ଚେନ୍ନାଇ,୨୮।୧: ଅଷ୍ଟ୍ରେଲିଆରେ ଲଗାତାର ଦୁଇଟି ଟେଷ୍ଟ ସିରିଜ୍ ଜିତିବା ପରେ ପ୍ରଶଂସକମାନେ ଭାରତୀୟ କ୍ରିକେଟ ଟିମ୍ର ପ୍ରଶଂସାରେ ଶତମୁଖ। ଏହି ବିଜୟ ପଛରେ ଦିଗ୍ଗଜ ଖେଳାଳି ନୁହନ୍ତି ବରଂ ଯୁବ ଖେଳାଳିଙ୍କ ଶ୍ରେୟ ଅଧିକ ରହିଛି। ବିଶେଷଭାବେ ଶୁଭମନ ଗିଲ, ମହମ୍ମଦ ସିରାଜ, ନବଦୀପ ସାଇନି, ରିଷଭ ପନ୍ତ, ଶାର୍ଦ୍ଦୁଳ ଠାକୁର ଏବଂ ଓ୍ବାଶିଂଟନ ସୁନ୍ଦର ଆବଶ୍ୟକ ସମୟରେ ଉଲ୍ଲେଖନୀୟ ପ୍ରଦର୍ଶନ କରି ପ୍ରଶଂସାର ପାତ୍ର ପାଲଟିଛନ୍ତି।
୩୩ ବର୍ଷ ପରେ ଗାବାରେ ଖେଳାଯାଇଥିବା ଟେଷ୍ଟରେ ହାରିଥିଲା ଅଷ୍ଟ୍ରେଲିଆ। ଅନ୍ତିମ ଟେଷ୍ଟରେ ଡେବ୍ୟୁ କରୁଥିବା ସୁନ୍ଦର ଏବଂ ଶାର୍ଦ୍ଦୁଳ ଶତକୀୟ ଭାଗିଦାରୀ କରିଥିଲେ। ପରେ ପନ୍ତ ଦଳକୁ ଜିତାଇଥିଲେ। ତେବେ ଏହି ନିର୍ଣ୍ଣାୟକ ମୁକାବିଲାରେ ରବିଚନ୍ଦ୍ରନ ଅଶ୍ୱିନ ଆହତ ହୋଇଥିବା ଯୋଗୁ କୁଲଦୀପ ଯାଦବଙ୍କ ବଦଳରେ ସୁନ୍ଦରଙ୍କୁ ସୁଯୋଗ ମିଳିଥିଲା। ଏହାର ପୂର୍ଣ୍ଣ ଲାଭ ଉଠାଇଥିଲେ ସୁନ୍ଦର।
ନିକଟରେ ସୁନ୍ଦରଙ୍କୁ ନେଇ କାମଚଳା ଅଧିନାୟକ ଥିବା ଅଜିଙ୍କ୍ୟ ରାହାନେ କହିଛନ୍ତି, କୁଲଦୀପଙ୍କ ସ୍ଥାନରେ ସୁନ୍ଦରଙ୍କୁ ତାଙ୍କର ବ୍ୟାଟିଂ ପାଇଁ ଚୟନ କରାଯାଇଥିଲା। ୫ ବୋଲରଙ୍କୁ ନେଇ ଟିମ୍ ଇଣ୍ଡିଆ ଓହ୍ଲାଇବାକୁ ଚିନ୍ତା କରାଯାଇଥିଲା। ସୁନ୍ଦର ଏଥିପାଇଁ ଭଲ ବିକଳ୍ପ ଥିଲେ। ସେ ଜଣେ ଭଲ ବ୍ୟାଟ୍ସମ୍ୟାନ୍ ବୋଲି ନିଜକୁ ପ୍ରମାଣିତ ମଧ୍ୟ କରିଛନ୍ତି। ସେ ପ୍ରଥମ ମ୍ୟାଚ୍ରେ ୪ ଉଇକେଟ ନେବା ସହ ୮୪ ରନ୍ କରିଥିଲେ। ଷ୍ଟିଭ୍ ସ୍ମିଥ୍ଙ୍କ ଭଳି ଖେଳାଳିଙ୍କ ଶିକାର କରିଛନ୍ତି ସେ।
ସିରିଜ୍ ଜିତିବା ପରେ ଏନେଇ ଦୁଃଖ ପ୍ରକାଶ କରିଥିଲେ ରାହାନେ। ସିରିଜ୍ରେ ତାଙ୍କୁ ଖେଳିବାର ସୁଯୋଗ ମିଳି ନ ଥିବାରୁ ସେ କୁଲଦୀପଙ୍କୁ ‘ତୁମ ସମୟ ପୁଣି ଆସିବ’ ବୋଲି କହିଥିବା ପ୍ରକାଶ କରିଛନ୍ତି।
