ନୂଆଦିଲ୍ଲୀ,୧୮।୪ : ଭାରତୀୟ ବାୟୁସେନା ମୁଖ୍ୟ ମାର୍ଶଲ ଭି.ଆର ଚୌଧୁରୀ ୨୦୧୯ରେ ପାକିସ୍ତାନର ବାଲାକୋଟରେ କରାଯାଇଥିବା ଅପରେଶନ ନେଇ ଭାରତୀୟ ବାୟୁସେନାର ଶକ୍ତି ସମ୍ପର୍କରେ ସୂଚନା ପ୍ରଦାନ କରିଛନ୍ତି। ସେ କହିଛନ୍ତି , ବାଲାକୋଟ ଷ୍ଟ୍ରାଇକ ଦର୍ଶାଇଛି , ରାଜନୈତିକ ଇଚ୍ଛାଶକ୍ତି ଦୃଢ଼ ହେଲେ ଦେଶର ବାୟୁସେନାକୁ ନୋ ଓ୍ବାର ନୋ ପିସ୍ ପରିସ୍ଥିତିରେ ମଧ୍ୟ ପ୍ରଭାବଶାଳୀ ଭାବରେ ବ୍ୟବହାର କରାଯାଇପାରିବ। ପରମାଣୁ ଆକ୍ରମଣ ସମୟରେ ମଧ୍ୟ ସ୍ଥିତିକୁ ନିୟନ୍ତ୍ରଣରେ ରଖାଯାଇପାରିବ।
ସମ୍ପୂର୍ଣ୍ଣ ସଠିକ ଲକ୍ଷ୍ୟଭେଦ କ୍ଷମତା ଯୋଗୁ ଜରୁରୀକାଳୀନ ପରିସ୍ଥିତିରେ ବାୟୁସେନା ପ୍ରଥମ ବିକଳ୍ପ ପାଲଟିଥାଏ। ଚାଇନା ପାକିସ୍ଥାନର ନାମ ନ ନେଇ ସେ କହିଛନ୍ତି, ଆମର ବିରୋଧୀଙ୍କ ପ୍ରକୃତିକୁ ବିଚାରକୁ ନେଇ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଯେକୌଣସି ଆକ୍ରମଣର ଜବାବ ଦେବା ପାଇଁ ଆମର ଅନେକ ବିକଳ୍ପ ଅଛି। ’ଏରୋସ୍ପେସ ପାୱାର୍: ପିଭଟ ଟୁ ଫ୍ୟୁଚର ବ୍ୟାଟଲସ୍ପେସ ଅପରେଶନ୍ସ’ ଉପରେ ଏକ ସେମିନାରରେ ଭାଷଣ ଦେବାବେଳେ ଏୟାର ଚିଫ ମାର୍ଶଲ ଚୌଧରୀ ଏଭଳି କହିଛନ୍ତି।
ଭାରତର ସୁରକ୍ଷା ଚିନ୍ତାଧାରା ପର୍ଯ୍ୟାପ୍ତ ସାମରିକ ଶକ୍ତି ପ୍ରତିଷ୍ଠା କରିବା ଆବଶ୍ୟକ କରେ। ଏହା ସହିତ, ସୂଚନାର ପ୍ରାଧାନ୍ୟତା ନିଶ୍ଚିତ ହେବା ଉଚିତ। ଯାହାଦ୍ୱାରା ଯେତେବେଳେ ଆବଶ୍ୟକତା ଆସେ ସେତେବେଳେ ଆମର ଏକାଧିକ ପ୍ରତିକ୍ରିୟାଶୀଳ ବିକଳ୍ପ ରହିଥାଏ।
ଏରୋସ୍ପେସ ଶକ୍ତିର ବିଶେଷତା ନେତୃତ୍ୱକୁ ସଠିକ ରଣନୀତି ପ୍ରସ୍ତୁତ କରିବାର କ୍ଷମତା ଦେଇଥାଏ। ଏରୋସ୍ପେସ ଶକ୍ତି କ୍ଷେତ୍ରରେ ଭାରତର ଅଗ୍ରଗତିକୁ ଦେଖିଲେ ଭବିଷ୍ୟତ ଯୁଦ୍ଧ ସମୟରେ ଭାରତୀୟ ବାୟୁସେନା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ। ପରବର୍ତ୍ତୀ ପିଢ଼ିର ଯୁଦ୍ଧ ବିମାନ ଆସନ୍ତାକାଲିର ଯୁଦ୍ଧରେ ନିର୍ଣ୍ଣାୟକ ପ୍ରମାଣିତ ହେବ ବୋଲି ସେ କହିଛନ୍ତିି।
