ଯାଜପୁର ଅଫିସ,୩୦ା୧୧:ଯାଜପୁର ଜିଲା ସୀମାନ୍ତବର୍ତ୍ତୀ କଟକ ଜିଲା ମାହାଙ୍ଗା ବ୍ଲକ ଅଧୀନ କଇଥା ତ୍ରିନାଥପୁର ମୀରାଦେବୀ ସଂସ୍କୃତ କଲେଜରେ ବ୍ୟାପକ ଅନିୟମିତତା ଅଭିଯୋଗ ହୋଇଛି। ଛାତ୍ରୀଛାତ୍ରଙ୍କଠାରୁ ବିନା ରସିଦରେ ଅର୍ଥ ଆଦାୟ ଏବଂ କେତେଜଣ ବାହାରେ ଚାକିରି କରି ଏହି କଲେଜରେ ନିୟମିତ ଭାବେ ପାଠ ପଢ଼ୁଥିବା ନେଇ ସ୍ଥାନୀୟ ଲୋକଙ୍କ ପକ୍ଷରୁ ଉଚ୍ଚଶିକ୍ଷା ଓ ପଞ୍ଚାୟତିରାଜ ବିଭାଗ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଛି। ଏହି ଅଭିଯୋଗ ଆଧାରରେ ଉଚ୍ଚଶିକ୍ଷା ବିଭାଗର ଭୁବନେଶ୍ୱର ଆଞ୍ଚଳିକ ନିର୍ଦ୍ଦେଶାଳୟ ଉପନିର୍ଦ୍ଦେଶକ ଗତ ୨୪ ତାରିଖରେ ୧୦ ଦିନ ମଧ୍ୟରେ ତଥ୍ୟ ଭିତ୍ତିକ ରିପୋର୍ଟ ପ୍ରଦାନ କରିବାକୁ କଲେଜ ଅଧ୍ୟକ୍ଷାଙ୍କୁ ନିର୍ଦ୍ଦେଶ ଦେଇଛନ୍ତି।
ଅଭିଯୋଗ ଅନୁସାରେ ୧୯୯୭ ମସିହାରେ ମୀରାଦେବୀ ସଂସ୍କୃତ କଲେଜ ପ୍ରତିଷ୍ଠା ହୋଇଛି। ଛାତ୍ରୀଛାତ୍ରମାନଙ୍କ ଆଡ୍ମିଶନ ସମୟରେ ଯୁକ୍ତ୨ରେ ସର୍ବନିମ୍ନ ୮ ହଜାର ଟଙ୍କା ବଦଳରେ ୧୦ ହଜାର ଟଙ୍କା ଆଦାୟ କରାଯାଉଛି। କୌଣସି ପିଲାଙ୍କୁ ରସିଦ ଦିଆଯାଉନାହିଁ। ଯଦି କୌଣସି ଛାତ୍ରୀଛାତ୍ର ରସିଦ ମାଗନ୍ତି, ପରୀକ୍ଷାରେ ଫେଲ କରିଦେବୁ ବୋଲି ଧମକ ଦିଆଯାଉଛି। ଏହାସହ ଯୁକ୍ତ୨ ପରୀକ୍ଷା ସମୟରେ ୪୦୦ରୁ ୫୦୦ ଟଙ୍କା ଏବଂ ବାର୍ଷିକ ପରୀକ୍ଷା ସମୟରେ କେନ୍ଦ୍ରରେ ୧୦୦୦ ଟଙ୍କା ପର୍ଯ୍ୟନ୍ତ ବିନା ରସିଦରେ ଆଦାୟ କରାଯାଉଛି। ଶିକ୍ଷାନୀତିରେ ପୂଜାପାର୍ବଣରେ ଚାନ୍ଦା ଆଦାୟ କରିବାର ନିୟମ ନ ଥାଇ ମଧ୍ୟ ପ୍ରତ୍ୟେକ ପିଲାଙ୍କଠାରୁ ୨୦୦ ଟଙ୍କା ଲେଖାଏ ଆଦାୟ ହେଉଛି। ସବୁଠୁ ବଡ଼ ଅଭିଯୋଗ ହେଲା, କେତେଜଣ ଛାତ୍ର ବାହାରେ ଚାକିରି କରୁଥିବାବେଳେ ଏହି କଲେଜରେ ରେଗୁଲାର କୋର୍ସ କରୁଛନ୍ତି। ସେମାନଙ୍କଠାରୁ ପ୍ରାୟ ୧୫ରୁ ୨୦ ହଜାର ଟଙ୍କା ଲେଖାଏ ଆଦାୟ କରାଯାଇ ମିଥ୍ୟା ଶ୍ରେଣୀ ଉପସ୍ଥାନ ଦର୍ଶାଯାଉଛି। ଅଭିଯୋଗରେ କଟକ ସିଟି ହସ୍ପିଟାଲରେ କାର୍ଯ୍ୟରତ ୨ ଜଣ ଛାତ୍ରଙ୍କ ନାମ ଉଦାହରଣ ଭାବେ ଦର୍ଶାଯାଇଛି। ଛାତ୍ରୀଛାତ୍ରମାନଙ୍କଠାରୁ ଆଦାୟ ହେଉଥିବା ଟଙ୍କା କଲେଜ ଆକାଉଣ୍ଟକୁ ଯାଉନାହିଁ ବୋଲି ସ୍ଥାନୀୟ ବାସିନ୍ଦା କପିଳେଶ୍ୱର ପାଲ, ଅକ୍ଷୟ କୁମାର ପାଲ, ମଞ୍ଜୁଲତା ପାଲ, ସୁଦର୍ଶନ ପାଲ, କ୍ଷୀରୋଦ ପାତ୍ର, ଶ୍ରୀଧର ବେହେରା ପ୍ରମୁଖଙ୍କ ପକ୍ଷରୁ ସ୍ବାକ୍ଷର ସମ୍ବଳିତ ଅଭିଯୋଗ ପତ୍ର ବିଭାଗୀୟ ମନ୍ତ୍ରୀ ଓ ଆଞ୍ଚଳିକ ଶିକ୍ଷା ନିର୍ଦ୍ଦେଶକଙ୍କୁ ପ୍ରଦାନ କରାଯାଇଛି। ଏହିସବୁ ଅଭିଯୋଗ ସମ୍ପର୍କରେ କଲେଜ ଅଧ୍ୟକ୍ଷାଙ୍କୁ ରିପୋର୍ଟ ମଗାଯାଇଥିବାବେଳେ ସେଥିରେ ଅଭିଯୋଗକାରୀମାନେ ସନ୍ତୁଷ୍ଟ ନାହାନ୍ତି। କଲେଜ କର୍ମଚାରୀ କିମ୍ବା କଲେଜ ସହ ସମ୍ପୃକ୍ତ ବ୍ୟକ୍ତିଙ୍କୁ ବାଦ୍ ଦେଇ ଅନ୍ୟ ଅଧିକାରୀଙ୍କ ଦ୍ୱାରା ତଦନ୍ତ କରିବାକୁ ଅଭିଯୋଗକାରୀମାନେ ଦାବି କରିଛନ୍ତି।
