ନୂଆପଡ଼ା ଅଫିସ, ୮ା୬: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ପଲସିପାଣି ପଞ୍ଚାୟତ କାଶିପଲା ଗାଁ ଲଳିତା ଶବରଙ୍କ ଚିକିତ୍ସା ପାଇଁ ଅର୍ଥ ସାଜିଛି ବାଧକ। ମା’ଙ୍କ ଚିକିତ୍ସା ପାଇଁ ହାଇଦ୍ରାବାଦକୁ ଦାଦନ ଖଟିବାକୁ ଯାଇଛନ୍ତି ଝିଅ, ପୁଅ ସମ୍ପର୍କିତ ଏକ ଖବର ଗତ ୫ ତାରିଖରେ ଧରିତ୍ରୀରେ ପ୍ରକାଶ ପାଇଥିଲା। ଏହା ପରେ ଜିଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ପକ୍ଷରୁ ତପତ୍ରତା ଦେଖାଇଛି।
ମଙ୍ଗଳବାର ଜିଲା ମୁଖ୍ୟ ଚିକିତ୍ସାଳୟରେ ଲଳିତାଙ୍କୁ ଭର୍ତ୍ତି କରାଯାଇଛି। ଲଳିତା ଦୀର୍ଘ ୩ ବର୍ଷରୁ ଊର୍ଦ୍ଧ୍ୱ ହେବ ଅନେକ ପ୍ରକାର ରୋଗରେ ପୀଡିତ ହୋଇଥିଲେ। ତାଙ୍କ ଚିକିତ୍ସା ପାଇଁ ତାଙ୍କ ସ୍ବାମୀ ରପୁସିଂ ଶବର (୫୦) ଜିଲା ତଥା ଜିଲା ବାହାର ଡାକ୍ତରଖାନା ଯାଇ ସର୍ବସ୍ବାନ୍ତ ହୋଇଯାଇଛନ୍ତି। ଲଳିତାଙ୍କୁ ବଞ୍ଚାଇବା ପାଇଁ ଜମି, ଗହଣା ସବୁ ବନ୍ଧକ ରଖି ସାରିଲେଣି। ମୁଁ ଜଣେ ଗରିବ ଆଦିବାସୀ ଶ୍ରେଣୀର ଲୋକ। ଦିନମଜୁରି କରି ପରିବାରର ୬ଜଣ ସଦସ୍ୟ ବହୁତ କଷ୍ଟରେ ଚଳୁଥିଲୁ। ଟଙ୍କା ଅଭାବରୁ ଝିଅପୁଅଙ୍କୁ ଅଧିକ ପଢାଇ ପାରିଲି ନାହିଁ। ପରିବାର କୁଲିମଜୁରୀ କରି ଚଳିବା ସହ ଯାହା ଘରେ ଥିଲା, ତାହା ସବୁ ସ୍ତ୍ରୀଙ୍କ ପାଇଁ ଖର୍ଚ୍ଚ ହେଲା। ଟଙ୍କା ଅଭାବରୁ ଝିଅ ଓ ପୁଅକୁ ହାଇଦ୍ରାବାଦ ଇଟା ତିଆରି କରିବା ପାଇଁ ପଠାଇ ଦେଇଛି। ସେମାନେ ଟଙ୍କା ଧରି ଆସିଲେ ଅନ୍ୟ କେଉଁଠି ଚିକିତ୍ସା ପାଇଁ ନେବୁ ବୋଲି ଲଳିତାଙ୍କ ସ୍ବାମୀ ରୁପସିଂ ଶବର କହିଛନ୍ତି। ଝିଅପୁଅର ଆସିବା ବାଟକୁ ଅନାଇ ବସିଥିଲି। ହେଲେ ଧରିତ୍ରୀ ଖବରରେ ଲଳିତାଙ୍କ ବିଷୟରେ ଖବର ପ୍ରକାଶ ହେବା ପରେ ଜିଲା ପ୍ରଶାସନ ଆମ ଦୁଃଖ ଜାଣି ପାରି ମୋ ସ୍ତ୍ରୀଙ୍କୁ ଆଣି ଚିକିତ୍ସା କରୁଛନ୍ତି। ଜଗନ୍ନାଥ ମୋ ସ୍ତ୍ରୀଙ୍କୁ ଶୀଘ୍ର ଭଲ କରନ୍ତୁ। ଦୁଃଖ ଶୁଣିଥିବା ଜିଲା ପ୍ରଶାସନ, ଧରିତ୍ରୀକୁ ମୋର କୋଟି କୋଟି ଧନ୍ୟବାଦ ବୋଲି ପ୍ରଶଂସା କରୁଛନ୍ତି ଲଳିତାଙ୍କ ସ୍ବାମୀ ରୁପସିଂ।
