ଭଞ୍ଜନଗର,୧୦।୨(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ, ଟାଟା ପାୱାର ଏବଂ ସ୍ନେହା ସ୍ବେଚ୍ଛାସେବୀ ଅନୁଷ୍ଠାନର ମିଳିତ ସହଯୋଗରେ ଚାଲିଥିବା ହାତୀ ସୁରକ୍ଷା ସଚେତନତା କାର୍ଯ୍ୟକ୍ରମ ଉଦଯାପିତ ହୋଇଯାଇଛି। ଏହି ବନଖଣ୍ଡର ୬୬ଟି ଗ୍ରାମରେ ଘୋଡ଼ା ନାଚ ମାଧ୍ୟମରେ ଜଙ୍ଗଲ ନିକଟବର୍ତ୍ତୀ ଗ୍ରାମବାସୀଙ୍କୁ ହାତୀ ସୁରକ୍ଷା ନେଇ ସଚେତନତା କରାଯାଇଥିଲା । ଏହାଦ୍ବାରା ଲୋକେ ସଚେତନ ହେବାସହ ତାହାର ସୁଫଳ ମିଳିଥିବା ଅନୁମାନ କରାଯାଉଛି।
ଉଦଯାପନୀ ଉତ୍ସବରେ ଡିଏଫଓ ହିମାଂଶୁ ଶେଖର ମହାନ୍ତି ମୁଖ୍ୟ ଅତିଥି ଭାବେ ଯୋଗଦେଇ ଏହିଭଳି ସଚେତନତା କାର୍ଯ୍ୟକ୍ରମକୁ ଉଚ୍ଚ ପ୍ରଶଂସା କରିଥିଲେ। ଏଥିସହ ହାତୀ ଏବଂ ମଣିଷ ଉଭୟ କିଭଳି ସୁରକ୍ଷିତ ରହିପାରିବେ ସେନେଇ କହିଥିଲେ। ଓଡ଼ିଶା ରାଜ୍ୟ ବନ୍ୟପ୍ରାଣୀ ସୁରକ୍ଷା ଅଧିନିୟମ -୧୯୭୪ ଅନୁଯାୟୀ, ନିର୍ଦ୍ଦିଷ୍ଟ ବନ୍ୟଜନ୍ତୁଙ୍କ ଦ୍ୱାରା କୌଣସି ଲୋକ ମୃତ୍ୟୁବରଣ କଲେ ସରକାରଙ୍କ ପକ୍ଷରୁ ଅନୁକମ୍ପା ସହାୟତା ରାଶି ୬ ଲକ୍ଷ ଟଙ୍କା ତାଙ୍କର ଉତ୍ତରାଧିକାରୀଙ୍କୁ ପ୍ରଦାନ କରାଯାଉଛି । ମଣିଷ ଆଘାତ (ସ୍ଥାୟୀ) କିମ୍ବା ୬୦ ପ୍ରତିଶତରୁ କମ ଅକ୍ଷମତା କ୍ଷେତ୍ରରେ ୧.୫ ଲକ୍ଷ ଟଙ୍କା ଦିଆଯାଉଛି । ୬୦ ପ୍ରତିଶତରୁ ଅଧିକ ଅକ୍ଷମତା କ୍ଷେତ୍ରରେ ୨.୫ ଲକ୍ଷ ମିଳେ। ସରକାରୀ ଡାକ୍ତରଖାନାରେ ଆହତ ହୋଇ ଚିକିତ୍ସିତ ହେଲେ ମାଗଣା ଚିକିତ୍ସା ସହ ଆର୍ଥିକ ସହାୟତା ମଧ୍ୟ ମିଳେ। ଗୃହପାଳିତ ପଶୁ ମୃତ୍ୟୁ (ବଳଦ/ଗାଈ/ମଇଁଷି)- ଗାଈ ଏବଂ ମଇଁଷି ପାଇଁ ୩୭,୫୦୦ଟଙ୍କା ବଳଦ ପାଇଁ ୩୨,୦୦୦ ଟଙ୍କା ସହାୟତା ମିଳେ। ଗୃହପାଳିତ ପଶୁ ମୃତ୍ୟୁ (ବାଛୁରୀ) ପାଇଁ ୫,୦୦୦ ଟଙ୍କା, (ମେଣ୍ଡା/ ଛେଳି) ମୃତ୍ୟୁ ପାଇଁ ୪ ହଜାର ଟଙ୍କା,ଫସଲ କ୍ଷତି (ଧାନ) ଏକର ପିଛା ୨୦ ହଜାର ଟଙ୍କା,
ଅର୍ଥକାରୀ ଫସଲ କ୍ଷତି ପାଇଁ ୨୫ ହଜାର ଟଙ୍କା, ଘରର କ୍ଷତି (ଆଂଶିକ) ୧୦ ହଜାର ଟଙ୍କା, ଘରର କ୍ଷତି (ସମ୍ପୂର୍ଣ୍ଣ) ପାଇଁ ୨୦ ହଜାର ଟଙ୍କା ସହ ସରକାରଙ୍କ ପକ୍ଷରୁ ପକ୍କା ଘର ପ୍ରଦାନ କରାଯାଉଛି । ତେଣୁ ଲୋକେ ସଚେତନ ହୋଇ ବନ୍ୟପ୍ରାଣୀଙ୍କ କୌଣସି କ୍ଷତି ନ କରିବା ପାଇଁ ଅତିଥି ମାନେ ଉପସ୍ଥିତ ଲୋକଙ୍କୁ ଆହ୍ବାନ କରିଥିଲେ।
ଏଥିସହ ହାତୀ ନଷ୍ଟ କରୁଥିବା ଫସଲ ଧାନ , କଦଳୀ ଚାଷ ନକରି ବିକଳ୍ପ ଫସଲ ଯଥା ମାଛ, କୁକୁଡ଼ା ଭଳି ଚାଷ କରିବାକୁ ଅତିଥି ମାନେ ଆହ୍ବାନ କରିଥିଲେ। ସଭାରେ ଅନ୍ୟମାନଙ୍କ ମଧ୍ୟରେ ଏ ସି ଏଫ ବିବେକ ଦାସ, ରେଞ୍ଜର ବିମ୍ବାଧର ସାହୁ, ବନପାଳ ବବୁଲ ସେଠୀ, ଟାଟା ପାୱାର ଅଧିକାରୀ ମାନେ ଉପସ୍ଥିତ ଥିଲେ। କାର୍ଯ୍ୟକ୍ରମକୁ ସ୍ନେହା ଅନୁଷ୍ଠାନର କର୍ମଚାରୀ ପ୍ରଶାନ୍ତ ରାଉତ ସଂଯୋଜନା କରିଥିଲେ।
Dharitri – Odisha’s No.1 Odia Daily
