ସୋନପୁର, ୧୮ା୬(ମୃତ୍ୟୁଞ୍ଜୟ ଶତପଥୀ) ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟ(ଡିଏଚ୍ଏଚ୍)ରେ ଶନିବାର ଅଭାବନୀୟ ଘଟଣା ଦେଖିବାକୁ ମିଳିଛି। ସ୍ବାସ୍ଥ୍ୟକେନ୍ଦ୍ରରୁ ବିଭିନ୍ନ ଓ୍ବାର୍ଡକୁ ସଂଯୋଗ କରୁଥିବା ପାଣି ପାଇପ ଲାଇନ୍ ଫାଟି ଯାଇଥିଲା। ପାଇପ ଲାଇନ ଉପରେ ସ୍ବାସ୍ଥ୍ୟ ବିଭାଗ ପକ୍ଷରୁ କୋଠା ନିର୍ମାଣ ହୋଇଥିବାରୁ ପାଣି ପାଇପ୍ ଫାଟିଥିବା ଅଭିଯୋଗ ହୋଇଛି। ଜନସ୍ବାସ୍ଥ୍ୟ ବିଭାଗ ପକ୍ଷରୁ ଶୁକ୍ରବାର ଅପରାହ୍ନରୁ ମରାମତି କାମ ଚାଲିଥିଲେ ହେଁ ତାହା ସମ୍ପୂର୍ଣ୍ଣ ହେବାକୁ ଦୀର୍ଘ ୩୨ ଘଣ୍ଟା ଲାଗିଲା। ଏହି ସମୟ ଭିତରେ ଇନ୍ଡୋରରେ ଚିକିତ୍ସିତ ହେଉଥିବା ଶତାଧିକ ରୋଗୀ ଓ ପରିଜନ ପାଣି ପାଇଁ ହନ୍ତସନ୍ତ ହେଲେ। ଶୌଚ ପାଇଁ ରୋଗୀଙ୍କୁ ପାଣି ଟୋପାଏ ମିଳିଲାନି। ସେମାନଙ୍କ ଦୁଃଖ ଶୁଣିବାକୁ କେହି ନଥିଲେ। ବିକଳ୍ପ ବ୍ୟବସ୍ଥା କରା ଯାଇ ନଥିଲା । ତେବେ ପାଇପ ମରାମତି ପରେ ଶନିବାର ରାତି ୯ଟା ପରେ ଚିକିତ୍ସାଳୟର ବିଭିନ୍ନ ବିଭାଗକୁ ଜଳଯୋଗାଣ ହୋଇଛି। ଏଠାରେ ଶନିବାର ସର୍ବୋଚ୍ଚ ତାପମାତ୍ରା ୪୫.୭ ଡିଗ୍ରୀ ସେଲସିୟସ ରେକର୍ଡ ହୋଇଥିବା ବେଳେ ପ୍ରଚଣ୍ଡ ଗ୍ରୀଷ୍ମରେ ରୋଗୀ ହଇରାଣ ହୋଇଥିଲେ। ଶଯ୍ୟା ଅଭାବରୁ ରୋଗୀ ବାରଣ୍ଡାରେ ଶୋଇ ରହି ଚିକିତ୍ସିତ ହେଉଥିବା ବେଳେ ପାଣି ଅଭାବ ସେମାନଙ୍କ ଦୁଃଖକୁ ଦ୍ୱିଗୁଣିତ କରିଥିଲା। ସୋନପୁର ବିଧାୟକ ନିରଞ୍ଜନ ପୂଜାରୀ ଏବେ ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ ସଂସଦୀୟ ବ୍ୟାପାର ମନ୍ତ୍ରୀ ଅଛନ୍ତି । ତାଙ୍କ ନିର୍ବାଚନ ମଣ୍ଡଳୀରେ ଥିବା ଜିଲା ମୁଖ୍ୟ ସ୍ବାସ୍ଥ୍ୟକେନ୍ଦ୍ରରେ ଏଭଳି ସ୍ଥିତିକୁ ନେଇ ସୋସିଆଲ ମିଡିଆରେ ଜୋର ଚର୍ଚ୍ଚା ହୋଇଥିଲା। ସୂଚନାଯୋଗ୍ୟ, ଶୁକ୍ରବାର ଜିଲାର ବିନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମେଘଲା ଗ୍ରାମର ବୃଦ୍ଧା ରୁକ୍ମଣୀ ସାହୁଙ୍କ ଅଂଶୁଘାତ ଜନିତ ମୃତ୍ୟୁ ହୋଇଥିଲା। ମୃତଦେହକୁ ଘରକୁ ନେବା ପାଇଁ ମହାପ୍ରାୟାଣ ଗାଡି ମିଳି ନଥିଲା। ଫଳରେ ରୁକ୍ମଣୀଙ୍କ ମୃତଦେହକୁ ସାଇକେଲରେ ଘରକୁ ନେବାକୁ ପଡିଥିଲା। ଏହି ଉଭୟ ଘଟଣା ଜିଲାର ସ୍ବାସ୍ଥ୍ୟସେବାର ସ୍ଥିତିକୁ ପଦାରେ ପକାଇଛି ।
