକ ଦାବି କରିଛନ୍ତି ଯେ, ମୃତ୍ୟୁ ସଂଖ୍ୟା ପ୍ରାୟ ୨,୬୦୦।
ଡୋନାଲ୍ଡ ଟ୍ରମ୍ପ ଗତ କିଛି ଦିନ ଧରି ଇରାନରେ ହସ୍ତକ୍ଷେପ କରିବାକୁ ଖୋଲାଖୋଲି ଧମକ ଦେଇ ଆସୁଛନ୍ତି। ସେ ଇରାନୀମାନଙ୍କୁ ସେମାନଙ୍କର ପ୍ରତିବାଦ ଜାରି ରଖିବାକୁ ଏବଂ ସରକାରୀ ପ୍ରତିଷ୍ଠାନଗୁଡ଼ିକୁ କବଜା କରିବାକୁ ଅନୁରୋଧ କରିଥିଲେ। ଟ୍ରମ୍ପ ଇରାନୀ ଅଧିକାରୀଙ୍କ ସହ ସମସ୍ତ ବୈଠକ ବାତିଲ କରିଛନ୍ତି ଏବଂ ଚେତାବନୀ ଦେଇଛନ୍ତି, ଯଦି ଇରାନ ପ୍ରତିବାଦକାରୀଙ୍କ ବିରୋଧରେ ରକ୍ତାକ୍ତ କାର୍ଯ୍ୟାନୁଷ୍ଠାନ ବନ୍ଦ ନ କରେ, ତେବେ ଅତିରିକ୍ତ ଶୁଳ୍କ ଏବଂ କଟକଣା ଲାଗୁ କରାଯିବ।
କିଛି ୟୁରୋପୀୟ ଏବଂ ଇସ୍ରାଏଲୀ ଅଧିକାରୀ ଦାବି କରିଛନ୍ତି ଯେ, ଆମେରିକା ଆଗାମୀ ୨୪ ଘଣ୍ଟା ମଧ୍ୟରେ ସାମରିକ କାର୍ଯ୍ୟାନୁଷ୍ଠାନ ନେଇପାରେ। ଆମେରିକା ଏବଂ ୟୁକେ କାତାରର ବାୟୁସେନା ଘାଟିରୁ ସେମାନଙ୍କର କର୍ମଚାରୀମାନଙ୍କୁ ପ୍ରତ୍ୟାହାର କରିବା ଆରମ୍ଭ କରିଛନ୍ତି। କାତାର ସରକାର କହିଛନ୍ତି ଯେ, ଆଞ୍ଚଳିକ ଉତ୍ତେଜନାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ପେଣ୍ଟାଗନ କହିଛି ଯେ, ଯଦି ଆମେରିକା ଇରାନ ଉପରେ ସାମରିକ ଆକ୍ରମଣ ଆରମ୍ଭ କରେ, ତେବେ ଏହା ସୀମିତ ପରିମାଣରେ ହେବ ଏବଂ ଏହା ସାମ୍ପ୍ରତିକ ମାସ ମଧ୍ୟରେ ଇରାନ ଉପରେ ଦ୍ୱିତୀୟ ଏପରି ଆକ୍ରମଣ ହେବ। ବର୍ତ୍ତମାନ ୟୁଏସଏସ ଜେରାଲ୍ଡ ଆର. ଫୋର୍ଡ ବିମାନ ବାହକ, ଅନେକ ଏସ୍କର୍ଟ ଯୁଦ୍ଧଜାହାଜ ଏବଂ ତିନୋଟି କ୍ଷେପଣାସ୍ତ୍ର-ନିକ୍ଷେପକାରୀ ବିଧ୍ୱଂସକ ଏହି ଅଞ୍ଚଳରେ ପୂର୍ବରୁ ନିୟୋଜିତ ଅଛନ୍ତି।
Dharitri – Odisha’s No.1 Odia Daily
