ନୂଆଦିଲ୍ଲୀ,୧୮।୩: ଆଧାର ଏବଂ ଭୋଟର ପରିଚୟପତ୍ର (EPIC)କୁ ଲିଙ୍କ କରିବାର ପଥ ପରିଷ୍କାର ହୋଇଯାଇଛି। ମଙ୍ଗଳବାର ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକରେ ଦେଶର ନିର୍ବାଚନ କମିଶନ ଏହି ଦୁଇଟିକୁ ସଂଯୋଗ କରିବାକୁ ଅନୁମତି ଦେଇଛନ୍ତି। ଏ ସମ୍ପର୍କରେ ଏକ ବିବୃତ୍ତିରେ ନିର୍ବାଚନ କମିଶନ କହିଛନ୍ତି ଯେ ସମ୍ବିଧାନର ଧାରା ୩୨୬ ଏବଂ ଜନପ୍ରତିନିଧି ଆଇନର ଧାରା ୨୩(୪), ୨୩(୫) ଏବଂ ୨୩(୬) ଅନୁଯାୟୀ EPICକୁ ଆଧାର ସହିତ ଲିଙ୍କ କରାଯିବ। ତେବେ ପୂର୍ବରୁ ସରକାର ଆଧାର ସହିତ ପାନ କାର୍ଡକୁ ଲିଙ୍କ କରିବାକୁ ନିଷ୍ପତ୍ତି ନେଇଥିଲେ।
ବିବୃତ୍ତିରେ କୁହାଯାଇଛି ଯେ ନିର୍ବାଚନ କମିଶନ ଜନପ୍ରତିନିଧିତ୍ୱ ଆଇନ, ୧୯୫୦ର ଧାରା ୩୨୬ ଏବଂ ସୁପ୍ରିମକୋର୍ଟଙ୍କ ପ୍ରାସଙ୍ଗିକ ନିଷ୍ପତ୍ତି ଅନୁଯାୟୀ EPICକୁ ଆଧାର ସହିତ ଲିଙ୍କ କରିବା ପାଇଁ ପଦକ୍ଷେପ ନେବେ। ମଙ୍ଗଳବାର ନିର୍ବାଚନ ସଦନରେ କେନ୍ଦ୍ର ଗୃହ ସଚିବ-ସଚିବ, ବିଧାନସଭା ବିଭାଗ, ସଚିବ MeitY ଏବଂ CEO UIDAI ଏବଂ ECI ର ବୈଷୟିକ ବିଶେଷଜ୍ଞମାନଙ୍କ ସହିତ CEC ଜ୍ଞାନେଶ କୁମାରଙ୍କ ନେତୃତ୍ୱରେ EC ଡକ୍ଟର ସୁଖବୀର ସିଂହ ସାନ୍ଧୁ ଏବଂ ଡକ୍ଟର ବିବେକ ଜୋଶୀଙ୍କ ବୈଠକ ଅନୁଷ୍ଠିତ ହୋଇଥିଲା।
ଭାରତୀୟ ସମ୍ବିଧାନର ଧାରା ୩୨୬ ଅନୁଯାୟୀ, ଭୋଟ ଦେବାର ଅଧିକାର କେବଳ ଭାରତର ନାଗରିକଙ୍କୁ ଦିଆଯାଇପାରିବ, ଆଧାର କାର୍ଡ କେବଳ ଜଣେ ବ୍ୟକ୍ତିଙ୍କ ପରିଚୟ ସ୍ଥାପନ କରେ। ତେଣୁ, ସମ୍ବିଧାନର ଧାରା ୩୨୬, ଜନପ୍ରତିନିଧିତ୍ୱ ଆଇନ, ୧୯୫୦ ର ଧାରା ୨୩(୪), ୨୩(୫) ଏବଂ ୨୩(୬) ଏବଂ WP (ସିଭିଲ) ନମ୍ବର ୧୭୭/୨୦୨୩ ରେ ସୁପ୍ରିମକୋର୍ଟଙ୍କ ନିଷ୍ପତ୍ତି ଅନୁଯାୟୀ EPIC କୁ ଆଧାର ସହିତ ସଂଯୋଗ କରାଯିବା ନିଷ୍ପତ୍ତି ନିଆଯାଇଛି। ଏବେ UIDAI ଏବଂ ECIର ବୈଷୟିକ ବିଶେଷଜ୍ଞଙ୍କ ମଧ୍ୟରେ ବୈଷୟିକ ପରାମର୍ଶ ଖୁବ ଶୀଘ୍ର ଆରମ୍ଭ ହେବ।
ତେବେ ନିକଟରେ ନିର୍ବାଚନ କମିଶନ ନିଷ୍ପତ୍ତି ନେଇଥିଲେ ଯେ ଆଗାମୀ ତିନି ମାସ ମଧ୍ୟରେ ଡୁପ୍ଲିକେଟ ନମ୍ବର ଥିବା ଭୋଟର ପରିଚୟପତ୍ରଗୁଡ଼ିକୁ ନୂତନ EPIC ନମ୍ବର ପ୍ରଦାନ କରାଯିବ। ର୍ନିବାଚନ କମିଶନ କହିଛନ୍ତି ଯେ ଡୁପ୍ଲିକେଟ ନମ୍ବର ରଖିବାର ଅର୍ଥ ନକଲି ଭୋଟର ନୁହେଁ। ଆଧାରକୁ EPIC ସହିତ ଲିଙ୍କ କରିବା ପଛରେ ମୁଖ୍ୟ ଉଦ୍ଦେଶ୍ୟ ହେଉଛି ଭୋଟର ତାଲିକାରେ ଥିବା ତ୍ରୁଟିକୁ ଦୂର କରିବା। ଏହି ପଦକ୍ଷେପ ଦ୍ୱାରା ନକଲି ଭୋଟରଙ୍କୁ ଚିହ୍ନଟ କରିବାରେ ସହଜ ହେବ।
ଭୋଟର ପରିଚୟପତ୍ର ସହିତ ଆଧାରକୁ ଲିଙ୍କ କରିବା ପଛରେ ଆଉ ଏକ କାରଣ ହେଉଛି ଏହା ନକଲି ଭୋଟିଂକୁ ରୋକିବାରେ ସକ୍ଷମ। ଏହି ବ୍ୟବସ୍ଥା କାର୍ଯ୍ୟକାରୀ ହେବା ପରେ, ଜଣେ ବ୍ୟକ୍ତି ଏକାଧିକ ସ୍ଥାନରେ ଭୋଟ ଦେବାର ସମ୍ଭାବନା ଦୂର ହୋଇଯିବ ଏବଂ ନିର୍ବାଚନ ପ୍ରକ୍ରିୟା ଅଧିକ ସ୍ବଚ୍ଛ ହୋଇଯିବ।
