ଭଞ୍ଜନଗର,୨୯।୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ମେଡ଼ିକାଲରେ ଶନିବାର ସକାଳୁ ସକାଳୁ ଜଣେ ଗର୍ଭବତୀ ମହିଳା ଚିକିତ୍ସା ଅବହେଳାରୁ ମୃତ୍ୟୁବରଣ କରିଥିବା ଅଭିଯୋଗ ହୋଇଛି। ମହିଳାଜଣକ ହେଲେ ବେଲଙ୍ଗୁଠା ବ୍ଲକ ପୁରୁଣା ଉଦ୍ରା ଗ୍ରାମର ଟିକିନା ସାମଲ। ଟିକିନାଙ୍କ ମୃତ୍ୟୁ କୁ ନେଇ ଶନିବାର ମେଡ଼ିକାଲରେ କିଛି ଘଣ୍ଟା ଉତ୍ତେଜନା ଦେଖା ଦେଇଥିଲା। ଏହାପରେ ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ଉତ୍ତେଜନା ଥମିଥିଲା। ଏଥିସହ ପୋଲିସ ଉପସ୍ଥିତିରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଥିଲା। ତାପରେ ପରିସ୍ଥିତି ଶାନ୍ତ ପଡିଥିଲା।
ଘଟଣାରୁ ପ୍ରକାଶ ଯେ, ଟିକିନାଙ୍କୁ ତାଙ୍କ ପରିବାର ଲୋକେ ଗତ ୨୬ ତାରିଖରେ ଚିକିତ୍ସା ପାଇଁ ଭଞ୍ଜନଗର ମେଡ଼ିକାଲରେ ଭର୍ତ୍ତି କରିଥିଲେ। ୨୭ରେ ତାଙ୍କୁ ଗୋଟିଏ ରକ୍ତ ପ୍ୟାକେଟ ଦିଆଯାଇଥିଲା।
୨୮ ତାରିଖ ରାତିରେ ଟିକିନାଙ୍କୁ ଆଉ ଗୋଟିଏ ରକ୍ତ ଦିଆଯାଇଥିଲା। ରାତି ପ୍ରାୟ ୩ଟା ସମୟରେ ସେ ନିଃଶ୍ୱାସ ପ୍ରଶାସ ନେବାରେ କଷ୍ଟ ଅନୁଭବ କରିଥିଲେ। ଏହାପରେ ତାଙ୍କ ସ୍ବାମୀ ଡ୍ୟୁଟିରେ ଥିବା ନର୍ସଙ୍କୁ ଡାକିଥିଲେ। ନର୍ସ ଦେଖିବା ପରେ ଏମିତି ହେବ କିଛି ଅସୁବିଧା ନାହିଁ କହି ଟିକେ ଦେଖିବା ପରେ ଚାଲି ଯାଇଥିଲେ। ଏହାର କିଛି ସମୟ ପରେ ଟିକିନା ମୃତ୍ୟୁବରଣ କରିଥିଲେ। ଚିକିତ୍ସା ଅବହେଳାରୁ ଟିକିନାଙ୍କ ମୃତ୍ୟୁ ହୋଇଥିବା ଦର୍ଶାଇ ପରିବାର ଲୋକ ମେଡ଼ିକାଲରେ ହୋହାଲ୍ଲା କରିଥିଲେ। ଦୋଷୀଙ୍କ ବିରୋଧରେ କାର୍ଯାନୁଷ୍ଠାନ ଦାବି ନେଇ ମୃତଦେହକୁ ଧରି ପରିବାର ଲୋକ ମେଡ଼ିକାଲରେ ଆନ୍ଦୋଳନ କରିଥିଲେ। ଯାହାକୁ ନେଇ ମେଡ଼ିକାଲରେ ଏକ ପ୍ରକାର ଅପ୍ରୀତିକର ପରିସ୍ଥିତି ଦେଖା ଦେଇଥିଲା। ଏହାପରେ ପୋଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା।
