ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ବର୍ତ୍ତମାନ ପ୍ରାୟ ସବୁ କ୍ଷେତ୍ରରେ ଏହାର କାୟା ବିସ୍ତାର କରିବାରେ ଲାଗିଛି। ମଣିଷ ତୁଳନାରେ କମ୍ ଭୁଲ୍, ଅଳ୍ପ ସମୟରେ ଅଧିକ କାମ ସହ ୨୪ ଘଣ୍ଟା ଉପଲବ୍ଧ ହୋଇପାରୁଥିବାରୁ ଏହା ସବୁଠି ଆଦୃତ ହେବାରେ ଲାଗିଛି। ହେଲେ ଆପଣ କେବେ ଭାବିଛନ୍ତି କି, ଭବିଷ୍ୟବାଣୀ ଦେବା ଲାଗି ବି ଏଆଇର ବ୍ୟବହାର କରାଯାଇପାରେ। ହେଲେ ଏହା ସମ୍ପୂର୍ଣ୍ଣ ସତ। ଜାଣିବା ସେ ସମ୍ପର୍କରେ…
ବର୍ତ୍ତମାନ ଅଧିକାଂଶ କ୍ଷେତ୍ରରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ବ୍ୟବହାର କରାଯାଉଛି। ତେବେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ବର୍ତ୍ତମାନ ଏଆଇ ଭୂକମ୍ପ ଭଳି ପ୍ରାକୃତିକ ବିପର୍ଯ୍ୟୟ ସମ୍ପର୍କରେ ମଧ୍ୟ ଭବିଷ୍ୟବାଣୀ ଦେଇପାରିବ। ଏକ ଗବେଷଣା ରିପୋର୍ଟ ମୁତାବକ ଭୂକମ୍ପ ସମ୍ପର୍କରେ ଏଆଇ ଏକ ସପ୍ତାହ ପୂର୍ବରୁ ସୂଚନା ଦେଇପାରୁଛି, ଯାହାକି ପ୍ରାୟ ୭୦ ପ୍ରତିଶତ ଠିକ୍ ମଧ୍ୟ ରହୁଛି।
ଅଷ୍ଟିନ୍ସ୍ଥିତ ଟେକ୍ସାସ୍ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏକ ଏଭଳି ଏଆଇ ପ୍ରସ୍ତୁତ କରିଛନ୍ତି, ଯାହା ଠିକ୍ ସମୟରେ ଭୂକମ୍ପ ସମ୍ପର୍କରେ ସୂଚନା ଦେବା ଲାଗି ତାଲିମପ୍ରାପ୍ତ। ତାଲିମ ପୂର୍ବରୁ ଏହି ଏଆଇକୁ ପୂର୍ବରୁ ହୋଇଥିବା କେତୋଟି ଭୂକମ୍ପ ଡାଟା ପ୍ରଦାନ କରାଯାଇଥିଲା। ୭ ମାସ ପରୀକ୍ଷଣ କରାଯିବା ସମୟରେ ଦେଖାଯାଇଥିଲା ଯେ, ୨୦୦ ମାଇଲ ଦୂରତା ମଧ୍ୟରେ ହେବାକୁ ଥିବା ୧୪ଟି ଭୂକମ୍ପ ବିଷୟରେ ଏହି ଏଆଇ ସଠିକ ସୂଚନା ଏକ ସପ୍ତାହ ପୂର୍ବରୁ ସୂଚନା ଦେଇଥିଲା। ଯଦିଓ ଏହା ବ୍ୟତୀତ ଗୋଟିଏ ଭୂକମ୍ପ ବିଷୟରେ ତାହା ନ ଜାଣିପାରିବା ବେଳେ ଅନ୍ୟ ଆଠଟି ବିଷୟରେ ଭୁଲ ତଥ୍ୟ ଦେଇଥିଲା। ତଥାପି ଏହି ଏଆଇ ପ୍ରାୟ ୭୦ ପ୍ରତିଶତ ଠିକ୍ ତଥ୍ୟ ଦେଇ ପାରୁଥିବାରୁ ଭବିଷ୍ୟତରେ ଏହାଦ୍ୱାରା ଭୂକମ୍ପ ଟ୍ରାକିଂ କରିହେବା ସହ ଏହାଯୋଗୁ ହେଉଥିବା କ୍ଷୟ କ୍ଷତିକୁ କିଛି ମାତ୍ରାରେ ରୋକାଯାଇପାରିବ।
