ରାଉରକେଲା,୧୧।୪(ବିପ୍ଳବ ରଞ୍ଜନ ଦାଶ): ଭାଜପାର ସୁନ୍ଦରଗଡ଼ ଏମ୍ପି ପ୍ରାର୍ଥୀ ଜୁଏଲ ଓରାମ୍ ରାଉରକେଲା ବିଧାନସଭା ଆସନରେ ପୂର୍ବତନ କେନ୍ଦ୍ରମନ୍ତ୍ରୀ ଦିଲୀପ ରାୟଙ୍କୁ ଦଳ ପକ୍ଷରୁ ପ୍ରାର୍ଥୀ କରାଯିବା ନେଇ ସୂଚନା ଦେବାର ୨୪ ଘଣ୍ଟା ନ ପୂରୁଣୁ ବୁଧବାର ଏହାର ବାସ୍ତବ ରୂପ ଦେଖିବାକୁ ମିଳିଥିଲା। ଭୁବନେଶ୍ୱରରୁ ବୁଧବାର ଅପରାହ୍ନରେ ଦିଲୀପ ବାହାରି ରାଉରକେଲା ବିମାନବନ୍ଦରରେ ପହଞ୍ଚିବା ପରେ ସେଠାରେ ତାଙ୍କୁ ଭବ୍ୟ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା। ଏମ୍ପି ପ୍ରାର୍ଥୀ ଜୁଏଲ ଓରାମ୍, ହରି ରାଉତରାୟ, ସୁବ୍ରତ ପଟ୍ଟନାୟକ ପ୍ରମୁଖ ପୁଷ୍ପଗୁଚ୍ଛ ଦେଇ ଦିଲୀପଙ୍କୁ ସ୍ବାଗତ କରିଥିଲେ। ତାଙ୍କୁ ସ୍ବାଗତବେଳେ ବିଜେଡିର କେତେଜଣ କର୍ମୀ ରହିଥିବା ଦେଖିବାକୁ ମିଳିଥିଲା। ଭାଜପା କର୍ମୀ, ସମର୍ଥକ, ବଜରଙ୍ଗ ଦଳ, ଭିଏଚ୍ପି କର୍ମୀ, ସହରର ବିଭିନ୍ନ ଅନୁଷ୍ଠାନ ଓ ପ୍ରତିଷ୍ଠାନର ବ୍ୟକ୍ତିବିଶେଷ ହାତରେ ଭାଜପା ପତାକା ଓ ବଜରଙ୍ଗ ଦଳ ପତାକା ଧରି ଦିଲୀପଙ୍କ ସମର୍ଥନରେ ସ୍ଲୋଗନ ଦେଇଥିଲେ। ଅନେକ ସମର୍ଥକଙ୍କ ଗହଣରେ ଦିଲୀପ ହକି ଗ୍ରାମ ଆଡ଼କୁ ପଦଯାତ୍ରା କରିଥିଲେ। ଏହାପରେ ସେ ରାଉରକେଲା ସହରର ଜନସାଧାରଣଙ୍କ ଉଦ୍ଦେଶ୍ୟରେ କହିଥିଲେ ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ତାଙ୍କର ରାଉରକେଲାବାସୀଙ୍କ ପ୍ରତି ଥିବା ବିପୁଳ ଆସ୍ଥାର ଆଜି ପରିପ୍ରକାଶ ହୋଇଛି। ସେ କୌଣସି ଭୁଲ୍ ନିଷ୍ପତ୍ତି ନେଇନାହାନ୍ତି। ମାଟିର ବିକାଶ ଓ ସ୍ବାଭିମାନ ନିମନ୍ତେ ଏଥର ନିର୍ବାଚନ ଲଢ଼ିବେ। ଏନେଇ ଦିଲୀପଙ୍କ ଦୃଢ଼ ସମର୍ଥକ ସୁବ୍ରତ ପଟ୍ଟନାୟକ ଏବଂ ମିଡିଆ ପର୍ସନ ହରି ରାଉତରାୟ କହିଥିଲେ ଯେ, ଦିଲୀପଙ୍କ ପ୍ରତି ଥିବା ଅଗାଢ଼ ଲୋକପ୍ରିୟତା ତାଙ୍କୁ ବିପୁଳ ଭୋଟରେ ବିଜୟୀ କରାଇବ। ଆଗାମୀ ଦିନରେ ବିଜେଡି ଏବଂ ଅନ୍ୟ ଦଳରୁ ବହୁ ଅସନ୍ତୁଷ୍ଟ କର୍ମୀ ଦିଲୀପଙ୍କ ସମର୍ଥନରେ ସାମିଲ ହେବେ ବୋଲି କହିଥିଲେ। ୨/୩ ଦିନ ଭିତରେ ଦିଲୀପଙ୍କୁ ଭାଜପା ବିଧାୟକ ପ୍ରାର୍ଥୀ ଭାବେ ଟିକେଟ ପ୍ରଦାନ କରାଯିବ ବୋଲି କହିଥିଲେ।
