ନୂଆପଡା,୧୫।୧୧: ବିଜେଡି ଗଡ଼ ଧ୍ବସ୍ତ କରି ଉପନିର୍ବାଚନରେ ଜୟଙ୍କ ବଡ଼ ବିଜୟ ହୋଇଛି । ୧୧ ବର୍ଷ ପରେ ନୂଆପଡା ପୁଣି ଥରେ ପଦ୍ମ ଫୁଟିଛି । ଭାଜପା ପ୍ରାର୍ଥୀ ଜୟ ତାଙ୍କ ନିକଟତମ ପ୍ରାର୍ଥୀ କଂଗ୍ରେସର ଘାସିରାମ ମାଝୀଙ୍କୁ ୮୩ ହଜାର ୭୪୮ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି । ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ତୃତୀୟ ସ୍ଥାନରେ ସନ୍ତୁଷ୍ଟ ହେବାକୁ ପଡିଛି । ରାଜ୍ୟର ଅନ୍ୟତମ ପଛୁଆ ଅଞ୍ଚଳର ଏହି ବିଧାନସଭା ଆସନକୁ ୧୧ ବର୍ଷ ପରେ ଭାଜପା ନିଜ ଦଖଲକୁ ନେଇଛି । ଜୟଙ୍କୁ ୧ ଲକ୍ଷ ୨୩ ହଜାର ୮୬୯ ଖଣ୍ଡ ଭୋଟ ମିଳିଛି ।
ତେବେ ଜୟଙ୍କ ବିଜୟକୁ ନେଇ ଶୁଭେଚ୍ଛା ଜଣାଇଛନ୍ତି ବସନ୍ତ ପଣ୍ଡା ପୁଅ ଅଭିନନ୍ଦନ ପଣ୍ଡା। ସେ କହିଛନ୍ତି, ଜୟ ଢୋଲକିଆ ମୋ ସାନ ଭାଇ। ମୋ ଭାଇକୁ ମୁଁ ଜିତେଇଛି। ତାଙ୍କୁ ଲୋକଙ୍କ ଆଶୀର୍ବାଦ ମିଳିଛି। ମୁଁ ଲୋକଙ୍କ ସେବାରେ ବିଶ୍ୱାସ କରେ। କୌଣସି ଟିକେଟ ଲାଳସାରେ ମୁଁ ଆଗରୁ ନ ଥିଲି। ମୋ ବାପା ମୋତେ ସେବା କରିବାକୁ ଶିଖାଇଛନ୍ତି। ଭାଜପା ମୋ ବାପାଙ୍କୁ ବହୁତ କିଛି ଦେଇଛି। ଆମକୁ ମଧ୍ୟ ପରିଚୟ ମିଳିଛି। ଜୟ ସହ ମିଶି ନୂଆପଡା ପାଇଁ କାମ କରିବି। ବର୍ତ୍ତମାନ ମୋର ଆଉ କୌଣସି ଆଶା ନାହିଁ ବୋଲି ଅଭିନନ୍ଦନ କହିଛନ୍ତି।
ସୂଚନାଥାଉ କି, କଂଗ୍ରେସ ପ୍ରାର୍ଥୀ ଘାସିରାମ ୪୦ ହଜାର ୧୨୧ଟି ଭୋଟ ପାଇଥିଲା ବେଳେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ୩୮ ହଜାର ୪୦୮ଖଣ୍ଡ ଭୋଟ ପାଇଛନ୍ତି । ବିଜେଡିର ଗଡ଼ କୁହାଯାଉଥିବା ଏହି ଆସନରେ ବିଜେଡି ପ୍ରଥମଥର ପାଇଁ ତୃତୀୟ ସ୍ଥାନକୁ ଖସିଯାଇଛି । ଘାସିରାମ ମାଝୀ ଗତ ସାଧାରଣ ନିର୍ବାଚନରେ ସ୍ବାଧୀନ ପ୍ରାର୍ଥୀ ଭାବେ ପାଇଥିବା ଭୋଟ ତୁଳନାରେ ଏଥର କମ ପାଇଥିଲେ ବି ଏଥର କଂଗ୍ରେସ ଦ୍ବିତୀୟ ସ୍ଥାନ ହାସଲ କରିଛି ।
Dharitri – Odisha’s No.1 Trusted Odia Daily
