କାବୁଲ, ୨ା୯: ୧,୨୩,୦୦୦ ଲୋକଙ୍କୁ ଏୟାରଲିଫ୍ଟ କରି ଆମେରିକା ସୈନ୍ୟ ଫେରିଯିବା ପରେ କାବୁଲ ବିମାନବନ୍ଦରକୁ ତାଲିବାନ୍ ଦଖଲ କରିଛି। ଏଥିସହ ଏୟାରଲିଫ୍ଟ ଅପେକ୍ଷାରେ ଥିବା ନାଗରିକଙ୍କ ସୁରକ୍ଷିତ ସ୍ଥାନାନ୍ତର ବନ୍ଦ ହୋଇଯାଇଛି। ଆତଙ୍କ ଓ ଅର୍ଥସଙ୍କଟ ଦେଇ ଗତିକରୁଥିବା ଲୋକଙ୍କୁ ସୁରକ୍ଷା ଦେବା ପାଇଁ ଦେଶରେ ପ୍ରଶାସନିକ ଶୂନ୍ୟତା ଦେଖାଦେଇଛି। ଦେଶ ଛାଡ଼ି ପଳାୟନ କରନାହିଁ ବୋଲି ତାଲିବାନ ଯେତେ କହିଲେ ବି କେହି ଶୁଣୁନାହାନ୍ତି। ଆଫଗାନିସ୍ତାନବାସୀ ଶରଣ ଆଶାରେ ଇରାନ ଓ ପାକିସ୍ତାନ ସମେତ କେନ୍ଦ୍ରୀୟ ଏସୀୟ ରାଷ୍ଟ୍ରଗୁଡ଼ିକର ସୀମାକୁ ଧାଇଁବା ଆରମ୍ଭ କରିଛନ୍ତି। ପାକିସ୍ତାନ-ଆଫଗାନିସ୍ତାନର ତୋରଖାମ୍ ଓ ଚମନ ସୀମା ଶରଣାର୍ଥୀଙ୍କ ପାଇଁ ଏବେ ଟ୍ରାଞ୍ଜିଟ୍ ପଏଣ୍ଟ ପାଲଟିଛି। ତୋରଖାମ୍ରେ ମୁତୟନ ଜଣେ ପାକିସ୍ତାନୀ ରେଞ୍ଜର କହିଛନ୍ତି, ଆଫଗାନିସ୍ତାନ ପଟେ ବହୁ ସଂଖ୍ୟକ ଲୋକ ସୀମା ଅତିକ୍ରମ କରି ଆସିବା ପାଇଁ ଅପେକ୍ଷା କରି ରହିଛନ୍ତି। କିନ୍ତୁ ତାଲିବାନ ଗେଟ୍ ବନ୍ଦ ରଖିଥିବାରୁ ସେମାନେ ଆସିପାରୁନାହାନ୍ତି। ସେହିପରି ଇରାନ ସଂଲଗ୍ନ ଇସ୍ଲାମ କାଲା ବର୍ଡର ପୋଷ୍ଟରେ ମଧ୍ୟ ବହୁ ସଂଖ୍ୟକ ଆଫଗାନ୍ ସୀମା ଡେଇଁବାକୁ ଚେଷ୍ଟା କରୁଛନ୍ତି। କିଏ ଖାଲି ପାଦରେ ଚାଲି ଚାଲି ଯାଉଛନ୍ତି ତ କିଏ ଅନ୍ୟ ଯାନବାହନରେ ଯିବା ପାଇଁ ସହାୟତା ମାଗୁଥିବା ଦେଖାଯାଇଛି।
ପ୍ରକାଶ ଯେ, ଆଫଗାନ୍ମାନଙ୍କୁ ଶରଣାର୍ଥୀ ଭାବେ ଆଶ୍ରୟ ଦେବା ପାଇଁ ରାଷ୍ଟ୍ରଗୁଡ଼ିକୁ ଜାତିସଂଘ ଅନୁରୋଧ କରିଥିଲା। ସୋମବାର ଜାତିସଂଘ ସୁରକ୍ଷା ପରିଷଦ ଆଫଗାନିସ୍ତାନ ଛାଡ଼ିବାକୁ ଚାହୁଁଥିବା ଲୋକଙ୍କୁ ସୁରକ୍ଷିତ ସ୍ଥାନାନ୍ତର କରିବା ଲାଗି ତାଲିବାନ୍କୁ ପରାମର୍ଶ ଦେଇଥିଲା।
