କରାଚୀ,୧୩।୧୧: ଚଳିତ ଟି୨୦ ବିଶ୍ୱକପ୍ରେ ପାକିସ୍ତାନ ଦ୍ୱିତୀୟ ସେମିଫାଇନାଲରେ ଅଷ୍ଟ୍ରେଲିଆଠାରୁ ପରାସ୍ତ ହେବା ପରେ ଆଲୋଚନା ପର୍ଯ୍ୟାଲୋଚନା ଜାରି ରହିଛି। ପରାଜୟ ପାଇଁ ସାରା ପାକିସ୍ତାନରେ ଦେଖା ଦେଇଛି ନୈରାଶ୍ୟ। ପରାଜୟ ପାଇଁ କିଏ ଦାୟୀ ସେ ନେଇ ତର୍ଜମା ମଧ୍ୟ ଚାଲିଛି। ଏବେ ଏହିଧାରାରେ ଯୋଡ଼ି ହୋଇଛନ୍ତି ପୂର୍ବତନ ଅଲରାଉଣ୍ଡର ଶହିଦ ଆଫ୍ରିଦୀ।
ପାକିସ୍ତାନର ମୁଖ୍ୟ ତଥା ଷ୍ଟ୍ରାଇକ୍ ପେସର ଶାହିନ ଶାହା ଆଫ୍ରିଦୀଙ୍କ ବୋଲିଂ ଉପରେ ସେ ପ୍ରଶ୍ନ ଉଠାଇଛନ୍ତି। ପରୋକ୍ଷରେ ପରାଜୟ ପାଇଁ ଶାହିନଙ୍କୁ ଦାୟୀ କରିଛନ୍ତି ରୋକ୍ଠୋକ କଥା କହିବା ନେଇ ବେଶ୍ ଜଣାଶୁଣା ଥିବା ପୂର୍ବତନ ଅଧିନାୟକଙ୍କୁ। ଗୁରୁବାର ଅନୁଷ୍ଠିତ ସଂଘର୍ଷପୂର୍ଣ୍ଣ ସେମିଫାଇନାଲରେ ବିଜୟ ପାଇଁ ଅନ୍ତିମ ଦୁଇ ଓଭରରେ ଅଷ୍ଟ୍ରେଲିଆକୁ ଦରକାର ଥିଲା ୨୨ ରନ। ତେବେ ୧୯ତମ ଓଭରରେ ଶାହିନ ୨୨ ରନ ବୟ କରିଥିଲେ। ଏହି ଓଭରର ଅନ୍ତିମ ୩ଟି ବଲ୍ରେ ମାଥ୍ୟୁ ଓ୍ବେଡ କ୍ରମାଗତ ୩ଟି ଛକା ମାରି ଅଷ୍ଟ୍ରେଲିଆକୁ ଜିତାଇଥିଲେ।
”ଠିକଣା ସମୟରେ ଶାହିନ ଭଲ ବୋଲିଂ କରିବାରେ ବିଫଳ ହୋଇିଛନ୍ତି। ତାଙ୍କ ପ୍ରଦର୍ଶନରେ ମୁଁ ଆଦୌ ଖୁସି ନୁହଁ। ଠିକ୍ ଅଛି ହାସନ ଅଲି ଓ୍ବେଡ୍ଙ୍କ ଏକ ଗୁରୁତ୍ୱପୂର୍ଣ୍ଣ କ୍ୟାଚ୍ ହାତଛଡ଼ା କରିଥିଲେ। ତା ମାନେ ନୁହେଁ ଯେ, ଶାହିନ ୩ ବଲରେ କ୍ରମାଗତ ୩ ଛକା ଦେବେ। ତେଣୁ ଶାହିନଙ୍କ ଅନ୍ତିମ ୩ଟି ବଲ୍ରେ ଖରାପ ବୋଲିଂ କରିଥିଲେ। ତାଙ୍କ ପାଖରେ ଅଫ୍ ଷ୍ଟାମ୍ପ ବାହାରେ ପକାଇବାର ବିକଳ୍ପ ଥିଲା। କିନ୍ତୁ ଛକା ଖାଇବା ପରେ ମଧ୍ୟ ସେ ଉଇକେଟକୁ ହିଁ ବୋଲିଂ କରିଥିଲେ। ତାଙ୍କ ଭଳି ଜଣେ ଉଚ୍ଚକୋଟିର ବୋଲର ଏଭଳି ଖରାପ ବୋଲିଂ କଲେ ହଜମ ହେବା କଷ୍ଟକର। ଏହି ହାଇଭୋଲ୍ଟେଜ ମ୍ୟାଚ୍ରୁ ଶାହିନ ବହୁତ କିଛି ଶିକ୍ଷା କରିଥିବେ ଓ ଏହା ଭବିଷ୍ୟତରେ ତାଙ୍କର କାର୍ଯ୍ୟରେ ଆସିବ। ସେ ସାରା ଟୁର୍ନାମେଣ୍ଟରେ ନୂଆ ବଲ୍ରେ ଚମତ୍କାର ପ୍ରଦର୍ଶନ କରିଛନ୍ତି। ତାଙ୍କ ପୂର୍ବରୁ ଓ୍ବାସିମ ଆକ୍ରମ ଓ ମହମ୍ମଦ ଆମୀର ନୂଆ ବଲରେ ଏଭଳି ବୋଲିଂ କରୁଥିଲେ। ଏହି ଅଭିଜ୍ଞତା ଶାହିନଙ୍କୁ ଭବିଷ୍ୟତରେ ସାହାଯ୍ୟ କରିବ“ ବୋଲି ଆଫ୍ରିଦୀ ଏକ ଟିଭି ଚ୍ୟାନେଲକୁ ସାକ୍ଷାତକାର ଦେଇ କହିଛନ୍ତି।
