ଉଦଳା,୧୩।୭(ସନ୍ତୋଷ କୁମାର ବାଛିନୀ)ନଡ଼ିଆ ଷଢ଼େଇରେ ତିଆରି ହୋଇଛି ପ୍ରବାଦ ପୁରୁଷ ବିଜୁବାବୁଙ୍କ ଡାକୋଟା ବିମାନ ଭଳି ଏକ ପ୍ରତିକୃତି। ଏହାକୁ ଯିଏ ତିଆରି କରିଛନ୍ତି ତାଙ୍କ ନଁା ମଧ୍ୟ ବିଜୁ। ବିଜୁ ଭାଇ ନାମରେ ପରିଚିତ ଶିଳ୍ପୀ ବିଜୟ କମିଳା ହେଉଛନ୍ତି ମୟୂରଭଞ୍ଜ ଜିଲା ଉଦଳା ଏନ୍ଏସି ଅନ୍ତର୍ଗତ ୭ନଂ. ୱାର୍ଡର ବାସିନ୍ଦା। ପେସାରେ ଜଣେ ଗାଡ଼ି ମେକାନିକ ହୋଇଥିଲେ ମଧ୍ୟ ନିଶାରେ ସେ କାରିଗର। କରୋନା ଜନିତ ଲକ୍ଡାଉନ ସମୟରେ ନଡ଼ିଆ ଷଢେଇରେ ସେ ବିଭିନ୍ନ ପ୍ରକାର ଘରକରଣା ଜିନିଷ ତିଆରି କରି ଚର୍ଚ୍ଚାକୁ ଆସିଥିଲେ। ତେବେ ବିଜୁ ବାବୁଙ୍କୁ ଭଲ ପାଉଥିବାରୁ ତାଙ୍କର ପ୍ରିୟ ଡାକୋଟା ବିମାନ ଷଢ଼େଇରେ ତିଆରି କରିଥିବା ସେ କହିଛନ୍ତି। ଅନୁମତି ମିଳିଲେ ଏହାକୁ ସେ ବିଜୁ ବାବୁଙ୍କ ପୁତ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଉପହାର ଦେବେ ବୋଲି ଆଗ୍ରହ ପ୍ରକାଶ କରିଛନ୍ତି। ଷଢେଇରେ ତିଆରି ହୋଇଥିବା ଏହି ଡାକୋଟାର ଲମ୍ବ ୩ ଫୁଟ ୬ ଇଞ୍ଚ୍। ବିଭିନ୍ନ ସ୍ଥାନରୁ ଷଢେଇ ସଂଗ୍ରହ କରି ତାକୁ କାଟି ଅଠା ଦ୍ୱାରା ଯୋଡ଼ି ତିଆରି କରିଛନ୍ତି ଡାକୋଟା ବିମାନ। ଏହା ତିଆରି କରିବାକୁ ଦୁଇ ମାସ ସମୟ ଲାଗିଥିବା କହିଛନ୍ତି ବିଜୟ। ଯେତେବେଳେ ସମୟ ପାଆନ୍ତି ସେତେବେଳେ ସେ ଏହି କାମ କରିଥାନ୍ତି ଏବଂ ପରିବାର ଲୋକଙ୍କ ପ୍ରେରଣା ପାଇଁ ଏହା ସମ୍ଭବ ହୋଇଛି ବୋଲି ବିଜୟ କହିଛନ୍ତି। ତେବେ ସରକାରୀ ପ୍ରୋତ୍ସାହନ ମିଳିଲେ ବିଜୟ ଆଗକୁ ବଢ଼ିପାରିବା ସହ ତାଲିମ କେନ୍ଦ୍ର ଆରମ୍ଭ କରି ନୂଆ ଶିଳ୍ପୀ ସୃଷ୍ଟି କରିପାରନ୍ତେ ବୋଲି ସ୍ଥାନୀୟ ବୁଦ୍ଧିଜୀବୀ ମତପ୍ରକାଶ କରିଛନ୍ତି।
