ଦିଗପହଣ୍ଡି,୨୦ା୧୨(ଅଶେଷ ନାଥ ମିଶ୍ର): ଦିଗପହଣ୍ଡି କୋର୍ଟ ମାଜିଷ୍ଟ୍ରେଟ ନିଳୀମା ଷଡ଼ଙ୍ଗୀ ଶୁକ୍ରବାର ଜଣେ ଆଶାକର୍ମୀଙ୍କୁ ରାଜରାସ୍ତାରେ ଅସଦାଚରଣ ମାମଲାର ଶୁଣାଣି କରି ଅଭିଯୁକ୍ତଙ୍କୁ ଅର୍ଥ ଦଣ୍ଡରେ ଦଣ୍ଡିତ କରିଛନ୍ତି। ଦିଗପହଣ୍ଡି ଥାନା ଡଙ୍କାରି ଗ୍ରାମର ଅଭିଯୁକ୍ତ ନରି ଗୌଡ଼ ଦଣ୍ଡିତ ଅର୍ଥରାଶି କୋର୍ଟରେ ଜମା କରିବା ପରେ ତାଙ୍କୁ ଛାଡ଼ି ଦିଆଯାଇଛି।
୨୦୦୯ ଜାନୁଆରୀ ୩ ତାରିଖରେ ଆଶାକର୍ମୀ ଏବଂ ତାଙ୍କ ସହ ଅନ୍ୟ ଜଣେ ସହକର୍ମୀ ସିଦ୍ଧେଶ୍ୱର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଅନୁଷ୍ଠିତ ବୈଠକରୁ ଫେରି ଗାଁକୁ ଯିବାପାଇଁ ଗଣିଆନାଳ ଛକରେ ଛିଡ଼ା ହୋଇଥିଲେ। ସେତିକିବେଳେ ଅଭିଯୁକ୍ତ ନରି ସେଠାରେ ପହଞ୍ଚି ଆଶାକର୍ମୀଙ୍କୁ ପ୍ରେମ ନିବେଦନ କରିବା ସହ କଟୁ କଥା କହିଥିଲେ।
ଏପରିକି ଆଶାକର୍ମୀ ଗାଁକୁ ଯାଉଥିବା ବେଳେ ଅଭିଯୁକ୍ତ ଜଣକ ସାଇକେଲରୁ ଓହ୍ଲାଇ ତାଙ୍କୁ ଦୁର୍ବ୍ୟବହାର କରି ଅସଦାଚରଣ କରିଥିଲେ। ଏନେଇ ଆଶାକର୍ମୀ ଦିଗପହଣ୍ଡି ଥାନାରେ ଏତଲା ଦେଇଥିଲେ। ପୋଲିସ ଏକ ମାମଲା(ନଂ. ୨୦୯) ରୁଜୁ କରି ତଦନ୍ତ ପରେ ଅଭିଯୁକ୍ତଙ୍କ ବିରୋଧରେ କୋର୍ଟରେ ଚାର୍ଜସିଟ ଦାଖଲ କରିଥିଲା।
ସମସ୍ତ ସାକ୍ଷ୍ୟଙ୍କ ବୟାନ ଏବଂ ଉଭୟ ପକ୍ଷଙ୍କ ଯୁକ୍ତି ଶୁଣିବା ପରେ ମାଜିଷ୍ଟ୍ରେଟ ଆଇପିସିର ଦଫା ୩୪୧ ଏବଂ ୫୦୯ରେ ଅଭିଯୁକ୍ତଙ୍କୁ ୮ ଶହ ଟଙ୍କା ଜରିମାନା ପ୍ରଦାନ ପାଇଁ ଆଦେଶ ଦେଇଥିଲେ। ଜରିମାନା ଅନାଦେୟ ଅଭିଯୁକ୍ତଙ୍କୁ ୧୭ ଦିନ ପାଇଁ ଜେଲ ଦଣ୍ଡାଦେଶର ଶୁଣାଣି କରିଥିଲେ। ତେବେ ଶେଷ ମୂହୁର୍ତ୍ତରେ ଅଭିଯୁକ୍ତ ଜରିମାନା ଅର୍ଥ କୋର୍ଟରେ ଦାଖଲ କରିଥିବା ଜଣାପଡିଛି। ଆଶାକର୍ମୀଙ୍କ ପକ୍ଷରୁ ଏପିପି ବିପ୍ଲବ କୁମାର ମୁଦୁଲି ଏବଂ ସରକାରୀ ଓକିଲ ନକୁଳ ପ୍ରଧାନ ମାମଲା ପରିଚାଳନା କରୁଥିଲେ।
