ନୂଆଦିଲ୍ଲୀ,୨୨।୧୧: ଦେଶରେ କରୋନା ରୋଗୀଙ୍କ ସଂଖ୍ୟା ହ୍ରାସ ପାଇବା ପରେ ଅନ୍ତର୍ଜାତୀୟ ଯାତ୍ରୀଙ୍କ ପାଇଁ ‘ଏୟାର ସୁବିଧା’ ଫର୍ମ ପୂରଣ ବାଧ୍ୟତାମୂଳକ ନ କରିବାକୁ ସରକାର ନିଷ୍ପତ୍ତି ନେଇଛନ୍ତି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଜାରି ବିଜ୍ଞପ୍ତି ଅନୁଯାୟୀ ଅନ୍ତର୍ଜାତୀୟ ଯାତ୍ରୀ ଆଗମନ ପାଇଁ ସଂଶୋଧିତ ନିର୍ଦ୍ଦେଶାବଳୀ ନଭେମ୍ବର ୨୨ ଅର୍ଥାତ୍ ଆଜିଠାରୁ କାର୍ଯ୍ୟକାରୀ ହେବ। ସରକାରଙ୍କ ଏହି ପଦକ୍ଷେପ ପରେ ଅନ୍ତର୍ଜାତୀୟ ଯାତ୍ରୀମାନେ ନିଶ୍ଚିତ ଭାବରେ କାଗଜପତ୍ରରୁ ଟିକେ ଆରାମ ପାଇଛନ୍ତି।
ଏହାପୂର୍ବରୁ ନିର୍ଦ୍ଦେଶାବଳୀ ଅନୁଯାୟୀ ବିଦେଶରୁ ଭାରତ ଆସୁଥିବା ଯାତ୍ରୀମାନଙ୍କୁ ସେମାନଙ୍କ କୋଭିଡ ଟିକାକରଣ ସ୍ଥିତି ନେଇ ଏକ ‘ଏୟାର ସୁବିଧା’ ଫର୍ମ ପୂରଣ କରିବାକୁ ପଡୁଥିଲା। ଏହି ଫର୍ମର ରେଜିଷ୍ଟ୍ରେସନ ନମ୍ବର ମିଳିବା ପରେ ହିଁ ଯାତ୍ରୀ ବିମାନ ବନ୍ଦରରୁ ବାହାରି ପାରୁଥିଲେ। କରୋନା ମହାମାରୀକୁ ଦୃଷ୍ଟିରେ ରଖି ଏହି ଫର୍ମ ଆରମ୍ଭ କରାଯାଇଥିଲା। ଏବେ କରୋନା ସଂଖ୍ୟା କମିଥିବାରୁ ସରକାର ଏହି ଫର୍ମ ପୂରଣ ବାଧ୍ୟତାମୂଳକ ନ କରିବାକୁ ନିଷ୍ପତ୍ତି ନେଇଛନ୍ତି। ଗତ ସପ୍ତାହରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ କହିଥିଲା ଯେ, ବିମାନ ଯାତ୍ରା ସମୟରେ ମାସ୍କ ବ୍ୟବହାର ବାଧ୍ୟତାମୂଳକ ନୁହେଁ, କିନ୍ତୁ ଯାତ୍ରୀମାନେ ଏହାକୁ ବ୍ୟବହାର କରିବା ଉଚିତ।
