ନୂଆଦିଲ୍ଲୀ,୩।୮ : ମଣିପୁର ହିଂସା ପ୍ରସଙ୍ଗରେ ସଂସଦରେ ହଟ୍ଟଗୋଳ ଥମିବାର ନାମ ନେଉ ନାହିଁ। ବିରୋଧୀ ଧାରା ୨୬୭ ଅଧୀନରେ ଲଗାତାର ଆଲୋଚନା ପାଇଁ ଦାବି କରୁଛନ୍ତି। ଏଥି ସହିତ ସରକାର କହିଛନ୍ତି ବିରୋଧୀ ଦଳ ନିଜେ ଏହି ପ୍ରସଙ୍ଗରେ ଆଲୋଚନା କରିବାକୁ ଚାହୁଁନାହାଁନ୍ତି। ଏବେ ପୁଣି ଥରେ ଏହି ପ୍ରସଙ୍ଗରେ ରାଜ୍ୟସଭାରେ ତୀବ୍ର ବିତର୍କ ଦେଖିବାକୁ ମିଳିଛି। ମଣିପୁରକୁ ନେଇ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଏବଂ ବାଚସ୍ପତି ଜଗଦୀପ ଧନକରଙ୍କ ମଧ୍ୟରେ ତୀବ୍ର ବାକ୍ୟ ଆଦାନ ପ୍ରଦାନ ହୋଇଥିଲା। ତେବେ ଏହି ସମୟରେ ଜଗଦୀପ ଧନକର ମଧ୍ୟ ଏକ ମଜାଳିଆ ସ୍ବରରେ କଥା ହେଉଥିବା ଦେଖିବାକୁ ମିଳିଥିଲା।
ଖାର୍ଗେ କହିଥିଲେ ମଣିପୁରକୁ ଭାଜପା ଏକ ସମ୍ମାନର ପ୍ରସଙ୍ଗ ନ କରି ଏହା ଉପରେ ଆଲୋଚନା କରିବା ଆବଶ୍ୟକ। ସେ ବାଚସ୍ପତି କହିଥିଲେ, ବୋଧହୁଏ ଆପଣ ଗତକାଲି ରାଗିଯାଇଥିଲେ। ଏହା ଉପରେ ଧନକର ଥଟ୍ଟା କରି କହିଥିଲେ ମୁଁ ୪୫ ବର୍ଷ ହେଲା ବିବାହ କରିଛି। ଏବେ ଆଉ ରାଗୁ ନାହିଁ। ଆଇନଜୀବୀ ଭାବରେ ମଧ୍ୟ ଆମର କ୍ରୋଧ କରିବାର ଅଧିକାର ନାହିଁ।
ଜଗଦୀପ ଧନକରଙ୍କୁ ଜବାବ ଦେଇ ଖାର୍ଗେ କହିଛନ୍ତି, ଆପଣ ଏହାକୁ ପ୍ରକାଶ କରି ନ ପାରନ୍ତି ନାହିଁ କିନ୍ତୁ ଆପଣ ଭିତରୁ କ୍ରୋଧିତ ହେଉଥିବେ। ଏହା ପରେ ଖାର୍ଗେ ଅଭିଯୋଗ କରିଥିଲେ ଆପଣ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସୁରକ୍ଷା କରୁଛନ୍ତି। ଧନକର ଉତ୍ତର ଦେଇ କହିଥିଲେ, ପ୍ରଧାନମନ୍ତ୍ରୀଙ୍କର କୌଣସି ସୁରକ୍ଷା ଦରକାର ନାହିଁ। ତାଙ୍କର ଏକ ବିଶ୍ୱସ୍ତରୀୟ ପରିଚୟ ଅଛି। ଆମେରିକାର ସଂସଦରେ ତାଙ୍କ ଭାଷଣ ଶୁଣିବା ପରେ ଦେଶର ସାଧାରଣ ଲୋକମାନେ କେତେ ଗର୍ବ ଅନୁଭବ କରୁଛନ୍ତି ଭାବନ୍ତୁ । ତିରିଶ ବର୍ଷ ପରେ ପୂର୍ଣ୍ଣ ସଂଖ୍ୟାଗରିଷ୍ଠତା ଥିବା ଏକ ସରକାର ଗଠନ କରାଯାଇଛି।
