ଡେରାବିଶ, ୨୮ା ୩ (ସ୍ବ.ପ୍ର.):କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକ ଅଧୀନ ରତାଦିଆଖଣ୍ଡସାହି ପଞ୍ଚାୟତ କାର୍ଯ୍ୟାଳୟରେ ସୋମବାର ପଲ୍ଲୀରେ ପ୍ରଶାସନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମର ଡେରାବିଶ ପଞ୍ଚାୟତ ସମିତି ଅଧ୍ୟକ୍ଷା ପ୍ରଭତି ମଳିକ ଶୁଭାରମ୍ଭ କରିଥିଲେ। ସରପଞ୍ଚ ଶିଶିର ସାମଲ, ସମିତିସଭ୍ୟ ନିତ୍ୟାନନ୍ଦ ଭଦ୍ର, ରତାଦିଆ ଖଣ୍ଡସାହି ସମବାୟ ସମିତି ସଭାପତି ବିମଳକାନ୍ତ ତ୍ରିପାଠୀ ପ୍ରମୁଖ ଉପସ୍ଥିତ ରହିଥିଲେ। ଏଥିରେ ବିଡିଓ ଦାସରଥି ଜେନା ଉପସ୍ଥିତ ରହି ୧୩୮ଟି ଅଭିଯୋଗର ଶୁଣାଣି କରିଥିଲେ। ତେବେ କେତେକ ଅଭିଯୋଗର ତ୍ୱରିତ ସମାଧାନ ହୋଇଥିବା ବେଳେ ଅନ୍ୟ ଅଭିଯୋଗଗୁଡ଼ିକୁ ବିଭାଗୀୟ ଅଧିକାରୀଙ୍କ ନିକଟକୁ ବିଡିଓ ଜେନା ପଠାଇ ଦେଇଥିଲେ। ଏହି କାର୍ଯ୍ୟକ୍ରମରେ ତହସିଲଦାର ଅକ୍ଷୟ ପରିଡା, ସିଡିପିଓ ସ୍ନେହଲତା ସାହୁ, ଏବିଡିଓ ଭଞ୍ଜକିଶୋର ନାୟକ, ବ୍ଲକ କାର୍ଯ୍ୟକ୍ରମ ଅଧିକାରୀ ସାବିତ୍ରୀ ମନ୍ତ୍ରୀ ପ୍ରମୁଖ ଉପସ୍ଥିତ ଥିଲେ। କାର୍ଯ୍ୟକ୍ରମରେ ବ୍ଲ୍ଳକ ପ୍ରଶାସନ ପକ୍ଷରୁ ୧୦ରୁ ଅଧିକ ଷ୍ଟଲ ଖୋଲାଯିବା ସହ ବିଭିନ୍ନ ବିଭାଗର ସମ୍ପ୍ରସାରଣ ଅଧିକାରୀମାନେ ଉପସ୍ଥିତ ରହି ନିଜ ନିଜ ବିଭାଗର ଅଭିଯୋଗ ଗ୍ରହଣ କରିଥିଲେ। ଡେରାବିଶ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ଅନୁଷ୍ଠିତ ସ୍ବାସ୍ଥ୍ୟ ଶିବିରରେ ଚାନ୍ଦୋଳ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. କ୍ରିଷ୍ଣା ପଣ୍ଡାଙ୍କ ତତ୍ତ୍ୱାବଧାନରେ ଉପସ୍ଥିତ ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ତେବେ ରାଶନ ସାମଗ୍ରୀ, ଭତ୍ତା, ଆବାସରୁ ବଞ୍ଚତ୍ତ ଥିବା ହିତାଧିକାରୀମାନେ ସେମାନଙ୍କ ଅଭିଯୋଗ ପ୍ରଦାନ କରିଥିଲେ। ନିକଟରେ ବ୍ଲକ ଅଧୀନ ବିଭିନ୍ନ ପଞ୍ଚାୟତରେ ଜୀବିକା ମିଶନ ପକ୍ଷରୁ ଏମ୍ବିକେ ଓ ସିଆରପି ପଦ ପାଇଁ ଚୟନ ହୋଇଥିଲା। ହେଲେ ରତାଦିଆ ଖଣ୍ଡସାହି ପଞ୍ଚାୟତରେ ଏଥିରେ ବ୍ୟାପକ ଅନିୟମିତତା ହୋଇଥିବା ନେଇ କେତେଗୋଟି ମହିଳା ସ୍ବୟଂ ସହାୟିକା ଗୋଷ୍ଠୀର ସଦସ୍ୟା ଅଭିଯୋଗ ଆଣିଥିଲେ। ସେହିପରି ପଞ୍ଚାୟତ ଅଧୀନ ୮ ନଂ. ୱାର୍ଡ଼ ସୋରିଷିଆ ଗଁାରେ ଥିବା ଅଙ୍ଗନୱାଡି କେନ୍ଦ୍ରରେ କର୍ମୀଙ୍କ ନିଯୁକ୍ତି ନେଇ ନ୍ୟାୟାଳୟରେ ମାମଲା ବିଚାରାଧୀନ ଥିବା ବେଳେ କେନ୍ଦ୍ରରେ କର୍ମୀ ପଦବୀ ଖାଲିପଡ଼ିଛି। ଅନ୍ୟ ଏକ କେନ୍ଦ୍ରର କର୍ମୀ ସମ୍ପୃକ୍ତ ଗ୍ରାମର ଅଙ୍ଗନୱାଡ଼ି କେନ୍ଦ୍ରର ଦାୟିତ୍ୱରେ ଥିବା ବେଳେ ଏହି କେନ୍ଦ୍ର ପାଇଁ ୮ ନଂ. ୱାର୍ଡର ସଭ୍ୟ ମଞ୍ଜୁଶା ନାୟକଙ୍କୁ ସିଡିପିଓ ଅଣଦେଖା କରି ଦାୟିତ୍ୱରେ ଥିବା ବିଭାଗୀୟ ସୁପରଭାଇଜରଙ୍କ ନାମରେ ବ୍ୟାଙ୍କ ଜମାଖାତା ଖୋଲି ସରକାରୀ ଅର୍ଥକୁ ହଡ଼ପ କରାଯାଉଥିବା ନେଇ ସିଡିପିଓଙ୍କ ନିକଟରେ ଗ୍ରାମବାସୀ ଅଭିଯୋଗ କରିଥିଲେ। ତେବେ ସିଡିପିଓ ଗ୍ରାମବାସୀଙ୍କୁ ଏହାର ଉତ୍ତର ଦେଇ ପାରିବେ ନାହିଁ ବୋଲି କହିବାରୁ ତାଙ୍କୁ ଗ୍ରାମବାସୀ ଘେରିଯିବା ସହ ଉଭୟଙ୍କ ମଧ୍ୟରେ ଉଚ୍ଚବାଚ ହୋଇଥିବା ଦେଖିବାକୁ ମିଳିଥିଲା। ଏଥିରେ ସରପଞ୍ଚ ସାମଲ ହସ୍ତକ୍ଷେପ କରିବାରୁ ଘଟଣା ପ୍ରଶମିତ ହୋଇଥିଲା। ଏଥିରେ ମତ୍ସ୍ୟ ବିଭାଗ ଅଧିକାରୀ ରଶ୍ମି ରଞ୍ଜନ ଦାସ, ସହକାରୀ ଅଧିକାରୀ ସରସ୍ବତୀ ସେଠୀ, ସୌମ୍ୟରଞ୍ଜନ ବଳ, ସହକାରୀ ସାମାଜିକ ସୁରକ୍ଷା ଅଧିକାରୀ ଚୌଧୁରୀ ଦୀପକ କୁମାର ପ୍ରମୁଖଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ। ଏହାକୁ ପଞ୍ଚାୟତ କାର୍ଯ୍ୟନିର୍ବାହୀ ଝୁନିଲତା ମଲିକ, ମଦନ ମୋହନ ସାହୁ ଓ ପଞ୍ଚାୟତର ଯୁବକମାନେ ପରିଚାଳନାରେ ସହଯୋଗ କରିଥିଲେ।
