ନୂଆଦିଲ୍ଲୀ,୨।୯: ଭାରତୀୟ ବାୟୁସେନା ପାଇଁ ଏକ ଗୁରୁତ୍ୱପୂର୍ଣ୍ଣ ଉନ୍ନତିର ସୂଚନା ମିଳିଛି। ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL) ପକ୍ଷରୁ ଚଳିତ ସେପ୍ଟେମ୍ବର ୨୦୨୫ ଶେଷ ସୁଦ୍ଧା ଦୁଇଟି ତେଜସ ମାର୍କ-୧ଏ (Tejas Mark-1A) ଯୁଦ୍ଧବିମାନ ଯୋଗାଇ ଦିଆଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟ ସୂତ୍ର ମଙ୍ଗଳବାର ନିଶ୍ଚିତ କରିଛି।
ତେଜସ ମାର୍କ-୧ଏ ଏକ ଅତ୍ୟାଧୁନିକ ଏକକ ଇଞ୍ଜିନ ବିଶିଷ୍ଟ ମଲ୍ଟି-ରୋଲ ଯୁଦ୍ଧବିମାନ, ଯାହା ବାୟୁ ପ୍ରତିରକ୍ଷା, ସାମୁଦ୍ରିକ ନିରୀକ୍ଷଣ ଓ ଆକ୍ରମଣ ଭୂମିକା ପାଇଁ ଡିଜାଇନ କରାଯାଇଛି। ଏହା ଭାରତୀୟ ବାୟୁସେନାର କାର୍ଯ୍ୟଦକ୍ଷତାକୁ ନୂଆ ଉଚ୍ଚତା ପ୍ରଦାନ କରିବ।
ପୋର୍ଟ ଅନୁଯାୟୀ, ମୋଦି ସରକାର ‘ମେକ୍ ଇନ ଇଣ୍ଡିଆ’କୁ ବଳ ଦେବା ପାଇଁ ୬୭,୦୦୦ କୋଟି ଟଙ୍କାରେ ୯୭ଟି ଅଧିକ ତେଜସ ମାର୍କ-୧ଏ ଯୁଦ୍ଧବିମାନ କ୍ରୟ ପାଇଁ ଅନୁମୋଦନ କରିଛନ୍ତି। ବର୍ତ୍ତମାନ HAL ପାଖରେ ୩୮ଟି ତେଜସ ବିମାନ ସେବାରେ ରହିଛି ଏବଂ ୮୦ଟି ନିର୍ମାଣାଧୀନ ଅଛି। ନୂଆ ଚୁକ୍ତି ଚୂଡ଼ାନ୍ତ ହେଲେ HALର ଅର୍ଡର ବୁକ୍ ୪ରୁ ୫ ବର୍ଷ ପାଇଁ ପୂର୍ଣ୍ଣ ରହିବ।
ତେଜସ କାର୍ଯ୍ୟକ୍ରମ ଜିଇ ଏରୋସ୍ପେସ୍ରୁ ଇଞ୍ଜିନ ଯୋଗାଣରେ ବିଳମ୍ବ ଭଳି କିଛି ଚ୍ୟାଲେଞ୍ଜର ସମ୍ମୁଖୀନ ହୋଇଛି। ତଥାପି, ପ୍ରତିରକ୍ଷା ସଚିବ ରାଜେଶ କୁମାର ସିଂହ ଆତ୍ମବିଶ୍ୱାସ ପ୍ରକାଶ କରିଛନ୍ତି ଯେ, HAL ଏହି ପ୍ଲାଟଫର୍ମକୁ ସମ୍ପୂର୍ଣ୍ଣ କରି ରାଡାର ଓ ଭାରତୀୟ ଅସ୍ତ୍ରଶସ୍ତ୍ର ସଂଯୋଗ କରି ତେଜସ ମାର୍କ-୧ଏକୁ ବାୟୁସେନା ପାଇଁ ଏକ ମୁଖ୍ୟ ସମ୍ପଦ କରିବ।
ବାୟୁସେନାର ବର୍ତ୍ତମାନ ୩୧ଟି ଅପରେସନାଲ ସ୍କ୍ୱାଡ୍ରନ ଥିବାବେଳେ ଅନୁମୋଦିତ ଶକ୍ତି ୪୨ଟି। ତେଜସ ମାର୍କ-୧ଏର ଅନ୍ତର୍ଭୁକ୍ତି ଏହି ଅନ୍ତରକୁ ପୂରଣ କରିବା ସହ ଭାରତୀୟ ବାୟୁସେନାର ପ୍ରତିରକ୍ଷା କ୍ଷମତାକୁ ଆହୁରି ଶକ୍ତିଶାଳୀ କରିବ।
