ଦିଗପହଣ୍ଡି,୨୮ା୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ କେ.ନୂଆଗାଁ ଥାନା ରାଇଗୁଡ଼ା ଗ୍ରାମର ମମତା ଦଳାଇଙ୍କୁ ଘରେ ପଶି ଜୀବନରେ ମାରି ଦେବାକୁ ଧମକ ଦେବା ଓ ସୁନା ଗହଣା ଲୁଟି ନେବା ଅଭିଯୋଗରେ ରବିବାର ଜଣଙ୍କୁ ନୂଆପଡ଼ା ଫାଣ୍ଡି ପୋଲିସ ଗିରଫ କରି କୋର୍ଟ ଚାଲାଣ କରିଛନ୍ତି। ସେ ହେଲେ ରାଇଗୁଡ଼ା ଗ୍ରାମର ପବିତ୍ର ପାଇକ।
ଥାନା ମାମଲା ନଂ.୩୩୫/୨୫ ଅନୁଯାୟୀ ଜାମିନ ନାମଞ୍ଜୁର ହେବାରୁ ପବିତ୍ରଙ୍କୁ ଦିଗପହଣ୍ଡି ସବ୍ଜେଲ ହାଜତକୁ ପଠାଯାଇଛି। ଶୁକ୍ରବାର ଅପରାହ୍ନରେ ଘରେ କେହି ନ ଥିବା ବେଳେ ପୂର୍ବ ରାଜନୈତିକ ଶତ୍ରୁତାକୁ କେନ୍ଦ୍ରକରି ପବିତ୍ର ଏବଂ ତାଙ୍କ ୨ ସହଯୋଗୀ ମମତାଙ୍କ ଘରେ ପଶି ତାଙ୍କୁ ଗାଳିଗୁଲଜ କରି ଆସବାବପତ୍ର ଫୋପାଡା ଫିଙ୍ଗା କରିଥିଲେ। ତାଙ୍କୁ ଭୟଭୀତ କରି ସୁନା ଅଳଙ୍କାର ଲୁଟି ନେଇଥିଲେ।
ଗର୍ଭବତୀ ଥିବା ମମତାଙ୍କ ଯାଆ ଚାଷଜମିରୁ କାମସାରି ଘରକୁ ଫେରିବା ପରେ ଘର ଭିତରେ ପବିତ୍ର ଥିବା ଦେଖିବାକୁ ପାଇଥିଲେ। ଘଟଣା କଣ ପଚାରିବାରୁ ତାଙ୍କୁ ମଧ୍ୟ ଅଭିଯୁକ୍ତ ଆପତ୍ତିଜନକ ଭାଷାରେ ଗାଳି କରି ଅସଦାଚରଣ ପ୍ରଦର୍ଶନ କରିବାକୁ ପଛାଇ ନ ଥିଲେ।
ପାଟି ଶୁଣି ମମତାଙ୍କ ଦିଅର ଦୌଡ଼ି ଆସି ତାଙ୍କୁ ଉଦ୍ଧାର କରିଥିଲେ। ଏନେଇ ମମତା କେ. ନୂଆଗାଁ ଥାନାରେ ଏତଲା ଦେବା ପରେ ଆଇଆଇସି କିଶୋର କୁମାର ସାମଲ ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ କରିଥିଲେ। ଘଟଣା ପରଦିନ ରାତିରେ ପୁଣି ଅଭିଯୁକ୍ତ ପବିତ୍ର ମମତାଙ୍କ ଘର ପାଖକୁ ଆସି ତୁ ମୋ ନାଁ ରେ କେସ୍ କରିଛୁ ପରା ତୋତେ ଜୀବନରେ ମାରିଦେବି ବୋଲି ଧମକ ଦେଇଥିବା ପ୍ରାଥମିକ ତଦନ୍ତରୁ ଜଣାପଡିଥିବା ଏହାର ତଦନ୍ତ କରୁଥିବା ତଦନ୍ତକାରୀ ଅଧିକାରୀ ତଥା ନୂଆପଡ଼ା ଫାଣ୍ଡି ଅଧିକାରୀ ଜଗବନ୍ଧୁ ବାର୍ଲା କହିଛନ୍ତି।
