ମିସ୍ ଇଣ୍ଡିଆ ପ୍ରତିଯୋଗୀରୁ ଆଇଏଏସ୍ ଅଫିସର ହେବାର ଯାତ୍ରା ସହଜ ନ ଥିଲା। ହେଲେ ଅସମ୍ଭବ ତ ବିଲକୁଲ୍ ନ ଥିଲା। ‘ବିଉଟି ଉଇଥ୍ ବ୍ରେନ୍’ର ଏଭଳି ଏକ ଉଦାହରଣ ପାଲଟିଛନ୍ତି ଐଶ୍ୱର୍ଯ୍ୟା ଶୋରେନ୍। ଦୃଢ଼ ମନୋବଳ ସାଙ୍ଗକୁ କଠିନ ପରିଶ୍ରମ ଦ୍ୱାରା ସେ ୟୁପିଏସ୍ସି ପରୀକ୍ଷାରେ ସଫଳତା ଲାଭ କରିଛନ୍ତି। ଫଳରେ ସେ ଜଣେ ମଡେଲରୁ ରୋଲମଡେଲ୍ ପାଲଟିଛନ୍ତି।
ନିକଟରେ ଏକ ସାକ୍ଷାତକାରରେ ଐଶ୍ୱର୍ଯ୍ୟା ନିଜ ବିଷୟରେ ଅନେକ କଥା କହିଛନ୍ତି। ଯାହାକି ଅନ୍ୟମାନଙ୍କ ପାଇଁ ପ୍ରେରଣା।
ଦ୍ୱାଦଶ ଶ୍ରେଣୀରେ ପଢ଼ୁଥିବା ବେଳେ ସେ ପ୍ରଶାସନିକ ସେବାରେ ଯୋଗଦେବାକୁ ନିଶ୍ଚିତ କରିଥିଲେ। କଲେଜ ସମୟରେ ସେ ପାଠପଢ଼ା ଛଡ଼ା ଅନ୍ୟ ଆକ୍ଟିଭିଟି ମଧ୍ୟ କରୁଥିଲେ। ସେତେବେଳେ ସେ ମିସ୍ ଇଣ୍ଡିଆ ପ୍ରତିଯୋଗିତାରେ ଭାଗ ନେଇଥିଲେ। ମା’ଙ୍କ ସ୍ବପ୍ନ ଥିଲା ତାଙ୍କୁ ସେହି ମଞ୍ଚରେ ଦେଖିବା ଲାଗି। ଶେଷକୁ ତାହା ହିଁ ହୋଇଥିଲା। ସେ ଫାଇନାଲିଷ୍ଟ ହୋଇଥିଲେ। ଏହାପରେ ତାଙ୍କୁ ବିଜ୍ଞାପନର ଅଫର ମିଳିଥିଲା। ମନିଷ ମାଲହୋତ୍ରା, ଋତୁ ବେରିଙ୍କଠାରୁ ଆରମ୍ଭ କରି ବଡ଼ ବଡ଼ ଡିଜାଇନର ତାଙ୍କ ର଼୍ୟାମ୍ପ ଶୋ’ରେ ଭାଗ ନେବାକୁ ଅନୁରୋଧ କରିଥିଲେ। ଏସବୁ ମଧ୍ୟରେ ସେ ପଢ଼ା ଛାଡ଼ି ନ ଥିଲେ। ମଡେଲିଂ ପ୍ରୋଜେକ୍ଟ ସାରିବା ପରେ ସେ ପ୍ରଶାସନିକ ସେବା ପାଇଁ ପଢ଼ାପଢ଼ି ଆରମ୍ଭ କରିଥିଲେ। ଶେଷରେ ସେ ସଫଳ ହୋଇଛନ୍ତି। ମଡେଲିଂ କରିବା ତାଙ୍କର ସଉକ ଥିଲା ସତ ହେଲେ ସ୍ବପ୍ନ ଥିଲା ଜଣେ ଆଇଏଏସ୍ ହେବା। ତାହା ଏବେ ପୂରଣ ହୋଇଛି। ଏବେ ସେ କାମ କରିବାକୁ ନେଇ ଉତ୍ସାହିତ ଅଛନ୍ତି। ମହିଳାଙ୍କ ଶିକ୍ଷା, ସ୍ବପ୍ନକୁ ପୂରଣ କରିବା ଦିଗରେ ସେ କାମ କରିବେ। ଏବେ କିନ୍ତୁ ବିଭିନ୍ନ ମହଲରେ ପ୍ରଶଂସା କରାଯାଉଥିବାକୁ ନେଇ ସେ ବେଶ୍ ଖୁସି ଥିବା ମଧ୍ୟ କହିଛନ୍ତି।
