ଭୁବନେଶ୍ୱର, ୬।୪(ତପନ ସ୍ବାଇଁ): ଓଡ଼ିଶାର ପ୍ରତିଭାସମ୍ପନ୍ନ ଖେଳାଳି ଆହାନଙ୍କ ଚମକ ଟେନିସ କୋର୍ଟରେ ଅବ୍ୟାହତ ରହିଛି। କଳିଙ୍ଗ ଷ୍ଟାଡିୟମ ଟେନିସ କମ୍ପ୍ଲେକ୍ସରେ ଶୁକ୍ରବାର ଶେଷ ହୋଇଥିବା ଏଆଇଟିଏ-ଓଟିଏ ସୁପର ସିରିଜ (ଏସ୍ଏସ୍) ଟେନିସ ଟୁର୍ନାମେଣ୍ଟର ୧୮ ବର୍ଷରୁ କମ୍ ବାଳିକା ବର୍ଗରେ ସେ ଉଭୟ ସିଙ୍ଗଲ୍ସ ଓ ଡବଲ୍ସରେ ଚାମ୍ପିୟନ ହୋଇଛନ୍ତି। ସିଙ୍ଗଲ୍ସ ଫାଇନାଲରେ ଆହାନ ପଶ୍ଚିମବଙ୍ଗର ରିତୁଜା ସାହାଙ୍କୁ ସିଧାସଳଖ ୬-୦, ୬-୦ ସେଟ୍ରେ ପରାସ୍ତ କରିଛନ୍ତି। ସେହିପରି ପଶ୍ଚିମବଙ୍ଗର ଆକାଂକ୍ଷା ଘୋଷଙ୍କୁ ପାର୍ଟନର କରି ଡବଲ୍ସ ଖେଳିଥିବା ଆହାନ ଫାଇନାଲରେ ରିତୁଜା ଓ ଆନ୍ଧ୍ର ପ୍ରଦେଶର ଜୋଶିତା ଗୋଲିଙ୍କୁ ୬-୨, ୬-୨ ସେଟ୍ରେ ହରାଇ ଦେଇଛନ୍ତି। ଆହାନ ହେଉଛନ୍ତି ଏସ୍ ବେସ୍ ଟେନିସ ଏକାଡେମୀରେ ରାଜ୍ୟର ପ୍ରତିଷ୍ଠିତ କୋଚ୍ ଅଜୟ ନିଶଙ୍କଙ୍କଠାରୁ ପ୍ରଶିକ୍ଷଣପ୍ରାପ୍ତ। ପ୍ରତିଯୋଗିତାର ବାଳକ ବିଭାଗ ସିଙ୍ଗଲ୍ସରେ କର୍ନାଟକର ଏମ୍. ଦିଗନ୍ତ ଏବଂ ଡବଲ୍ସରେ ମହାରାଷ୍ଟ୍ରର ତୋମାର ଦିଗନ୍ତ ସିଂ ଓ ସାହା ଡ୍ରିକ୍ ଯୋଡ଼ି ଚାମ୍ପିୟନ ହୋଇଛନ୍ତି।
