ଲିବ୍ରେଭିଲେ, ୧୫।୧: ଦେଶ ବିଦେଶରେ ଥିବା ଅନେକ ଲୁକ୍କାୟିତ ପ୍ରତିଭା ସୋସିଆଲ ମିଡିଆ ଜରିଆରେ ଲୋକଲୋଚନକୁ ଆସୁୁଛି। ଏହାଦ୍ୱାରା ପ୍ରତିଭାଶାଳୀ ଲୋକେ ଜନପ୍ରିୟତା ହାସଲ କରିବା ସହ ରୋଜଗାରକ୍ଷମ ମଧ୍ୟ ହେଉଛନ୍ତି। ଆଫ୍ରିକା ଗାବୋନର ଜୈରେସ କୋମ୍ବିଲାଙ୍କ ପାଇଁ ବହୁଳ ଭାବେ ବ୍ୟବହୃତ ସୋସିଆଲ ମିଡିଆ ଏକ ବରଦାନ ସବ୍ୟସ୍ତ ହୋଇଛି।
ଶରୀରକୁ ନମନିୟତା (ଫ୍ଲେକ୍ସିବୁଲ୍) କରିବା ଲାଗି ଲୋକେ ନିୟମିତ ବ୍ୟାୟାମ ଓ ଯୋଗାଭ୍ୟାସ କରନ୍ତି। କିନ୍ତୁ ଜୈରେସଙ୍କ ଶରୀର ଜନ୍ମରୁ ହିଁ ଫ୍ଲେକ୍ସିବୁଲ। ହାତ ହେଉ ଅବା ଗୋଡ଼ ଶରୀରର ପ୍ରତିଟି ଅଙ୍ଗକୁ ସେ ରବର ପରି ମୋଡ଼ି ଦେଇପାରନ୍ତି। ଅନେକେ ତାଙ୍କୁ ରବର ମ୍ୟାନ୍ ବୋଲି କହୁଛନ୍ତି। ତାଙ୍କର ଏ ପ୍ରକାର ବିରଳ ପ୍ରତିଭା ପାଇଁ ସେ ଏବେ ଗାବୋନ ବ୍ୟତୀତ ବାହାର ଦେଶରେ ପରିଚିତ। ନିଜ ମୁଣ୍ଡକୁ ସହଜରେ ପଛପଟକୁ ବୁଲାଇବା ସହ ଗୋଡ଼, ହାତକୁ ସେ ୧୮୦ ଡିଗ୍ରୀରେ ମୋଡ଼ି ପାରନ୍ତି। ତାଙ୍କର ଏହି କାରନାମାକୁ କୋଣ୍ଟୋରଶନ୍ (ଶରୀରକୁ ଅପ୍ରାକୃତିକ ଭାବେ ମୋଡ଼ିବା) ବୋଲି କୁହାଯାଏ। ପୂର୍ବରୁ ଜୈରେସଙ୍କ ପାଖରେ ଥିବା ଏହି ବିଶେଷ ପ୍ରକାର ଗୁଣକୁ ସେଠାକାର ଲୋକେ ବୁଝିପାରୁ ନ ଥିଲେ। ପିଲାବେଳେ ତାଙ୍କୁ ଅନେକେ ଥଟ୍ଟା କରୁଥିଲେ। ଖାଲି ସେତିକି ନୁହେଁ ଜୈରେସଙ୍କ ସମ୍ପ୍ରଦାୟର ଲୋକେ ତାଙ୍କୁ ବାଛନ୍ଦ କରିଥିବା ନିଜ ପ୍ରତିକ୍ରିୟାରେ ସେ କହିଛନ୍ତି। କେହି କେହି ତାଙ୍କୁ ଭୂତ ବୋଲି କହୁଥିଲେ।
କିନ୍ତୁ ଜୈରେସ ଯେତେବେଳେ କୋଣ୍ଟୋରଶନ୍ର ଭିଡିଓ ସୋସିଆଲ ମିଡିଆରେ ଶେୟାର କଲେ ସେତେବେଳେ ତାଙ୍କ ଭିଡିଓ ଖୁବ୍ ଭାଇରାଲ ହେବାରେ ଲାଗିଲା। ଲୋକେ ତାଙ୍କୁ ଖୁବ୍ ପସନ୍ଦ ମଧ୍ୟ କରିବାକୁ ଲାଗିଲେ। ବର୍ତ୍ତମାନ ଏହି ଭିଡିଓରୁ ସେ ଭଲ ରୋଜଗାର କରୁଛନ୍ତି। ନିଜ ପ୍ରତିଭାକୁ ସାରା ବିଶ୍ୱରେ ପରିଚିତ କରିବାକୁ ଜୈରେସ ଚାହୁଁଥିବାବେଳେ ଏ ପ୍ରତି ଆଗ୍ରହୀ କେତେଜଣ ପିଲାଙ୍କୁ ସେ ପ୍ରଶିକ୍ଷଣ ମଧ୍ୟ ଦେଉଛନ୍ତି। ଘରଲୋକେ କିନ୍ତୁ ଜୈରେସଙ୍କ ଏହି କରନାମାରେ ଖୁସି ନ ଥିବାବେଳେ ତାଙ୍କ ମା’ ଏ କାମ କରିବାକୁ ବାରଣ କରନ୍ତି। ସୋସିଆଲ ମିଡିଆରୁ ହାସଲ କରିଥିବା ଲୋକପ୍ରିୟତାକୁ ଜୈରେସ କୌଣସିମତେ ହରାଇବାକୁ ଚାହୁଁ ନ ଥିବା କହିଛନ୍ତି।
