ଭୁବନେଶ୍ୱର,୧୬ା୩(ବ୍ୟୁରୋ): ଦୀର୍ଘ ବର୍ଷ ହେବ ବିଧାୟକ ଓ ପୂର୍ବତନ ବିଧାୟକଙ୍କ ଦରମା କିମ୍ବା ଅନ୍ୟାନ୍ୟ ଭତ୍ତା ବଢ଼ିନାହିଁ। ପେଟ୍ରୋଲ, ଡିଜେଲ ଦର ବଢ଼ିଲାଣି। ଅନ୍ୟାନ୍ୟ ଆନୁଷଙ୍ଗିକ ଦର ବୃଦ୍ଧି ହେଲାଣି। ଗାଡ଼ି ଚଲାଇବା, ଖର୍ଚ୍ଚ ତୁଲାଇବା କଷ୍ଟକର ହୋଇ ପଡ଼ିଲାଣି। ସକାଳ ହେଲେ ଲୋକଙ୍କ ପାଇଁ ଖର୍ଚ୍ଚ କରିବାକୁ ପଡୁଛି। ବାହାଘର, ଏକୋଇଶିଆ, ବ୍ରତଘର, ରାମଲୀଳା, ଗୋଟିପୁଅ ନାଚ, ଫୁଟ୍ବଲ, କ୍ରିକେଟ ଖେଳ ଆଦି ପାଇଁ ଲୋକଙ୍କୁ ଅର୍ଥ ଦେବାକୁ ପଡୁଛି। ସେ ଟଙ୍କା ଆଣିବୁ କେଉଁଠୁ। ଅନ୍ୟ ରାଜ୍ୟରେ ବିଧାୟକଙ୍କ ଦରମା ଓ ଅନ୍ୟାନ୍ୟ ଖର୍ଚ୍ଚ ବଢ଼ାଯାଉଛି। ଆମର ଦରମା ଓ ପେନ୍ସନ ତୁରନ୍ତ ବଢ଼ାଯାଉ। ଏ ସଂକ୍ରାନ୍ତ କମିଟି ରିପୋର୍ଟ ଦେଇ ସାରିଛି। ବିଧାନସଭାରେ ତୁରନ୍ତ ବିଲ୍ ଅଣାଯାଉ। ଦଳଗତ ନିର୍ବିିଶେଷରେ ବିଧାୟକମାନେ ବାଚସ୍ପତିଙ୍କ ନିକଟରେ ଏମିତି ଗୁହାରି କରିଛନ୍ତି।
ବୁଧବାର ଶୂନ୍ୟକାଳରେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି- ବିଧାୟକ, ପୂର୍ବତନ ବିଧାୟକଙ୍କ ଦରମା ଓ ପେନ୍ସନ ବଢ଼ାଇବାକୁ ବିଜେଡି ସଦସ୍ୟ ଅମର ଶତପଥୀଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଥିଲା। ଏହି କମିଟି ବିଭିନ୍ନ ରାଜ୍ୟ ଗସ୍ତ କରି ରିପୋର୍ଟ ଦେଇସାରିଛି। କମିଟି ରିପୋର୍ଟ ଦେବା ପରେ ମଧ୍ୟ କିଛି ଜଣାପଡୁନି। ସବୁ ବିଧାୟକଙ୍କର ଏକମତ। ବିଧାନସଭାରେ ଏ ନେଇ ବିଲ୍ ଅଣାଯାଉ ବୋଲି ନରସିଂହ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିଲେ। ବିଜେଡି ସଭ୍ୟ ଅମର ଶତପଥୀ, ପଦ୍ମନାଭ ବେହେରା, କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି, ସୁରେଶ କୁମାର ରାଉତରାୟ, ଭାଜପା ସଭ୍ୟ ମୋହନ ଚରଣ ମାଝି ପ୍ରମୁଖ ନରସିଂହ ଉଠାଇଥିବା ପ୍ରସ୍ତାବକୁ ସମର୍ଥନ କରିବା ସହ ତୁରନ୍ତ ବିଧାନସଭାରେ ବିଲ୍ ଆଣି ବିଧାୟକଙ୍କ ଦରମା ଓ ଅନ୍ୟାନ୍ୟ ଖର୍ଚ୍ଚ ବଢ଼ାଇବାକୁ ଦାବି କରିଛନ୍ତି। ବିଧାୟକମାନଙ୍କ ଉଦ୍ବେଗକୁ ଦେଖି ବାଚସ୍ପତି ବିକ୍ରମ କେଶରୀ ଆରୁଖ କହିଲେ, ବିଧାୟକ ଅମର ଶତପଥୀଙ୍କ ଅଧ୍ୟକ୍ଷତାରେ ଗଠିତ କମିଟି ରିପୋର୍ଟକୁ ସଂସଦୀୟ ବ୍ୟାପାର ବିଭାଗକୁ ପଠାଇ ଦିଆଯାଇଛି। ବିଭାଗ ଗୃହର ନେତାଙ୍କ ସହ ଏ ନେଇ ଆଲୋଚନା କରିବା ସହ ବିଧାନସଭାରେ ବିଲ୍ ଉପସ୍ଥାପନ କରିବାକୁ ବାଚସ୍ପତି ନିର୍ଦ୍ଦେଶ ଦେଇଛନ୍ତି।
