ଦାରିଙ୍ଗବାଡି,୬/୫(ଅରୁଣ ସାହୁ): ବେଶି ହେଇଗଲା ଆଉ ନୁହେଁ, ଏଣିକି ଅଳିଆ ଆବର୍ଜନା ପକାଇଲେ ତଣ୍ଡ ଗଣିବା ନିଶ୍ଚିତ। ପ୍ଲାଷ୍ଟିକ ହେଉ କି ଅଇଁଠା ଖଲିପତ୍ର କିମ୍ବା ପଲିଥିନ, ଚା’କପ ଆଦି ଏଣେ ତେଣେ ପକାଇଲେ ବ୍ୟବସାୟୀଙ୍କୁ ଅତିକମରେ ୫ ହଜାର ଟଙ୍କା ଜରିମାନା ଦେବାକୁ ପଡିବ। ଏଭଳି କଠୋର ନିଷ୍ପତି ନେଇଛି ଦାରିଙ୍ଗବାଡି ପ୍ରଶାସନ।
ପ୍ରକାଶ ଯେ, ଦାରିଙ୍ଗବାଡିକୁ ସବୁଜ ସୁନ୍ଦର କରିବା ପାଇଁ ବିଡ଼ିଓ ପ୍ରୀତିରଞ୍ଜନ ରଥ ପଦକ୍ଷେପ ନେବା ଆରମ୍ଭ କରିଛନ୍ତି। ଏଥିପାଇଁ ପ୍ରଶାସନ ଅଣ୍ଟା ଭିଡିଛି ଆଉ ମଙ୍ଗଳବାର ଠାରୁ ଜେସିବି ଟ୍ରାକ୍ଟର ଲଗାଇ ଶ୍ରମିକମାନଙ୍କ ଦ୍ୱାରା ଦାରିଙ୍ଗବାଡିର ବ୍ଲକ ରାସ୍ତା, ଚାରି ଛକ ମେଡିକାଲ, ବସଷ୍ଟାଣ୍ଡ, ତିନିଛକ ସମେତ କୋଣ ଅନୁକୋଣରେ ସଫେଇ କରାଯିବା କାର୍ଯ୍ୟ ଆରମ୍ଭ ହୋଇଛି। ସଫେଇ ସାରିବା ପରେ ଲୋକଙ୍କୁ ଅଳିଆ ଆବର୍ଜନା ନ ପକାଇବାକୁ ସଚେତନ କରାଯିବ, ଯିଏ ଅବମାନନା କରିବ ତାକୁ ତଣ୍ଡ ଦେବାକୁ ପଡିବ ବୋଲି ବିଡ଼ିଓ ପ୍ରୀତିରଞ୍ଜନ ରଥ କହିଛନ୍ତି।
ଦାରିଙ୍ଗବାଡିକୁ ବର୍ଷ ତମାମ ପର୍ଯ୍ୟଟକ ରାଜ୍ୟ ତଥା ରାଜ୍ୟ ବାହାରୁ ବୁଲିବାକୁ ଆସୁଛନ୍ତି ଦାରିଙ୍ଗବାଡିରେ ଅଳିଆ ଆବର୍ଜନା ଦେଖି ପର୍ଯ୍ୟଟକ ଉଦବେଗ ପ୍ରକାଶ କରିବା ସହ ନାପସନ୍ଦ କରୁଛନ୍ତି। ସେହିପରି କୁଢ଼ କୁଢ଼ ପ୍ଲାଷ୍ଟିକ ପାଇଁ ସବୁଜ ସୁନ୍ଦର ଦାରିଙ୍ଗବାଡିର ପରିବେଶ ନଷ୍ଟ ହେବାକୁ ବସିଲାଣି। ଏହାର ସ୍ଥାୟୀ ସମାଧାନ କରା ନ ଗଲେ ଆଗାମୀ ଦିନରେ ପର୍ଯ୍ୟଟକ ମୁହଁ ଫେରାଇବା ନିଶ୍ଚିତ ତେଣୁ ପ୍ରଶାସନ ଏହାର ସ୍ଥାୟୀ ସମାଧାନ ପାଇଁ ପ୍ରୟାସ ଆରମ୍ଭ କରିଥିବା ଜଣାପଡିଛି।
