ନୂଆଦିଲ୍ଲୀ,୨୯।୯: ପୂର୍ବତନ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂ ବୁଧବାର ସନ୍ଧ୍ୟାରେ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହଙ୍କୁ ଭେଟିଥିଲେ। ତେବେ ଏହି ବୈଠକରେ କ’ଣ ସବୁ ଆଲୋଚନା ହୋଇଥିଲା, ତାହା ଉପରେ ପ୍ରଥମ ଥର ପାଇଁ ସୂଚନା ଦେଇଛନ୍ତି କଂଗ୍ରେସର ଭେଟେରାନ ନେତା।
କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହଙ୍କୁ ଦିଲ୍ଲୀରେ ଭେଟିଥିଲି। ୩ କୃଷି ଆଇନ ବିରୋଧରେ ଦୀର୍ଘ ଦିନ ହେଲା ଚାଲିଥିବା ଚାଷୀ ଆନ୍ଦୋଳନ ଉପରେ କଥା ହୋଇଥିଲୁ। ବିବାଦୀୟ କୃଷି ଆଇନକୁ ସମ୍ପୂର୍ଣ୍ଣ ଉଚ୍ଛେଦ ଓ ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି)ର ଲିଖିତ ପ୍ରତିଶ୍ରୁତି ଦାବି କରିଛି। ଶାହଙ୍କ ବାସଭବନରେ ବୈଠକ ପରେ ଉପରୋକ୍ତ କ୍ୟାପଟେନ୍ ଓ ତାଙ୍କ ଗଣମାଧ୍ୟମ ଉପଦେଷ୍ଟା ରବୀନ ଠୁକରାଲ ଟୁଇଟ୍ କରି ସୂଚନା ଦେଇଛନ୍ତି। ଅମରିନ୍ଦର ତାଙ୍କ ଟୁଇଟରେ ‘ନୋଫାର୍ମନାଫୁଡ୍’ ହାସଟ୍ୟାଗ ମଧ୍ୟ ଯୋଡ଼ିଛନ୍ତି।
ପଞ୍ଜାବ କଂଗ୍ରେସରେ ସଙ୍କଟ ଦେଖାଦେଇଥିବା ବେଳେ କ୍ୟାପଟେନଙ୍କ ସହ ସ୍ବରାଷ୍ଟ୍ର ମନ୍ତ୍ରୀଙ୍କ ବୈଠକ ନେଇ ଅନେକ କଳ୍ପନାଜଳ୍ପନା ପ୍ରକାଶ ପାଇଥିଲା। ନିକଟରେ ପଞ୍ଜାବ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବା ଅମରିନ୍ଦର ଭାଜପାରେ ଯୋଗଦେଇ ପାରନ୍ତି ବୋଲି ବିଶେଷ ଚର୍ଚ୍ଚା ହେଉଥିଲା।
