ଓ୍ବାଶିଂଟନ୍,୨୨।୧: ସାରା ବିଶ୍ୱରେ ଖୁସି ଦେଶର ତାଲିକାରେ ନରୱେ ଏବଂ ଡେନମାର୍କ ତାଲିକାର ଶୀର୍ଷରେ ଥାଆନ୍ତି। ବର୍ତ୍ତମାନ ଉଭୟ ଦେଶ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଯୋଗୁ ଚାପରେ ଅଛନ୍ତି। ଗ୍ରୀନଲାଣ୍ଡର ଅସ୍ତିତ୍ୱ ଯୋଗୁ ଡେନମାର୍କ ନିଜର ସାର୍ବଭୌମତ୍ୱ ହରାଇବାକୁ ଭୟ କରୁଛି। ରୁଷିଆ ସୀମାନ୍ତରେ ଥିବା ନରୱେ ଟ୍ରମ୍ପଙ୍କ ନାଲିଆଖି ଯୋଗୁ ବିଶ୍ୱଯୁଦ୍ଧର ବିପଦ ବଢ଼ିବାର ଆଶଙ୍କା କରୁଛି।
ନରୱେ ଏହାର ନାଗରିକମାନଙ୍କୁ ଯୁଦ୍ଧ ପାଇଁ ପ୍ରସ୍ତୁତ ରହିବାକୁ ଚେତାବନୀ ଦେଇଛି। ଏହା ୧୩,୦୦୦ ନାଗରିକଙ୍କୁ ଚିଠି ମଧ୍ୟ ପଠାଇଛି, ସେମାନଙ୍କୁ ଚେତାବନୀ ଦେଇଛି ଯେ, ଯୁଦ୍ଧ ହେଲେ ସେମାନଙ୍କ ଘର ଛଡ଼ାଇ ନିଆଯାଇପାରେ।
ଡୋନାଲ୍ଡ ଟ୍ରମ୍ପ ଗ୍ରୀନଲାଣ୍ଡ ଦାବି କରିଛନ୍ତି। ଡାଭୋସ ବୈଠକରେ ଟ୍ରମ୍ପ କହିଥିଲେ, ଯଦି ମୁଁ ଗ୍ରୀନଲାଣ୍ଡ ନ ପାଏ, ତେବେ ମୁଁ ଏହା ମନେ ରଖିବି। ଗ୍ରୀନଲାଣ୍ଡ ବର୍ତ୍ତମାନ ଡେନମାର୍କର ଅଂଶ। ଡେନମାର୍କ ଏହାକୁ ସୁରକ୍ଷା ପାଇଁ ସୈନ୍ୟ ମୁତୟନ କରିବାକୁ ନିଷ୍ପତ୍ତି ନେଇଛି। ଏଠାରେ ଲୋକମାନେ ଉତ୍ତେଜନା ଯୋଗୁ ଶୋଇ ପାରୁନାହାଁନ୍ତି।
ଗ୍ରୀନଲାଣ୍ଡ ଆମେରିକା ପାଇଁ ବହୁତ ଗୁରୁତ୍ୱପୂର୍ଣ୍ଣ। ଏହା ରୁଷିଆ ଏବଂ ଆମେରିକା ମଧ୍ୟରେ ଅବସ୍ଥିତ। ଯଦି ହ୍ବାଇଟ ହାଉସ ଉପରେ ଏକ କ୍ଷେପଣାସ୍ତ୍ର ନିକ୍ଷେପ କରାଯାଏ, ତେବେ ଏହା ୨୬ ମିନିଟ ମଧ୍ୟରେ ଗ୍ରୀନଲାଣ୍ଡରେ ପହଞ୍ଚିପାରିବ। ଗ୍ରୀନଲାଣ୍ଡ ଏବଂ ଆମେରିକା ମଧ୍ୟରେ ଦୂରତା ମାତ୍ର ୧୫ ମିନିଟ।
ଡୋନାଲ୍ଡ ଟ୍ରମ୍ପ ଗ୍ରୀନଲ୍ୟାଣ୍ଡକୁ ଏକ ସ୍ବର୍ଣ୍ଣିମ ଗମ୍ବୁଜ ସହିତ ଆଚ୍ଛାଦିତ କରିବାକୁ ଚାହୁଁଛନ୍ତି। ରିପୋର୍ଟ ଅନୁଯାୟୀ, ଡେନମାର୍କ ଗ୍ରୀନଲାଣ୍ଡ ଉପରେ ଏକ ଚୁକ୍ତି ପାଇଁ ରାଜି ହୋଇଛି।
ନରୱେ ଆମେରିକାର, ବିଶେଷକରି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରାଡାରରେ ଆସିଛି। ସମ୍ପ୍ରତି, ଟ୍ରମ୍ପ ନରୱେ ପ୍ରଧାନମନ୍ତ୍ରୀଙ୍କୁ ଏକ ଚିଠି ଲେଖି କହିଥିଲେ, ଯେହେତୁ ସେ ଦେଶରୁ ନୋବେଲ ପୁରସ୍କାର ପାଇନାହାଁନ୍ତି, ତେଣୁ ସେ ଆଉ ଶାନ୍ତି ପଦକ୍ଷେପ ଗ୍ରହଣ କରିବେ ନାହିଁ। ଏହା ବ୍ୟତୀତ, ନରୱେ ଟ୍ରମ୍ପଙ୍କ ଗାଜା ଶାନ୍ତି ବୋର୍ଡରେ ଯୋଗ ଦେବାକୁ ମଧ୍ୟ ମନା କରିଦେଇଛି।
ନରୱେ ମଧ୍ୟ ଏହାର ନାଗରିକମାନଙ୍କୁ କହିଛି ଯେ, ଯେକୌଣସି ସମୟରେ ବିଶ୍ୱଯୁଦ୍ଧ ଆରମ୍ଭ ହୋଇପାରେ, ତେଣୁ ସମସ୍ତେ ମାନସିକ ଭାବରେ ପ୍ରସ୍ତୁତ ରହିବା ଉଚିତ।
Dharitri – Odisha’s No.1 Odia Daily
