ବମ୍ବେ: ପାଲେଷ୍ଟାଇନ ସଂଗଠନ ହମାସ ପକ୍ଷରୁ ଇସ୍ରାଏଲ ଉପରେ ଅଚାନକ ଆକ୍ରମଣ କରାଯାଇଥିଲା। ଏହାପରଠାରୁ ଉଭୟଙ୍କ ମଧ୍ୟରେ ଭୟଙ୍କର ଯୁଦ୍ଧ ଜାରି ରହିଛି, ଯାହାର ପରିଣାମସ୍ବରୂପ ଧ୍ୱଂସସ୍ତୁପରେ ପରିଣତ ହେଲାଣି ଗାଜା। ଏହାକୁ ନେଇ ଜାତିସଂଘଠାରୁ ଆରମ୍ଭ କରି ବିଶ୍ୱର ଅନେକ ଦେଶ ଚିନ୍ତା ବ୍ୟକ୍ତ କରିବା ସହ ଯୁଦ୍ଧ ବନ୍ଦ କରିବାକୁ ଅପିଲ କରୁଛନ୍ତି। ହେଲେ ହମାସକୁ ମୂଳପୋଛ ନ କରିବା ଯାଏ ଇସ୍ରାଏଲ ରୋକିବ ନାହିଁ ବୋଲି ସ୍ପଷ୍ଟ କରିଛି। ଫଳରେ ଦେଶକୁ ସମାଲୋଚନାର ଶିକାର ହେବାକୁ ପଡ଼ୁଛି। ଏବେ ଭାରତର ସେଲିବ୍ରିଟିମାନେ ଯୁଦ୍ଧକୁ ନେଇ ନିଜର ମତ ରଖିବା ଆରମ୍ଭ କରିଛନ୍ତି।
ଫିଲ୍ମ ଅଭିନେତ୍ରୀ ତଥା ଅକ୍ଷୟ କୁମାରଙ୍କ ପତ୍ନୀ ଟ୍ବିଙ୍କିଲ ଖନ୍ନା ଏକ ସ୍କ୍ରିନଶଟ୍ ଶେୟାର କରି ଏକ ଦାବି କରିଛନ୍ତି। ଏହା ମୁତାବକ ୨୦୧୯ରେ ସାରା ବିଶ୍ୱରେ ହୋଇଥିବା ବିବାଦ ମଧ୍ୟରେ ଯେତିକି ଶିଶୁ ପ୍ରାଣ ହରାଇନାହାନ୍ତି, ତାଠାରୁ ଅଧିକ ଗାଜାରେ ଗତ ୩ ସପ୍ତାହ ମଧ୍ୟରେ ମୃତ୍ୟୁମୁଖରେ ପଡ଼ିଛନ୍ତି ବୋଲି ସେଥିରେ କୁହାଯାଇଛି। ଏହି ସଂଖ୍ୟା ‘ସେଭ୍ ଦ ଚିଲ୍ଡେନ୍’ ଏନ୍ଜିଓ ପକ୍ଷରୁ ଜାରି କରାଯାଇଛି। ଏହାକୁ ଶେୟାର କରି ଟ୍ବିଙ୍କିଲ୍ ଲେଖିଛନ୍ତି ‘ଆମେ ଏସବୁ କିଭଳି ହେବାକୁ ଦେଉଛେ’।
କହିରଖୁଛୁ, ଏଯାବତ ଗାଜା ଉପରେ ଇସ୍ରାଏଲର ଆକ୍ରମଣ ଜାରି ରହିଛି। ରିପୋର୍ଟ ଅନୁଯାୟୀ ଗାଜାରୁ ୧୦୦୦ରୁ ଅଧିକ ଶିଶୁ ନିଖୋଜ ଅଛନ୍ତି। ସେମାନେ ବୋମା ବିସ୍ଫୋରଣରେ ଭାଙ୍ଗିପଡ଼ିଥିବା କୋଠା ତଳେ ଦବି ହୋଇ ରହିଥିବା ଆଶଙ୍କା କରାଯାଉଛି। ଏଯାବତ ଗାଜାରେ ପ୍ରାୟ ୮୦୦୦ ଲୋକଙ୍କ ମୃତ୍ୟୁ ଘଟିଛି। ଏଥିରେ ପ୍ରାୟ ୪୦% ଶିଶୁ। ସେହିଭଳି ୬୦୦୦ରୁ ଅଧିକ ଶିଶୁ ଆହତ ହୋଇଛନ୍ତି।
