ଲୋଇସିଂହା,୧୧।୨(ସୁଶାନ୍ତ ବାରିକ):ବଲାଙ୍ଗୀର ଜିଲା ଆଗଲପୁର ବ୍ଲକରେ ଏମ୍ଜିଏନଆରଇଜିଏସ୍ କାମରେ ଅନିୟମିତତା ହେଉଥିବା ନେଇ ଅଭିଯୋଗ ହେଉଛି। ପଞ୍ଚାୟତ ସ୍ତରରେ ହେଉଥିବା କାମ ସଂକ୍ରାନ୍ତରେ ଏମ୍ଜିଏନଆରଇଜିଏସ୍ କାମ ସାଇଟ୍ର ଏନଏନଏମଏସ୍ ଆପ୍ରେ ଅପ୍ଲୋଡ ହେଉଥିବା ଫଟୋ ଏବଂ ଉପସ୍ଥାନ ହିଁ ଅନିୟମିତତାକୁ ପଦାରେ ପକାଇଛି।
ଅଭିଯୋଗରୁ ପ୍ରକାଶ ଯେ, ବ୍ଲକ ମୁଖ୍ୟାଳୟ ଡୁଡୁକା ପଞ୍ଚାୟତ ପକ୍ଷରୁ ଏମଜିଏନଆରଇଜିଏସରେ ବିଭିନ୍ନ ଗ୍ରାମରେ କାମ ଚାଲିଛି। ୧୪ଟି ମଷ୍ଟର ରୋଲରେ ଗତ ୯ ତାରିଖ ଦିନ ପ୍ରାୟ ୧୦୯ ଜଣ ଶ୍ରମିକ ଏହି ପଞ୍ଚାୟତର ବିଭିନ୍ନ ପ୍ରକଳ୍ପରେ କାମ କରୁଥିବା ଦର୍ଶାଯାଇଛି। ଜଣ ପିଛା ୨୭୩ ଟଙ୍କା ପାଉଣା ହିସାବରେ ୨୯ ହଜାର ୭୫୭ ଟଙ୍କା ଶ୍ରମିକ ପାଉଣା ପଇଠ ହେଉଛି। ଉକ୍ତ ପଞ୍ଚାୟତ ଅଧୀନ କେଶାଇପାଲି ଗଁାରେ ୨ କିମି ଟ୍ରେଞ୍ଚ ପ୍ରକଳ୍ପ କାମ ହେଉଛି। ଉକ୍ତ ପ୍ରକଳ୍ପରେ ମଷ୍ଟରରୋଲ ନମ୍ବର ୧୩୦୯୩ରେ ୧୦ ଜଣ ଶ୍ରମିକ କାମ କରୁଥିବା ନେଇ ଗତ ସୋମବାର ପୂର୍ବାହ୍ନ ୧୦ଟା ୫୨ମିରେ ପ୍ରଥମ ଫଟୋ ଅପ୍ଲୋଡ କରାଯାଇଛି। ଯେଉଁଥିରେ ୧୦ ଜଣ ଶ୍ରମିକ ରହିଛନ୍ତି ା ସେଥିମଧ୍ୟରୁ ୭ ଜଣ ପୁରୁଷ ଏବଂ ୩ ଜଣ ମହିଳା ରହିଛନ୍ତି। କିନ୍ତୁ ଉପସ୍ଥାନରେ ଗୁମୁନି, ମାଧବୀ, ହରପ୍ରିୟା ଓ ବୈଦେହି ମହିଳା ଶ୍ରମିକ କାମ କରୁଥିବା ଦର୍ଶାଯାଇଛି। ଫଟୋରେ ୩ ଜଣ ମହିଳା ଥିବା ସ୍ଥଳେ ଉପସ୍ଥାନରେ ୪ ଜଣ ମହିଳା ଶ୍ରମିକଙ୍କ ଉପସ୍ଥାନକୁ ନେଇ ପ୍ରଶ୍ନ ଉଠିଛି। ଉକ୍ତ ମଷ୍ଟର ରୋଲରେ ଅପ୍ଲୋଡ ହୋଇଥିବା ୨ୟ ଫଟୋରେ କେବଳ ୨ ଜଣ ଶ୍ରମିକଙ୍କ ଫଟୋ ରହିଛି। ସେହିପରି ଉକ୍ତ ଦିନ ଏହି ପ୍ରକଳ୍ପର ମଷ୍ଟର ରୋଲ ନମ୍ବର ୧୩୦୯୭ରେ ପୁଣି ୧୦ ଜଣ ଶ୍ରମିକ କାମ କରିଛନ୍ତି। ଏଠାରେ ମଧ୍ୟ ୩ ଜଣ ମହିଳା ଶ୍ରମିକଙ୍କ ଫଟୋ ଅପ୍ଲୋଡ ହୋଇଥିବା ସ୍ଥଳେ ବନିତା, ସାଇବାନୀ, ସୁଲୋଚନା ଓ କୁମୁଦିନୀ କାମ କରିଥିବା ନେଇ ଉପସ୍ଥାନ ପକାଯାଇଛି। ଭିନ୍ନ ଭିନ୍ନ ମଷ୍ଟର ରୋଲ ହୋଇଥିଲେ ସୁଦ୍ଧା ଏକପ୍ରକାର ଫଟୋ ଆପ୍ରେ ଅପ୍ଲୋଡକୁ ନେଇ ସାଧାରଣରେ ସଶଂୟ ସୃଷ୍ଟି ହୋଇଛି। ସେହିପରି ଅନ୍ୟ ଏକ କାର୍ଯ୍ୟ କୋଡ୍ ନମ୍ବର ୧୦୬୨୪୧୨୭ରେ ଡୁଡୁକାରୁ ଜଡାମୁଣ୍ଡା ରାସ୍ତା ନିର୍ମାଣ କାମ ଚାଲିଛି। ଏହି ପ୍ରକଳ୍ପର ମଷ୍ଟରରୋଲ ନମ୍ବର ୧୩୬୯୮, ୧୩୬୯୯, ୧୩୭୦୦, ୧୩୭୦୧,୧୩୭୦୨,୧୩୭୦୩ରେ ମୋଟ ୫୨ ଜଣ ଶ୍ରମିକ କାମ କରୁଛନ୍ତି। ଏହିସବୁ କାମରେ କେବଳ ପୁରୁଷ ଶ୍ରମିକଙ୍କ ଫଟୋ ଅପ୍ଲୋଡ କରାଯାଇଥିବା ବେଳେ ୩ରୁ ୪ ଜଣ ଶ୍ରମିକ କାମ କରିଥିବା ନେଇ ଦର୍ଶାଯାଇଛି। ସେହିପରି ବ୍ଲକର ରୋତ, ଭରସୁଜା, ରିନବଚନ ପଞ୍ଚାୟତରେ ସମାନ ଧରଣର ଅନିୟମିତତା ହେଉଥିବା ନେଇ ଅଭିଯୋଗ ହେଉଛି। ଏ ସମ୍ପର୍କରେ ଡୁଡୁକା ପଞ୍ଚାୟତର ଜିଆରଏସ୍ କମ୍ ଡିଇଓ ଚିତ୍ତ ରଞ୍ଜନ ଭୋଇଙ୍କୁ ପଚାରିବାରୁ ଗାଁ ସାଥୀମାନେ ଏପରି କରୁଥିବା ସେ କହିଥିଲେ। କେବଳ ଆଗଲପୁର ନୁହେଁ ଜିଲାରେ ଏପରି ଭାବେ ଦୈନିକ ଲକ୍ଷାଧିକ ଟଙ୍କା ହରିଲୁଟ ହେଉଛି ା ରାଜ୍ୟ ସରକାର ଏହାର ଉଚ୍ଚସ୍ତରୀୟ ତଦନ୍ତ କରିବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
