ବଡ଼ଚଣା, ୯ା୬(ଦିଲୀପ କୁମାର ମହାନ୍ତି)ଓଡ଼ିଶାରେ ଦଳର ନିର୍ବାଚନ ପ୍ରଚାର ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଜୁନ ୧୦ ତାରିଖରେ ରାଜ୍ୟରେ ଭାଜପା ସରକାର ଶପଥ ନେବ। ଜଣେ ଓଡ଼ିଆ ପୁଅ କିମ୍ବା ଝିଅ ମୁଖ୍ୟମନ୍ତ୍ରୀ ହେବେ। ଶପଥ ଗ୍ରହଣକୁ ଦିନଟିଏ ବାକି ରହିଥିବାବେଳେ କିଏ ମୁଖ୍ୟମନ୍ତ୍ରୀ ହେବେ ସେନେଇ ସସ୍ପେନ୍ସ ଜାରି ରହିଛି। ରବିବାର ସନ୍ଧ୍ୟାରେ ମୋଦି ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ନେବାକୁ ଯାଉଛନ୍ତି। ତେଣୁ ସୋମବାର ପୂର୍ବାହ୍ନରେ ଏନେଇ ଚିତ୍ର ସ୍ପଷ୍ଟ ହେବ ବୋଲି ଆଶା କରାଯାଉଛି। ତେବେ ରାଜ୍ୟ ମନ୍ତ୍ରିମଣ୍ଡଳରେ ବଡ଼ଚଣାରୁ ନିର୍ବାଚିତ ଭାଜପା ନେତା ଅମର ନାୟକଙ୍କୁ ସ୍ଥାନ ମିଳିପାରେ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି। ନିର୍ମଳ ଭାବମୂର୍ତ୍ତି, ଆପରାଧିକ ପୃଷ୍ଠଭୂମି ନ ଥିବା, ଲୋକ ସମ୍ପର୍କ ଏବଂ ପ୍ରଶାସନିକ କାର୍ଯ୍ୟରେ ଅନୁଭୂତି ଆଦି ମାପକାଠି ଆଧାରରେ ମନ୍ତ୍ରୀପଦ ମିଳିପାରେ ବୋଲି ଆଲୋଚନା ହେଉଛି। ଅମର ୨୦୧୪ରେ ସ୍ବାଧୀନ ଏବଂ ୨୦୧୯ରେ ଭାଜପା ପ୍ରାର୍ଥୀଭାବେ ନିର୍ବାଚନ ଲଢ଼ିଥିଲେ। ୨୦୧୯ରେ ଅଳ୍ପ ଭୋଟ ବ୍ୟବଧାନରେ ହାରିଯାଇଥିଲେ। ଦଳର ଜାତୀୟ ଏବଂ ରାଜ୍ୟ ସ୍ତରୀୟ ପ୍ରମୁଖ ନେତାମାନଙ୍କ ସହ ତାଙ୍କର ସୁସମ୍ପର୍କ ଥିବାରୁ ସେ ମନ୍ତ୍ରୀପଦ ପାଇବା ସମ୍ଭାବନା ଥିବା ତାଙ୍କ ସମର୍ଥକମାନେ କହୁଛନ୍ତି। ଏପରି କି ବଡ଼ଚଣାରେ ଭାଜପା କର୍ମୀ ମହଲ ଉତ୍ସାହିତ ଥିବାବେଳେ ଛକବଜାରରେ ଏନେଇ ବେଶ୍ ଚର୍ଚ୍ଚା ହେଉଛି।
