ଚେନ୍ନାଇ, ୨୭।୧୨: ହ୍ବାଟସ୍ ଆପ୍ ଗ୍ରୁପ୍ରେ ସଦସ୍ୟଙ୍କ ଦ୍ୱାରା କରାଯାଉଥିବା ଆପତ୍ତିଜନକ ପୋଷ୍ଟ୍ ପାଇଁ ଆଡମିନିଷ୍ଟ୍ରେଟର ଦାୟୀ ହେବେ ନାହିଁ। ମାଡ୍ରାସ୍ ହାଇକୋର୍ଟ ଏକ ମାମଲାର ବିଚାର କରି ଏଭଳି ରାୟ ଦେଇଛନ୍ତି। ବିଚାରପତି ଜି.ଆର୍. ସ୍ବାମୀନାଥନଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଯେ, ଯଦି ତଦନ୍ତରେ ଜଣାପଡ଼େ ଆଡମିନିଷ୍ଟ୍ରେଟରଙ୍କର କୌଣସି ସମ୍ପୃକ୍ତି ନାହିଁ ତେବେ ତାଙ୍କୁ ଆପତ୍ତିଜନକ କଣ୍ଟେଟ୍ ପାଇଁ ଅଭିଯୁକ୍ତ ଭାବେ ଗ୍ରହଣ କରାଯାଇ ପାରିବ ନାହିଁ। ‘କରୁର୍ ଲୟରର୍ସ’ ନାମକ ହ୍ବାଟସ୍ ଆପ୍ ଗ୍ରୁପ୍ ପକ୍ଷରୁ ଦାଖଲ କରାଯାଇଥିବା ଏକ ମାମଲାର ବିଚାର ସମୟରେ ମାଡ୍ରାସ୍ ହାଇକୋର୍ଟର ମଦୁରାଇ ବେଞ୍ଚ୍ ପକ୍ଷରୁ ଏଭଳି କୁହାଯାଇଛି।
ଦୁଇ ସମ୍ପ୍ରଦାୟ ମଧ୍ୟରେ ଉତ୍ତେଜନା ବୃଦ୍ଧି କରୁଥିବା କଣ୍ଟେଟ୍ ପଛିୟାପ୍ପନ୍ ନାମକ ଜଣେ ସଦସ୍ୟଙ୍କ ଦ୍ୱାରା କରାଯାଇଥିଲା। ଏନେଇ ଗ୍ରୁପ୍ ଆଡମିନିଷ୍ଟ୍ରେଟରଙ୍କ ବିରୋଧରେ ଦୁଇ ସମ୍ପ୍ରଦାୟ ମଧ୍ୟରେ ଉତ୍ତେଜନା ସୃଷ୍ଟି ଏବଂ ଆପିତ୍ତିଜନକ କଣ୍ଟେଟ୍ ବ୍ୟବହାର ପାଇଁ ଭାରତୀୟ ପିଙ୍ଗଳ କୋଡ୍ ଧାରା ୧୫୩-ଏ ଏବଂ ୨୯୪-ବି ଅନ୍ତର୍ଗତ ମାମଲା ରୁଜୁ ହୋଇଥିଲା।
ଅଭିଯୁକ୍ତଙ୍କକ ତାଲିକାରୁ ନାମ ହଟାଇବା ଲାଗି ଗ୍ରୁପ୍ ଆଡମିନିଷ୍ଟ୍ରେଟର ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମାଡ୍ରାସ୍ ହାଇକୋର୍ଟ ୨୦୨୧ରେ ବମ୍ବେ ହାଇକୋର୍ଟଙ୍କ ପକ୍ଷରୁ ପ୍ରଦାନ କରାଯାଇଥିବା ଏକ ରାୟ ଆଧାରରେ କହିଛନ୍ତି ଯେ,ଏଭଳି କ୍ଷେତ୍ରରେ ଗ୍ରୁପ୍ ଆଡମିନିଷ୍ଟ୍ରେଟରଙ୍କର କୌଣସି ଦାୟିତ୍ୱ ନାହିଁ। ତାଙ୍କୁ ଏନେଇ ଅଭିଯୁକ୍ତ ଭାବେ ଗ୍ରହଣ କରାଯାଇ ପାରିବ ନାହିଁ। କାରଣ ସେ ଗ୍ରୁପ୍ର କେବଳ ଜଣେ ଆଡମିନିଷ୍ଟ୍ରେଟର। ଏନେଇ ତାଙ୍କୁ ଉତ୍ତରଦାୟୀ କରିହେବ ନାହିଁ। ଗ୍ରୁପ୍ ସଦସ୍ୟଙ୍କ କୌଣସି ଆପତ୍ତିଜନକ କାର୍ଯ୍ୟ ସେ ପୂର୍ବରୁ ଜାଣିବା ପ୍ରାୟ ଅସମ୍ଭବ।
କେବଳ ଗ୍ରୁପ୍ ସଦସ୍ୟଙ୍କୁ ସଂଯୁକ୍ତ କରିବା ଅବା ହଟାଇବା ଭଳି ସୀମିତ ଶକ୍ତି ଗ୍ରୁପ୍ ଆଡମିନିଷ୍ଟ୍ରେଟରଙ୍କ ପାଖରେ ରହିଥାଏ। ତେବେ କୌଣସି ପୋଷ୍ଟକୁ ନିୟନ୍ତ୍ରିତ, ମଡୋରେଟ୍ ଅବା ସେନସର କରିବା ଶକ୍ତି ଗ୍ରୁପ୍ ଆଡମିନିଷ୍ଟ୍ରେଟରଙ୍କ ପାଖରେ ନ ଥାଏ। ସେହିପରି ଯେ କୌଣସି ସଦସ୍ୟ ନିଜ ଇଛା ଅନୁସାରେ ଗ୍ରୁପ୍ରୁ ବାହାରି ଯାଇଥାନ୍ତି ବୋଲି କୋର୍ଟ କହିଛନ୍ତି।
