ନୂଆଦିଲ୍ଲୀ,୧୭।୯: ଲକ୍ଡାଉନରେ ବିଦେଶରେ ଫସିଥିବା ଭାରତୀୟଙ୍କୁ ଫେରାଇ ଆଣିବା ଲାଗି କେନ୍ଦ୍ର ସରକାର ଆରମ୍ଭ କରିଥିବା ‘ବନ୍ଦେ ଭାରତ ମିଶନ’ରେ ଏୟାର ଇଣ୍ଡିଆ ବିମାନ ସେବା ଯୋଗାଣ କରିଥିଲା। ଏହାଦ୍ୱାରା ଏୟାର ଇଣ୍ଡିଆକୁ ଅଗଷ୍ଟ ୩୧ ସୁଦ୍ଧା ୨,୫୫୬ କୋଟି ଟଙ୍କାର ରାଜସ୍ବ ମିଳିଥିବା ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ ବୁଧବାର ସୂଚନା ଦେଇଛନ୍ତି। କରୋନା ମହାମାରୀ ପାଇଁ ଅନ୍ତର୍ଜାତୀୟ ସେବା ଯୋଗାଣ କରୁଥିବା ନିୟମିତ ଫ୍ଲାଇଟ ବାତିଲ କରାଯାଇଛି। ହେଲେ ଫସି ରହିଥିବା ଭାରତୀୟଙ୍କୁ ଫେରାଇ ଆଣିବା ଲାଗି କେନ୍ଦ୍ର ସରକାର ମେ ୬ରେ ବନ୍ଦେ ଭାରତ ଯୋଜନାରେ ସ୍ବତନ୍ତ୍ର ବିମାନ ସେବା ଆରମ୍ଭ କରିଥିଲେ। ଅଗଷ୍ଟ ୩୧ ସୁଦ୍ଧା ୧୧ ଲକ୍ଷ ଭାରତୀୟଙ୍କୁ ବିଦେଶରୁ ଫେରାଇ ଅଣାଯାଇଛି। ଏୟାର ଇଣ୍ଡିଆ ୪ ଲକ୍ଷ ଯାତ୍ରୀଙ୍କୁ ଏହି ସମୟରେ ସେବା ଯୋଗାଇ ଦେଇଛି। ସେହିଭଳି ଏୟାର ଇଣ୍ଡିଆ ଗ୍ରୁପ୍ ୧.୯ ଲକ୍ଷ ବିଦେଶୀ ନାଗରିକଙ୍କୁ ଭାରତରୁ ବିଦେଶକୁ ସେବା ଯୋଗାଇଦେଇଥିବା ପୁରୀ ସ୍ପଷ୍ଟ କରିଛନ୍ତି।
