ଥିରୁଭାନନ୍ତପୁରମ, ୧୮।୭- ସାଧାରଣତଃ ୧୭୦୦ କିମି ରାସ୍ତା ଅତିକ୍ରମ କରିବା ଲାଗି ଗୋଟିଏ ଟ୍ରକ୍ ୫ରୁ ୭ ଦିନ ସମୟ ନେଇଥାଏ। କିନ୍ତୁ ଶୁଣିଲେ ବିଶ୍ୱାସ ଲାଗିବ ନାହିିଁ ଯେ ଏହି ଦୂରତାକୁ ଅତିକ୍ରମ କରିବାକୁ ଗୋଟିଏ ଟ୍ରକକୁ ୧୦ ମାସ ସମୟ ଲାଗିଥିଲା। ଶେଷରେ ମହାରାଷ୍ଟ୍ରର ନାସିକରୁ ବାହାରିଥିବା ଏହି ଟ୍ରକ୍ଟି କେରଳର ଥିରୁଭାନନ୍ତପୁମରରେ ପହଞ୍ଚିଛି। ଘଟଣାରୁ ଜଣାପଡ଼ିଛି ଯେ ୭୪ ଟାୟାର ବିଶିଷ୍ଟ ଏହି ଟ୍ରକ୍ ୧୦ ମାସ ତଳେ ଏକ ୭୦ ଟନ୍ ମେସିନ ଏରେସ୍ପେସ୍ ଅଟୋକ୍ଲେଭ ନେଇ ମହାରାଷ୍ଟ୍ରର ନାସିକରୁ ଗତ ବର୍ଷ ସେପ୍ଟେମ୍ବର ୧ରେ ବାହାରିଥିଲା। ଏହି ମେସିନର ଉଚ୍ଚତା ୭.୫ ମିଟର ଓ ମୋଟେଇ ୭ ମିଟର ରହିଥିଲା। କେରଳ ରାଜଧାନୀ ଥିରୁଭାନନ୍ତପୁମରସ୍ଥିତ ବିକ୍ରମ ସାରାବାଇ ସ୍ପେସ୍ ସେଣ୍ଟର ଏହାର ଲକ୍ଷ୍ୟ ସ୍ଥଳ ଥିଲା। ଯାହାର ମୋଟ୍ ଦୂରତା ୧୭୦୦ କିମି ରହିଥିଲା। ତେବେ ଏହି ବିଶାଳ ଟ୍ରକ୍ଟି ଯେତେବେଳେ ୫ଟି ରାଜ୍ୟର ପ୍ରତ୍ୟେକ ଜିଲା ଦେଇ ଯାତ୍ରା କରୁଥିଲା ସେହି ସମୟରେ ଅନ୍ୟକୌଣସି ଗାଡ଼ିକୁ ରାସ୍ତାରେ ଯିବା ପାଇଁ ଅନୁମତି ଦିଆଯାଉ ନ ଥିଲା। ଏପରିକି ସୁରକ୍ଷା ପାଇଁ ପୋଲିସ ଗାଡ଼ି ସର୍ବଦା ମୁତୟନ ରହୁଥିଲା। କେତେକ ସ୍ଥାନରେ ଗାତ ଥିବାରୁ ପ୍ରଥମେ ତାହାକୁ ପୂରଣ କରାଯାଉଥିଲା। ସେହିଭଳି ଏହି ଟ୍ରକ ଯିବାବେଳେ ଯେପରି କିଛି ଅସୁବିଧା ନ ହେବ ସେଥିଲାଗି ରାସ୍ତାରେ ଅନେକ ବଡ଼ ବଡ଼ ଗଛ କଟାଯାଇଥିଲା, ବିଦ୍ୟୁତ ଖୁଣ୍ଟକୁ ହଟାଯାଉଥିଲା। ଏହିଭଳି ଭାବେ ଟ୍ରକଟି ଶେଷରେ ଏହାର ଗନ୍ତବ୍ୟସ୍ଥଳରେ ପହଞ୍ଚିଥିଲା। ଏହି ଗାଡ଼ିର ସୁବାଷ ନାମକ ଜଣେ କର୍ମଚାରୀ କହିଛନ୍ତି, ‘ଲକ୍ ଡାଉନ୍ ଲାଗି ତାଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ଏହି କାରଣ ଲାଗି ଆନ୍ଧ୍ର ପ୍ରଦେଶରେ ଗୋଟିଏ ମାସ ଟ୍ରକ୍କୁ ଅଟକାଇ ରଖାଯାଇଥିଲା। ପରେ ଚୁକ୍ତି କରିଥିବା ଏଜେନ୍ସିର ହସ୍ତକ୍ଷେପ ପରେ ବହୁକଷ୍ଟରେ ଟ୍ରକଟି ପୁନଃ ଏହାର ଯାତ୍ରା କରିଥିଲା। ସେହିଭଳି ଟ୍ରକ ଯିବା ଲାଗି କେତେକେ ସ୍ଥାନରେ ରାସ୍ତା ଚଉଡ଼ା କରାଯାଇ ଗଛ କଟାଯାଇଥିଲା। ଏପରିକି ୨ଟି ପୋଲ ଅତିକ୍ରମ କରିବା ସମୟରେ ପୋଲର ସୁରକ୍ଷା ଦୃଷ୍ଟିରୁ ଲୁହାର ସ୍ବତନ୍ତ୍ର ଗ୍ରିଡର ରଖାଯାଇଥିଲା’ ବୋଲି ସୁବାଷ ପ୍ରକାଶ କରିଛନ୍ତି।
