ଭୁବନେଶ୍ୱର,୨୦ା୧୧(ସତ୍ୟଜିତ ରାଉତ):ଜଣେ ଯୁବତୀଙ୍କୁ ପ୍ରେମ ଜାଲରେ ଫସାଇ ଶାରୀରିକ ସମ୍ପର୍କ ରଖିବା ପରେ ପ୍ରତାରଣା କରିବା ଅଭିଯୋଗରେ ବଡ଼ଗଡ଼ ଥାନା ପୋଲିସ ଏୟାରଫୋର୍ସର ଜଣେ ଯବାନଙ୍କୁ ବୁଧବାର ଗିରଫ କରିଛି। ଅଭିଯୁକ୍ତ ଜଣକ ହେଲେ ନୟାଗଡ଼ ଜିଲା ଇଟାମାଟି ଅଞ୍ଚଳର ଗୋଲକ ବିହାରୀ ଦୀକ୍ଷିତ। ସେ ଲଦାଖରେ ଏୟାରଫୋର୍ସର ଗ୍ରାଉଣ୍ଡ୍ ଷ୍ଟାଫ୍ ଭାବେ କାମ କରନ୍ତି। ଅଭିଯୁକ୍ତ ଗୋଲକଙ୍କୁ କୋର୍ଟଚାଲାଣ କରାଯାଇଥିଲା। ଜାମିନ ନାମଞ୍ଜୁର ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ବଡ଼ଗଡ଼ ଥାନା ଅଞ୍ଚଳରେ ରହୁଥିବା ପୀଡ଼ିତା ଯୁବତୀ ଜଣକ ୧୫ଦିନ ତଳେ ଏ ସମ୍ପର୍କରେ ଏତଲା ଦେଇଥିଲେ। ପୋଲିସ ବିଏନ୍ଏସ୍ର ବିଭିନ୍ନ ଦଫାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଗୋଲକ କିଛିବର୍ଷ ହେବ ପୀଡ଼ିତାଙ୍କ ସହ ପ୍ରେମ ସମ୍ପର୍କରେ ଥିଲେ। ତାଙ୍କୁ ବିବାହର ପ୍ରତିଶ୍ରୁତି ଦେଇ ବିଭିନ୍ନ ସମୟରେ ଶାରୀରିକ ସମ୍ପର୍କ ରଖିଥିଲେ। ଏପରିକି ପୀଡ଼ିତାଙ୍କୁ ଫସାଇ ସେ ଭୁବନେଶ୍ୱରର ବିଭିନ୍ନ ହୋଟେଲରେ ରାତି ବିତାଇଥିଲେ। ତେବେ କିଛିମାସ ତଳେ ପୀଡିତା ଜଣକ ବିବାହ କରିବାକୁ କହିବାରୁ ଗୋଲକ ଏହାକୁ ଏଡାଇ ଦେଇଥିଲେ। ପୀଡିତାଙ୍କ ସହ ସେ ସବୁ ସମ୍ପର୍କ ଛିନ୍ନ କରି ଦେଇଥିଲେ। ଗୋଲକ ଅନ୍ୟଜଣେ ଯୁବତୀଙ୍କୁ ପ୍ରେମ କରୁଥିବା ଜାଣିବା ପରେ ପୀଡିତ ଯୁବତୀ ଏନେଇ ଗୋଲକଙ୍କୁ ପଚାରିବାରୁ ବିବାଦ ଦେଖାଦେଇଥିଲା। ଗୋଲକ ତାଙ୍କୁ ଧମକ ଚମକ ଦେଇଥିଲେ। ଅନ୍ୟ ଉପାୟ ନ ପାଇ ଯୁବତୀ ଜଣକ ଥାନାର ଦ୍ୱାରସ୍ଥ ହୋଇଥିଲେ। ତେବେ ଗୋଲକ କିଛିଦିନ ହେବ ଛୁଟିରେ ଓଡ଼ିଶା ଆସିଥିଲେ। ମୋବାଇଲ ଲୋକେଶନ୍ ଟ୍ରାକିଂରୁ ସେ ଭୁବନେଶ୍ୱରରେ ଥିବା ଜଣାପଡିଥିଲା। ଏପରିକି ସେ ଲଦାଖ ଯିବାକୁ ପ୍ରସ୍ତୁତି ଚଳାଇଥିଲେ। ପୋଲିସ ଟିମ୍ ତାଙ୍କୁ ମାର୍କେଟ ବିଲ୍ଡିଂ ଅଞ୍ଚଳରୁ କାବୁ କରିଥିଲା।
Dharitri – Odisha’s No.1 Odia Daily
