ନୂଆଦିଲ୍ଲୀ,୧୪।୧୨ : ଦିଲ୍ଲୀର ଏମ୍ଦ ହସ୍ପିଟାଲରେ ସାଇବର ଆକ୍ରମଣରେ ଏକ ଏଫଆଇଆର୍ ପଞ୍ଜିକୃତ ହୋଇଥିଲା। କୁହାଯାଉଥିଲା ଯେ ଏହି ସାଇବର ଆକ୍ରମଣ ଚାଇନା ଦ୍ୱାରା କରାଯାଇଛି। ହସ୍ପିଟାଲର ୧୦୦ ସର୍ଭର ମଧ୍ୟରୁ ୪୦କୁ ଫିଜିକାଲ ଭାବେ ହ୍ୟାକ କରାଯାଇଥିଲା। ଅନ୍ୟ ୬୦କୁ ଭର୍ଚୁଆଲ ଭାବେ ହ୍ୟାକ କରାଯାଇଥିଲା। ପାଞ୍ଚଟି ସର୍ଭରର ତଥ୍ୟକୁ ସଫଳତାର ସହ ହ୍ୟାକରମାନଙ୍କଠାରୁ ଉଦ୍ଧାର କରାଯାଇଛି। ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ବୁଧବାର ଏହି ସୂଚନା ଦେଇଛି।
ନଭେମ୍ବର ୨୫ ରେ, ଦିଲ୍ଲୀ ପୋଲିସର ଇଣ୍ଟେଲିଜେନ୍ସ ଫ୍ୟୁଜନ ଆଣ୍ଡ ଷ୍ଟ୍ରାଟେଜିକ ଅପରେଶନ୍ସ (ଆଇଏଫଏସଏ) ୟୁନିଟ ଦ୍ୱାରା ଚୋରା ଚାଲାଣ ଏବଂ ସାଇବର ଆତଙ୍କବାଦ ମାମଲା ପଞ୍ଜିକୃତ ହୋଇଥିଲା। ନ୍ୟାଶନାଲ ଇନଭେଷ୍ଟିଗେଶନ ଏଜେନ୍ସି (ଏନଆଇଏ) ବର୍ତ୍ତମାନ ଟାର୍ଗେଟ ରେନ୍ସମୱେୟାର ଆକ୍ରମଣର ଯାଞ୍ଚ କରୁଛି। ଏନଆଇଏ ସହିତ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଏବଂ ଦିଲ୍ଲୀ ସାଇବର କ୍ରାଇମ ସେଲ, ଇଣ୍ଡିଆନ ସାଇବର କ୍ରାଇମ ସମନ୍ବୟ, ଇଣ୍ଟେଲିଜେନ୍ସ ବ୍ୟୁରୋ, ସେଣ୍ଟ୍ରାଲ ଇନଭେଷ୍ଟିଗେଶନ ବ୍ୟୁରୋ (ସିବିଆଇ) ମଧ୍ୟ ସାଇବର ଆକ୍ରମଣର ଯାଞ୍ଚ କରୁଛନ୍ତି।
ଦିଲ୍ଲୀ ଏମ୍ସ ପ୍ରଥମେ ୨୩ ନଭେମ୍ବରରେ ଏହାର ସର୍ଭର ଖରାପ ଥିବା ରିପୋର୍ଟ କରିଥିଲା। ସର୍ଭର ରକ୍ଷଣାବେକ୍ଷଣ ପାଇଁ ପୋଷ୍ଟ କରାଯାଇଥିବା ଦୁଇ ବିଶ୍ଳେଷକ ମଧ୍ୟ ସାଇବର ସୁରକ୍ଷା ଉଲ୍ଲଂଘନ ଅଭିଯୋଗରେ ନିଲମ୍ବିତ ହୋଇଛନ୍ତି। ଏଆଇଏମଏସ ଅଧିକାରୀମାନେ ଏକ ବିବୃତ୍ତିରେ କହିଛନ୍ତି ଯେ ଇ-ହସ୍ପିଟାଲର ତଥ୍ୟ ପୁନଃ ସ୍ଥାପିତ ହୋଇଛି। ସେବାଗୁଡିକ ପୁନଃ ସ୍ଥାପିତ ହେବା ପୂର୍ବରୁ ନେଟୱାର୍କ ସଫା କରାଯାଉଛି । ଡାକ୍ତରଖାନା ସେବା ପାଇଁ ତଥ୍ୟର ପରିମାଣ ଏବଂ ବହୁ ସଂଖ୍ୟକ ସର୍ଭର / କମ୍ପ୍ୟୁଟର ଯୋଗୁଁ ଏହି ପ୍ରକ୍ରିୟା କିଛି ସମୟ ନେଉଛି। ସାଇବର ସୁରକ୍ଷା ପାଇଁ ପଦକ୍ଷେପ ମଧ୍ୟ ନିଆଯାଉଛି।
