ତଦନ୍ତ ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ: ଡିଏଫ୍‌ଓ
7:22 amJune 26, 2020 / 21

ଢେଙ୍କାନାଳ ଅଫିସ, ୨୬।୬
ଢେଙ୍କାନାଳ ସହର ଗଣେଶ ବଜାର ନିକଟ ଫରେଷ୍ଟ କଲୋନୀ ବୋମା ବିସ୍ଫୋରଣ ଘଟଣାରେ ଥାନାରେ ମାମଲା (ନଂ.୨୭୨/୨୦) ରୁଜୁ ହେବା ପରେ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି। ଘଟଣାରେ ଗୁରୁତର ହୋଇଥିବା ହାତୀ ସ୍କ୍ବାଡ୍‌ କର୍ମଚାରୀ ସୁଜିତ କୁମାର ସାମଲ (୪୦)ଙ୍କ ଆଖି ଏବଂ ଡାହାଣ ହାତ ପାପୁଲିରେ ଗଭୀର କ୍ଷତ ସୃଷ୍ଟି ହୋଇଥିବାବେଳେ ସେ ଏବେ ଭୁବନେଶ୍ୱରସ୍ଥିତ ଏକ ଘରୋଇ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ତଦନ୍ତ ରିପୋର୍ଟ ମିଳିବା ପରେ ବନ ବିଭାଗ ପକ୍ଷରୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଗୁରୁବାର ଜିଲା ବନଖଣ୍ଡ ଅଧିକାରୀ ବିମଳ ପ୍ରସନ୍ନ ଆଚାର୍ଯ୍ୟ ସୂଚନା ଦେଇଛନ୍ତି।
ସୂଚନାଯୋଗ୍ୟ, ବୁଧବାର ପୂର୍ବାହ୍ନରେ ହାତୀ ଘଉଡ଼ାଇବାକୁ ରଖାଯାଇଥିବା ବୋମା ବିସ୍ଫୋରଣରେ ଫରେଷ୍ଟ କଲୋନୀର ଏକ କ୍ୱାର୍ଟର୍ସ ଆଜବେଷ୍ଟସ୍‌ ଉଡ଼ିଯିବା ସହ କଂକ୍ରିଟ୍‌ ପିଲର ଭୁଶୁଡ଼ି ଯାଇଥିଲା। ବୋମା ବିସ୍ଫୋରଣରେ ଗୁରୁତର ହୋଇଥିବା ସୁଜିତଙ୍କୁ କଟକ ବଡ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ରାତିରେ ଭୁବନେଶ୍ୱରସ୍ଥିତ ଏକ ଘରୋଇ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏ ସଂକ୍ରାନ୍ତରେ ଡିଏଫ୍‌ଓ କୁହନ୍ତି, ଜିଲାରେ ୨୭୮ ହାତୀ ସ୍କ୍ବାଡ୍‌ ସଦସ୍ୟ ଅଛନ୍ତି। ଇପିଏଫ ଏବଂ ଇଏସ୍‌ଆଇ ମିଶାଇ ଜଣକୁ ମାସିକ ୧୨,୦୫୧ ଟଙ୍କା ପ୍ରଦାନ କରାଯାଉଛି। ହାତୀ ଘଉଡ଼ାଇବାରେ ସୁଜିତ ଜଣେ ଦକ୍ଷ କର୍ମଚାରୀ। ବନ କର୍ମଚାରୀମାନେ ତାଙ୍କ ଚିକିତ୍ସା ଲାଗି ସହାୟତାର ହାତ ବଢ଼ାଇଛନ୍ତି। ସେହିପରି ହାତୀ ସ୍କ୍ବାଡ୍‌ କର୍ମଚାରୀଙ୍କୁ ଅଧିକାରୀମାନେ ବ୍ୟକ୍ତିଗତ କାର୍ଯ୍ୟରେ ଲଗାଉଥିବା ଅଭିଯୋଗ ସମ୍ପର୍କରେ ସେ କହିଛନ୍ତି ଯେ, ଏ ନେଇ ତାଙ୍କ ନିକଟରେ କୌଣସି ଅଭିଯୋଗ ହୋଇନାହିଁ। ଯଦି ଏଭଳି କିଛି ହେଉଥାଏ ତେବେ ତାହା ନିନ୍ଦନୀୟ। ଦୁର୍ଘଟଣା ସମ୍ପର୍କରେ ପିସିସିଏଫ୍‌ ସାଧାରଣ ପ୍ରଶାସନ, ପିସିସିଏଫ୍‌ ବନ୍ୟପ୍ରାଣୀ, ଅନୁଗୋଳସ୍ଥିତ ଆରସିସିଏଫ୍‌ଙ୍କୁ ଅବଗତ କରାଯାଇଥିବା ଡିଏଫ୍‌ଓ ସୂଚନା ଦେଇଛନ୍ତି।