ଫୁଲବାଣୀ ଅଫିସ, ୧୧ା୩: କନ୍ଧମାଳ ଜିଲା ମୁଖ୍ୟ ଚିକିତ୍ସାଳୟରେ କିଡନୀ ଖରାପ ରୋଗୀଙ୍କୁ ଡାୟାଲିସିସ ସେବା ଯୋଗାଇ ଦିଆଯାଉଛି । ଜୀବନ ସହ ସଂଘର୍ଷ କରି ବଞ୍ଚତ୍ବା ପାଇଁ ଆଶା ବାନ୍ଧୁଥିବା ଏହି ରୋଗୀଙ୍କୁ ଏଠାରେ ଶୋଷଣ କରାଯାଉଥିବା ଅଭିଯୋଗ ହେଉଛି। କେହି ରୋଗୀ ସମ୍ପର୍କୀୟ ଏହାକୁ ବିରୋଧ କଲେ ସେମାନଙ୍କ ମାନସିକସ୍ତରରେ ଚାପ ପକାଯାଉଛି, ଯାହାକୁ ନେଇ ଏବେ ଅସନ୍ତୋଷ ବଢ଼ିବାରେ ଲାଗିଛି । ଖାଲି ସେତିକି ନୁହେଁ, ଏ ନେଇ ଜିଲାପାଳ, ଜିଲା ମୁଖ୍ୟ ଚିକିତ୍ସାଧିକାରୀଙ୍କ ପାଖରେ ମଧ୍ୟ ଅଭିଯୋଗ କରାଯାଇଛି ।
ପ୍ରକାଶ ଯେ, ଜିଲା ମୁଖ୍ୟ ଚିକିତ୍ସାଳୟରେ ପିପିପି ମୋଡରେ ଡାୟାଲିସିସ ସେବା ଚାଲିଛି। ଏକ ଘରୋଇ ସଂସ୍ଥା ଏହାର ପରିଚାଳନା ଦାୟିତ୍ୱ ନେଇଛି । ୨୦୧୮ ସେପ୍ଟେମ୍ବର ୧୨ରୁ ଏହି ସେବା ଯୋଗାଇ ଦିଆଯାଉଛି, ଯାହା ସମ୍ପୂର୍ଣ୍ଣ ମାଗଣାା କିନ୍ତୁ ବିଭିନ୍ନ ପ୍ରକାର ଆଳ ଦେଖାଇ ରୋଗୀଙ୍କ ସମ୍ପର୍କୀୟଙ୍କଠାରୁ ଅର୍ଥ ଶୋଷଣ କରାଯାଉଥିବା ଅଭିଯୋଗ ହୋଇଛି। ସବୁଠୁ ବଡ କଥା ହେଉଛି ଏହି ସେବା କେନ୍ଦ୍ରର କାନ୍ଥରେ ଏକ ବ୍ୟାନର ଲଗାଯାଇଥିଲା, ଯେଉଁଥିରେ ଏହା ସମ୍ପୂର୍ଣ୍ଣ ମାଗଣା, ଯଦି କେହି ଟଙ୍କା ମାଗୁଥିବେ ତାହାଲେ ଫୋନ୍ ନଂରେ ଯୋଗାଯୋଗ କରିବାକୁ ଉଲ୍ଲେଖ କରାଯାଇଥିଲା। ହେଲେ ସେହି ବ୍ୟାନରକୁ କିଛିଦିନ ହେବ ସେଠାରୁ ହଟାଇ ଦିଆଯାଇଛିା ଖଜୁରୀପଡା ବ୍ଲକ ସିଦିଙ୍ଗି ଗ୍ରାମର ବିଶ୍ୱାନନ୍ଦ ଦେହୁରୀଙ୍କ ଦୁଇଟି କିଡନୀ ନଷ୍ଟ ହୋଇଯାଇଛି । ସେ ଜିଲା ମୁଖ୍ୟ ଚିକିତ୍ସାଳୟ ଆସି ଡାୟାଲିସିସ କରୁଛନ୍ତି। ବିଶ୍ୱାନନ୍ଦ ଆର୍ଥିକ ସ୍ବଚ୍ଛଳ ନୁହନ୍ତି । ସେ ଆଦିବାସୀ ଶ୍ରେଣୀର ଲୋକ। ଡାକ୍ତରଙ୍କ ପରାମର୍ଶ ଅନୁସାରେ ସପ୍ତାହରେ ତାଙ୍କର ଦୁଇ ଥର ଡାୟାଲିସିସ କରାଯାଉଛି । କିନ୍ତୁ ପରିଚାଳନା ସଂସ୍ଥାର ଟେକ୍ନିସିଆନ ଏବଂ ମ୍ୟାନେଜର ରୋଗୀଙ୍କୁ ଶୋଷଣ କରୁଛନ୍ତି । ବିଶ୍ୱାନନ୍ଦଙ୍କ ପୁଅ ଅମର କୁହନ୍ତି, ଡାୟାଲିସିସ ପାଇଁ ଏକ ଫିଲଟର ବ୍ୟବହାର କରାଯାଏ । ସରକାର ଏହାକୁ ସମ୍ପୂର୍ଣ୍ଣ ମାଗଣା ଦେଉଛନ୍ତି। ଜଣେ ରୋଗୀଙ୍କର ଏଥିରେ ୧୦ଥର ରକ୍ତ ଫିଲଟର ହୋଇପାରିବ। କିନ୍ତୁ ପରିଚାଳକ କହୁଛନ୍ତି ଆମେ ଏହାକୁ ୧୦ ଥର ବ୍ୟବହାର କରିବୁ ନାହିଁ। ୫ ଥର ବ୍ୟବହାର କରିବୁ। ବାକି ୫ ଥର ପାଇଁ ଫିଲଟର, ଟ୍ୟୁବ ବାବଦକୁ ୧୧୫୦ରୁ ୧୨୫୦ ଟଙ୍କା ଦେବାକୁ ପଡିବ କହି ଏକ ପ୍ରକାର ବ୍ଲାକମେଲିଂ କରୁଛନ୍ତି । ଉପାୟ ନ ପାଇ ଆମେ କେତେଥର ଟଙ୍କା ମଧ୍ୟ ଦେଇଛୁ । କିନ୍ତୁ ଏହା ଉପରେ କିଛି ବିଲ ଦେଉ ନାହାନ୍ତି । ସେହିପରି ପ୍ଲାଷ୍ଟର, ଅଏଣ୍ଟମେଣ୍ଟ, ଇଞ୍ଜେକସନ ବାବଦକୁ ମଧ୍ୟ ଟଙ୍କା ମାଗୁଛନ୍ତି । ଟଙ୍କା ଦେବାକୁ ମନାକଲେ ଅଯଥା ଯୁକ୍ତି କରୁଛନ୍ତି। ଆମକୁ ସମ୍ପୂର୍ଣ୍ଣ ଭାବେ ଶୋଷଣ କରାଯାଉଛି । ଏ ନେଇ ଜିଲାପାଳ ଏବଂ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି ବୋଲି ଅମର ପ୍ରକାଶ କରିଛନ୍ତି। ତେବେ ଏ ନେଇ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡା.ମନୋଜ କୁମାର ଉପାଧ୍ୟାୟଙ୍କୁ ପଚାରିବାରୁ ଘଟଣାର ତଦନ୍ତ ମେଡିକାଲ ଅଧ୍ୟକ୍ଷଙ୍କୁ ଦିଆଯାଇଛି। ରିପୋର୍ଟ ଆସିଲା ପରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ।