ଭୁବନେଶ୍ୱର, ୩।୧(ସୁନିତ୍ ମିଶ୍ର): ପ୍ରତ୍ୟେକ ବର୍ଷ ଜାନୁଆରୀ ୨୬ ତାରିଖ ସାଧାରଣତନ୍ତ୍ର ଦିବସରେ ନୂଆଦିଲ୍ଲୀସ୍ଥିତ ରାଜପଥରେ ହେଉଥିବା ପରେଡ୍ରେ ବିଭିନ୍ନ ରାଜ୍ୟର ପ୍ରଜ୍ଞାପନ ମେଢ(ଟାବ୍ଲୋ) ପ୍ରଦର୍ଶିତ ହୋଇଥାଏ। ପ୍ରତିବର୍ଷ କେଉଁସବୁ ରାଜ୍ୟର ପ୍ରଜ୍ଞାପନ ମେଢ଼ ପ୍ରଦର୍ଶନ କରାଯିବ ସେନେଇ ପ୍ରତିରକ୍ଷା ଏବଂ ସଂସ୍କୃତି ମନ୍ତ୍ରଣାଳୟ ପକ୍ଷରୁ ଚୟନ କରିଥାଆନ୍ତି। ହେଲେ ଗତ ୩ବର୍ଷ ଅର୍ଥାତ୍ ୨୦୨୧, ୨୦୨୨ ଏବଂ ୨୦୨୩ ସାଧାରଣତନ୍ତ୍ର ଦିବସରେ ଓଡ଼ିଶା ଚୟନ ତାଲିକାରୁ ବାଦ୍ ପଡିଆସୁଛି। ଶେଷଥର ଲାଗି ୨୦୨୦ ଜାନୁଆରୀ ୨୬ରେ ଓଡ଼ିଶା ପ୍ରଜ୍ଞାପନ ମେଢ଼କୁ ପ୍ରଦର୍ଶନ କରିବାର ସୁଯୋଗ ମିଳିଥିଲା। ଚଳିତ ବର୍ଷ ଓଡ଼ିଶାର ପ୍ରଜ୍ଞାପନ ମେଢ଼କୁ ସୁଯୋଗ ମିଳିବ ନା ନାହିଁ ସେନେଇ ଏ ପର୍ଯ୍ୟନ୍ତ ବିଧିବଦ୍ଧ ଭାବେ କୌଣସି ସୂଚନା ଆସିନାହିଁ। କେବଳ ଯାହା ମୌଖିକ ଭାବେ ଏଥର ଓଡିଶାକୁ ସୁଯୋଗ ମିଳିବ ବୋଲି କେନ୍ଦ୍ରର ଯେଉଁ କମିଟି ଚୟନ କରୁଥିଲେ ସେମାନେ କହିଛନ୍ତି। ଜାନୁଆରୀ ୨ତାରିଖ ସୁଦ୍ଧା କେନ୍ଦ୍ର ସରକାରଙ୍କ ପକ୍ଷରୁ ଚିଠି ଆସିବ ବୋଲି ରାଜ୍ୟ ସରକାରଙ୍କୁ କୁହାଯାଇଥିଲା। ୩ତାରିଖ ଅର୍ଥାତ୍ ବୁଧବାର ରାଜ୍ୟ ସରକାରଙ୍କ ଅଧିକାରୀମାନେ ନୂଆଦିଲ୍ଲୀ ଗସ୍ତ କରିବେ ଏବଂ ଗୁରୁବାର ସେମାନଙ୍କୁ ମେଢ଼ ପ୍ରସ୍ତୁତି ଲାଗି ଆବଶ୍ୟକ ଟ୍ରାକ୍ଟର ଏବଂ ଟ୍ରଲର ଯୋଗାଇ ଦିଆଯିବ ବୋଲି କେନ୍ଦ୍ର କହିଥିଲେ ମଧ୍ୟ ମଙ୍ଗଳବାର ସନ୍ଧ୍ୟା ସୁଦ୍ଧା କୌଣସି ଚିଠି ନ ଆସିବା ଯୋଗୁ ଗତ ୩ ବର୍ଷ ଭଳି ଏଥର ମଧ୍ୟ ସମାନ ସ୍ଥିତି ସୃଷ୍ଟି ହେବା ସମ୍ଭାବନା ଉପୁଜିପାରେ ବୋଲି ସନ୍ଦେହ କରାଯାଉଛି। ସାଧାରଣତନ୍ତ୍ର ଦିବସରେ ପ୍ରଜ୍ଞାପନ ମେଢ ପ୍ରଦର୍ଶନ ଲାଗି ଗତ ଡିସେମ୍ବରରେ ୪ଟି ବୈଠକ ସରିଛି। ପ୍ରଥମେ ଭାରତକୁ ମୋଟ ୬ଟି ଜୋନ୍ରେ ଭାଗ କରାଯାଇଥିଲା। ପୂର୍ବ, ପଶ୍ଚିମ, ଉତ୍ତର ଦକ୍ଷିଣ, କେନ୍ଦ୍ର ଓ ଉତ୍ତରପୂର୍ବ ଜୋନ୍। ଏହି ସବୁ ଜୋନ୍ରୁ ମୋଟ ୧୪ଟି ଟାବ୍ଲୋ ଏଥର ପ୍ରଦର୍ଶିତ ହେବାର ଅଛି। ପୂର୍ବ ଜୋନ୍ରୁ ପଶ୍ଚିମବଙ୍ଗ, ବିହାର, ଓଡ଼ିଶା ଏବଂ ଝାଡ଼ଖଣ୍ଡ ଅଛନ୍ତି। ସେଥିରୁ ପଶ୍ଚିମବଙ୍ଗ ଏବଂ ବିହାରକୁ କେନ୍ଦ୍ର କାଟି ସାରିଛି। ଓଡ଼ିଶାର