ଭଞ୍ଜନଗର,୨୫।୨(ଡି.ଏନ.ଏ): ଭଞ୍ଜନଗର ଉତ୍ତର ଘୁମୁସର ବନଖଣ୍ଡରେ ଜାଇକା ପ୍ରକଳ୍ପ ମାଧ୍ୟମରେ ଚାଲିଥିବା ବିଭିନ୍ନ ଯୋଜନା ଉପରେ ଶୁକ୍ରବାର ଲାଲସିଂ ନର୍ସରୀ ପରିସରରେ ସମୀକ୍ଷା ହୋଇଥିଲା । ଏଥିରେ ଡିଏଫଓ ସୁଦର୍ଶନ ବେହେରା ଅଧ୍ୟକ୍ଷତା କରି ଆଗାମୀ ଆର୍ଥତ୍କ ବର୍ଷରେ ୧୦୦ଟି ବନ ସୁରକ୍ଷା ସମିତି (ଭିଏସ୍ଏସ୍)ର ବିକାଶ କରାଯିବ ବୋଲି କହିଥିଲେ। ଲୋକେ କୌଣସି କାରଣରୁ ବାହାରକୁ କାମ କରିବାକୁ ଚାଲିଯାଉଛନ୍ତି। ସେମାନଙ୍କୁ ଗ୍ରାମକୁ ଫେରାଇ ଆଣି ଲୋକଙ୍କୁ ବିଭିନ୍ନ ଯୋଜନାରେ ସାମିଲ କରାଯିବ। ଲୋକଙ୍କ ଅବ୍ୟବହୃତ ଜମିରେ ଚଳିତ ବର୍ଷ ୩୫୦ ହେକ୍ଟର ଜମିରେ କୃଷି ଭିତ୍ତିକ ଜଙ୍ଗଲ ସୃଷ୍ଟି କରାଯିବ। ଏନେଇ ବିଭାଗ ପକ୍ଷରୁ ଲୋକଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦିଆଯିବ। ଏହାଦ୍ୱାରା ଲୋକଙ୍କ ଆର୍ଥତ୍କ ମାନଦଣ୍ଡରେ ଉନ୍ନତି ଆସିବା ସହ ପରିବେଶ ସୁରକ୍ଷିତ ରହିବ। କୃଷି ଭିତ୍ତିକ ଜଙ୍ଗଲ ପାଇଁ ଆବଶ୍ୟକ ଚାରା ନର୍ସରୀଗୁଡ଼ିକରେ ପ୍ରସ୍ତୁତ କରି ରଖିବାକୁ ପଡ଼ିବ । ହାତୀ କରିଡ଼ର ଅଞ୍ଚଳରେ ଯେଉଁ ଗ୍ରାମକୁ ବିଦ୍ୟୁତ୍ ସେବାନାହିଁ ସେଠାରେ ସୋଲାର ଲାଇଟ ବ୍ୟବସ୍ଥା କରାଯିବ। ନଚେତ କେବୁଲ ମାଧ୍ୟମରେ ବିଦ୍ୟୁତ୍ ଯୋଗାଣ ହେବ। ସମସ୍ତ ଭିଏସ୍ଏସ୍ ଗୁଡ଼ିକରେ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ସଫଳତାର ସହ କାର୍ଯ୍ୟକାରୀ କରିବାକୁ ପଡ଼ିବ । ଚେକ୍ ଡ୍ୟାମ୍ ଅଧିକରୁ ଅଧିକ କରାଯିବ। ଛୋଟଛୋଟ ଗଁା ଗୁଡ଼ିକର ବିକାଶ ନେଇ ଯୋଜନା ପ୍ରସ୍ତୁତ କରାଯିବ । ଆଗାମୀ ବୈଠକରେ ପ୍ରତ୍ୟେକ ରେଞ୍ଜ୍ରୁ ଦୁଇଟି ଭିଏସ୍ଏସ୍ରୁ ୨ଜଣ କର୍ମକର୍ତ୍ତାଙ୍କୁ ବୈଠକକୁ ଡ଼କାଯିବା ନେଇ ଆଲୋଚନା ହୋଇଥିଲା। ପ୍ରକୃତ ହିତାଧିକାରୀଙ୍କୁ ଜାଇକା ସହାୟତାରେ ଋଣ ଦିଆଯାଉ ଏବଂ ଯେଉଁମାନେ ଏକାଧିତ୍କ ସଂସ୍ଥାରୁ ଋଣ ନେଉଛନ୍ତି ସେମାନଙ୍କୁ ଯୋଜନାରୁ ବାଦ୍ ଦିଆଯାଉ ବୋଲି ଡ଼ିଏଫଓ ବେହେରା ମତ ଦେଇଥିଲେ। ବୈଠକରେ ଜଗନ୍ନାଥପ୍ରସାଦ ରେଞ୍ଜର ଜଣେ କର୍ମଚାରୀ କହିଥିଲେ ଯେ ବନ୍ତା ଅଞ୍ଚଳର ୧୦ରୁ ଊର୍ଦ୍ଧ୍ୱ ଗ୍ରାମରେ ମୋବାଇଲ ଫୋନ୍ ସେବା ନାହିଁ। ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଏନେଇ କିଛିମାସ ପୂର୍ବେ ଚିଠି ଲେଖାଯାଇଥିଲା। ଇତିମଧ୍ୟରେ ବିଭାଗ ପକ୍ଷରୁ ସମ୍ପୃକ୍ତ ଅଞ୍ଚଳରେ ଦୁଇଟି ମୋବାଇଲ ଟାୱାର ସ୍ଥାପନ ପାଇଁ ପଦକ୍ଷେପ ନିଆଯାଇଛି । ଆଗାମୀ ଦିନରେ ଲୋକେ ତାହାର ସୁଫଳ ପାଇବେ । ବନଖଣ୍ଡର ଅନ୍ୟ ଅଞ୍ଚଳରେ ଯେଉଁଠି ମୋବାଇଲ ଫୋନ୍ ସେବାନାହିଁ ସେଠାରେ ମୋବାଇଲ ଟାୱାର ସ୍ଥାପନ ନେଇ କେନ୍ଦ୍ରମନ୍ତ୍ରୀ ଏବଂ ଜିଲା ପ୍ରଶାସନର ସହଯୋଗ ଲୋଡ଼ାଯିବ ବୋଲି ଜଣେ ଅଧିକାରୀ କହିଥିଲେ। ବୈଠକରେ ଏସିଏଫ୍ ବିକ୍ରମ ଦେବ ପଟ୍ଟନାୟକ, କେନ୍ଦ୍ରୀୟ ବନାଞ୍ଚଳ ଅଧିକାରୀ କୁମର ବେହେରା, ମୁଜାଗଡ଼ ରେଞ୍ଜର ବିମ୍ବାଧର ସାହୁ, ଜଗନ୍ନାଥପ୍ରସାଦ ରେଞ୍ଜର ଉମାକାନ୍ତ ଦାସ, ଗାଲେରୀ ରେଞ୍ଜର ଶିବରାମ ନାୟକ ପ୍ରମୁଖ ଯୋଗଦେଇଥିଲେ ।