ସୂଚନା ଯୋଗ୍ୟ ଯେ ରାଜ୍ୟରେ ଶିଶୁ ଓ ଗର୍ଭବତୀ ମହିଳା ମୃତ୍ୟୁ ହାର କମାଇବା ପାଇଁ ସରକାର ଅନେକ ପଦକ୍ଷେପ ନେଉଛନ୍ତି। ତଥାପି ବିଭିନ୍ନ ସମୟରେ ତାହା ବିଫଳ ହେଉଥିବା ଆଜିର ଘଟଣାରୁ ଅନୁମାନ କରାଯାଉଛି। ଭଞ୍ଜନଗର ମେଡିକାଲରେ ବର୍ତ୍ତମାନ ୫୪ ଟି ଡାକ୍ତର ପଦବୀ ଅନୁମୋଦନ ହୋଇଥିବା ବେଳେ ସେଥିମଧ୍ୟରୁ ମାତ୍ର ୧୭ ଜଣ ଅଛନ୍ତି। ନର୍ସ ୧୭ ଟି ପଦବୀ ଖାଲି ପଡ଼ିଛି। ଫାର୍ମାସିଷ୍ଟ ୨ ଟି ପଦବୀ ସମେତ ଅନ୍ୟାନ୍ୟ ପଦବୀ ଖାଲି ପଡ଼ିଛି। ଏଥିସହ ବର୍ତ୍ତମାନ ମେଡିକାଲରେ ଜାତୀୟ ସୱାସ୍ଥ୍ୟ ମିଶନ ମାଧ୍ୟମରେ ନିଯୁକ୍ତ ଥିବା ୭ ଜଣ କର୍ମଚାରୀ ଆନ୍ଦୋଳନ ଚଳାଇଥିବା ଯୋଗୁଁ ଭୁବନେଶ୍ୱର ଚାଲି ଯାଇଛନ୍ତି। କର୍ମଚାରୀ, ଡାକ୍ତର ପଦବୀ ଖାଲି ପଡିଥିବା ଯୋଗୁଁ ରୋଗୀ ସେବା ଗୁରୁତର ଭାବେ ପ୍ରଭାବିତ ହୋଇଛନ୍ତି । ଏହିଭଳି ପରିସ୍ଥିତିରେ ଗୁରୁବାର ଅସ୍ଥିଶଲ୍ୟ ଏବଂ ସର୍ଜରୀ ଡାକ୍ତର ଦୁଇଜଣ ଭଞ୍ଜନଗର ମେଡିକାଲ କୁ ବଦଳି ହୋଇଛି। ସେମାନେ କେବେ ନୂତନ କାର୍ଯ୍ୟରେ ଯୋଗଦେବେ ତାହା ଜଣାପଡିନାହିଁ।
ଭଞ୍ଜନଗର ମେଡ଼ିକାଲ ଉପରେ ଭଞ୍ଜନଗର ଉପଖଣ୍ଡ ସମେତ କନ୍ଧମାଳ ଓ ନୟାଗଡ଼ ଜିଲାର କିଛି ଅଞ୍ଚଳର ରୋଗୀ ଚିକିତ୍ସା ସୁବିଧା ପାଇଁ ର୍ନିଭରଶିଳ । ଏନେଇ ମେଡିକାଲ ଅଧିକ୍ଷକ ଡାକ୍ତର ସିତାନ୍ସୁ ଶେଖର ଶତପଥୀ ଗଣମାଧ୍ୟମ ସମ୍ମୁଖରେ କହିଛନ୍ତି ଯେ ମହିଳା ଜଣକ ରକ୍ତହୀନତା ରେ ପୀଡ଼ିତ ଥିବା ଯୋଗୁଁ ଚିକିତ୍ସିତ ହେଉଥିଲେ। ୨୭ ତାରିଖରେ ଗୋଟିଏ ରକ୍ତ ଦିଆଯାଇଥିଲା। ୨୮ ରେ ସେ ସୁସ୍ଥ ଥିବା ବେଳେ ଆଉ ଗୋଟିଏ ରକ୍ତ ପ୍ୟାକେଟ ଦିଆଯାଇଥିଲା। ରାତିରେ ସେ ମୃତ୍ୟୁବରଣ କରିଥିଲେ। ସେ ସୁସ୍ଥ ଥିବା ବେଳେ କିଭଳି ମୃତ୍ୟୁବରଣ କଲେ ତାହାର ତଦନ୍ତ କରାଯାଉଛି । ଚିକିତ୍ସା ଅବହେଳାରୁ ମୃତ୍ୟୁ ଅଭିଯୋଗକୁ ଅଧିକ୍ଷକ ଖଣ୍ଡନ କରିଛନ୍ତି।