ବିକଶିତ ମହିଳା ସଶକ୍ତୀକରଣ ପ୍ରଜ୍ଞାପନ ମେଢ଼ ପ୍ରଦର୍ଶନ କରିବା ନେଇ ୪ଟି ପର୍ଯ୍ୟାୟ ବୈଠକରେ ଚୂଡ଼ାନ୍ତ ହୋଇଥିବା କୁହାଯାଉଛି। ହେଲେ ଯେଉଁ ସମୟ ସୁଦ୍ଧା ଓଡ଼ିଶା ସରକାରଙ୍କୁ ଖବର ଦେବା ଲାଗି କେନ୍ଦ୍ର କହିଥିଲା, ସେହି ସମୟ ଅତିକ୍ରମ ହୋଇସାରିଥିବାରୁ ଏନେଇ ବର୍ତ୍ତମାନ ସନ୍ଦେହ ସୃଷ୍ଟି ହୋଇଛି। ତେବେ କେନ୍ଦ୍ର କୌଣସି କାରଣ ନ ଜଣାଇ ଗତ ୩ ବର୍ଷ ଧରି ରାଜ୍ୟର ପ୍ରଜ୍ଞାପନ ମେଢ଼କୁ ପ୍ରତ୍ୟାଖାନ କରିଆସୁଛି। ଲଗାତର ଗତ ୩ ବର୍ଷକୁ ଦେଖିଲେ ଓଡ଼ିଶାକୁ ସମ୍ପୂର୍ଣ୍ଣ ଭାବେ ହେୟଜ୍ଞାନ କରାଯାଉଛି। ଫଳରେ ଓଡ଼ିଶାର ଉଭୟ ପଶ୍ଚିମ ଓ ଉପକୂଳବର୍ତ୍ତୀ ଅଞ୍ଚଳର କଳା, ସଂସ୍କୃତି, ସଙ୍ଗୀତ, ସ୍ଥପତିକୁ ଜାତୀୟ ଏବଂ ଅନ୍ତର୍ଜାତୀୟସ୍ତରରେ ଉପସ୍ଥାପନ କରାଯାଇ ପାରୁନାହିଁ। ସ୍ବୀକାର କରିବାକୁ ହେବ ଯେ, ୨୬ ଜାନୁଆରୀ ଦିନ ଦିଲ୍ଲୀର ରାଜପଥରେ ବୁଲି ଆସୁଥିବା ପ୍ରଜ୍ଞାପନ ମେଢ଼ରୁ ଓଡ଼ିଶା ବାଦ୍ ପଡ଼ିଲେ ରାଜ୍ୟର କୌଣସି କ୍ଷତି ଘଟେ ନାହିଁ। ତେବେ ଅନ୍ୟ ଦିଗକୁ ଦେଖିଲେ ଏହି ପ୍ରଦର୍ଶନରୁ ବଞ୍ଚତ୍ତ ହେଲେ ମନେହୁଏ ଯେପରି ଓଡ଼ିଶାକୁ ଭାରତର ଏକ ଅଂଶ ଭାବେ ଧରାଯାଉ ନାହିଁ।
ଏଠାରେ ଉଲ୍ଲେଖଯୋଗ୍ୟ, ଗତ ୩ ବର୍ଷରେ ଓଡ଼ିଶା ତାର ଟାବ୍ଲୋ ପ୍ରଦର୍ଶନ କରିବାରୁ ବଞ୍ଚତ୍ତ ହୋଇଥିବା ବେଳେ ପୂର୍ବରୁ ଏହା କେବେ ଘଟି ନାହିଁ ବୋଲି ସରକାରୀ ସୂତ୍ରରୁ ଜଣାପଡ଼ିଛି। ମଙ୍ଗଳବାର ଅର୍ଥାତ୍ ଜାନୁଆରୀ ୨ତାରିଖ ଅଫିସ କାର୍ଯ୍ୟକାରୀ ସମୟରେ କେନ୍ଦ୍ରରୁ ସ୍ବୀକୃତି ପତ୍ର ଆସି ପହଞ୍ଚିବାର ଥିଲା। ଅନ୍ୟ ରାଜ୍ୟଗୁଡ଼ିକୁ ଗତ ଡିସେମ୍ବର ମାସରେ ଏହି ପତ୍ର ପହଞ୍ଚତ୍ ସାରିଛି। ପୂର୍ବରୁ ମଧ୍ୟ ଏହିଭଳି ବିଳମ୍ବ ଘଟାଇ ଶେଷ ସମୟରେ କେନ୍ଦ୍ର ତାହାର ଚିଠି ପଠାଇ ନ ଥିବାରୁ ଓଡ଼ିଶାର ପ୍ରଜ୍ଞାପନ ମେଢ଼ ହୋଇପାରିନାହିଁ। ୨୦୨୪ରେ ମଧ୍ୟ ସେହିଭଳି ଘଟିପାରେ ବୋଲି ସରକାରୀ ସୂତ୍ରରୁ ଜଣାପଡ଼ିଛି। ଏହାର ପ୍ରତିକାର କିଭଳି କରାଯାଇପାରେ ବୋଲି ପଚାରିବାରୁ ନିଜ ନାମ ଉଲ୍ଲେଖ ନ କରିବା ପାଇଁ କହି ରାଜ୍ୟ ସରକାରଙ୍କ ଜଣେ ବରିଷ୍ଠ ଅଧିକାରୀ ଧରିତ୍ରୀକୁ କହିଛନ୍ତି ଯେ, ପ୍ରତିକାର କେବଳ ରାଜନୈତିକ, ସାମାଜିକ ଚାପରୁ ସୃଷ୍ଟି ହୋଇଥାଏ।