ବ୍ରହ୍ମପୁର ଅଫିସ,୨୭।୨: ଗଞ୍ଜାମ ଜିଲା ସଦର ଥାନା ଅନ୍ତର୍ଗତ ଅଳକାପୁରୀ ସପ୍ତମ ଲାଇନ୍ରେ ରହୁଥିବା ସୁରଜା ବେହେରା(୬୦)ଙ୍କୁ ବୁଧବାର ଗଳାକାଟି ହତ୍ୟା କରାଯାଇଥିଲା। ଏହି ଘଟଣାରେ ଚମ୍ପଟ ମାରିଥିବା ଅଭିଯୁକ୍ତଙ୍କୁ ପୋଲିସ ଭଞ୍ଜନଗରରୁ ଶୁକ୍ରବାର ବିଳମ୍ବିତ ରାତିରେ କାବୁ କରିଛି। ସେ ଏକ ଆଲମିରା ଫ୍ୟାକ୍ଟ୍ରିରେ କାମ କରୁଥିବା ଜଣାପଡିଛି। ଉକ୍ତ ଘରେ ଏକାକୀ ରହୁଥିବା ବରିଷ୍ଠ ନାଗରିକଙ୍କ ଘରୁ ଲୁଟ ପାଇଁ ଆସିଥିବା ଅଭିଯୁକ୍ତ ଘର ଭିତରୁ ଟଙ୍କା ଓ ସୁନାଗହଣା ଲୁଟି ନ ପାରି ସୁରଜାଙ୍କୁ କେବଳ ହତ୍ୟା କରିଥିଲେ ବୋଲି ପୋଲିସ ସ୍ପଷ୍ଟ କରିଛି। ଘର ଭିତରେ ଅପରାଧୀ ଓ ଏକାକୀ ଥିବା ମହିଳାଙ୍କ ମଧ୍ୟରେ ଧସ୍ତାଧସ୍ତି ହୋଇଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଛି। ଶେଷରେ ଅଭିଯୁକ୍ତ ଏକ ଧାରୁଆ ଅସ୍ତ୍ରରେ ମହିଳାଙ୍କୁ ଭୁସି ହତ୍ୟା କରି ଚମ୍ପଟ ମାରିଥିଲେ ବୋଲି ସନ୍ଦେହ କରୁଛି। ଘଟଣାରେ ବ୍ୟବହୃତ ରକ୍ତଭିଜା ମାରଣାସ୍ତ୍ରକୁ ପୋଲିସ ଜବତ କରି ପାରିନଥିବା ଜଣାପଡିଛି। ତଦନ୍ତରେ ବାଧା ଦୃଷ୍ଟିରୁ ଅପରାଧୀଙ୍କ ପରିଚୟ କହିବାକୁ ପୋଲିସ ମନା କରିଛି। ମହିଳାଙ୍କୁ ହତ୍ୟା ପରେ ଅଭିଯୁକ୍ତ ଲୁଟି ନେଇଥିବା ମୋବାଇଲ ପୋଲିସ ଲୋଚାପଡା ନିକଟସ୍ଥ ଏକ ନାଳକଡ଼ରୁ ଜବତ କରିଛି। ଶୀଘ୍ର ହତ୍ୟାକାଣ୍ଡର ଖୁଲାସା କରିବ ବୋଲି ପୋଲିସ କହିଛି।
ସୂଚନାଯୋଗ୍ୟ, କାର୍ଯ୍ୟରୁ ଅବସର ନେବା ପରେ ୨୦୧୦ରେ ବିଜୟ ଅଳକାପୁରୀରେ ଏକ ଘର ନିର୍ମାଣ କରି ସେଠାରେ ସ୍ତ୍ରୀ ସୁରଜାଙ୍କ ସହ ରହୁଥିଲେ। ତାଙ୍କର ଏକମାତ୍ର ପୁଅ ରଶ୍ମିରଞ୍ଜନଙ୍କର ଗତ ଏକ ମାସ ତଳେ ବାହାଘର ହୋଇଥିଲା। ସେ ଓ ତାଙ୍କ ସ୍ତ୍ରୀ ଭୁବନେଶ୍ୱରରେ ରହୁଥିଲେ। ଗତ ୨୪ ତାରିଖରେ ବିଜୟ ପ୍ରତିଦିନ ଭଳି ଘରେ ତାଲାଦେଇ ସାନ୍ଧ୍ୟ ଭ୍ରମଣରେ ଯାଇଥିଲେ। କିଛି ସମୟ ପରେ ସେ ସୁରଜାଙ୍କୁ ଫୋନ କରିଥିଲେ। ମୋବାଇଲ ସୁଇଚ୍ ଅଫ ଥିବାରୁ ବିଜୟ ତାଙ୍କ ପୁଅକୁ ଏନେଇ ଫୋନ କରି ଜଣାଇଥିଲେ। ପରେ ସେ ଘରକୁ ଫେରି ଘର ବାହାର ପଟେ ପଡିଥିବା ତାଲା ଭାଙ୍ଗି ଘର ଭିତରକୁ ଯାଇଥିଲେ। ସେଠାରେ ସୁରଜା ରକ୍ତ ଜୁଡୁବୁଡୁ ଅବସ୍ଥାରେ ଏକ ଖଟରେ ପଡିଥିବା ଦେଖି ପୋଲିସକୁ ଜଣାଇଥିଲେ।
