ଆନନ୍ଦପୁର,୭।୭(ସନ୍ତୋଷ ରାଉତ): ପ୍ରଧାନମନ୍ତ୍ରୀ ଆବାସ କାର୍ଯ୍ୟାଦେଶ ସହିତ ପ୍ରଥମ କିସ୍ତି ମିଳିବାର ବ୍ୟବସ୍ଥା ରହିଛି। ଗୃହି ନିର୍ମାଣ ନିମନ୍ତେ ଆର୍ଥିକ ସହାୟତା ରାଶି ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଜମାଖାତାରେ ଦାଖଲ ହେବା କଥା। ମାତ୍ର ଆନନ୍ଦପୁର ବ୍ଲକ୍ରେ ଏହାର ବ୍ୟତିକ୍ରମ ପରିଲକ୍ଷିତ ହୋଇଛି। ୧୫ ଦିନ ହେବ କାର୍ଯ୍ୟାଦେଶ ମିଳିଥିଲେ ବି ପ୍ରଥମ କିସ୍ତି ଟଙ୍କା ଏପର୍ଯ୍ୟନ୍ତ ଆସିନାହିଁ। ଫଳରେ ଦିବ୍ୟାଙ୍ଗ ହିତାଧିକାରୀ ଘର କାର୍ଯ୍ୟ ଆରମ୍ଭ କରିପାରୁନାହାନ୍ତି।
ଆନନ୍ଦପୁର ବ୍ଲକ୍ ମୋଚିନ୍ଦା ପଞ୍ଚାୟତ ମୋଚିନ୍ଦା ଗ୍ରାମର ଆନନ୍ଦ ସାହୁଙ୍କ ପୁଅ ଦିବ୍ୟାଙ୍ଗ ପ୍ରଭାତ କୁମାର ସାହୁଙ୍କ ନାମରେ କାର୍ଯ୍ୟାଦେଶ ସଂଖ୍ୟା ଓଡି/୦୩/୦୦୮/୫୦୩୪/୨୨-୨୩ ଅନୁଯାୟୀ ୧୯ ଜୁନ ୨୦୨୩ରେ ଆବାସ କାର୍ଯ୍ୟାଦେଶ ଆସିଛି। ମାତ୍ର ଅଦ୍ୟାବଧି ତାଙ୍କ ବ୍ୟାଙ୍କ ଜମାଖାତାକୁ ପ୍ରଥମ କିସ୍ତିର ଅର୍ଥ ଆସିନାହିଁ। ଫଳରେ ହିତାଧିକାରୀଙ୍କ ପକ୍ଷରୁ ଆବାସ କାର୍ଯ୍ୟ ଆରମ୍ଭ କରିବାରେ ସମସ୍ୟା ସୃଷ୍ଟି ହେଉଛି। କାର୍ଯ୍ୟାଦେଶ ପାଇବାର ୪ ମାସ ମଧ୍ୟରେ ଗୃହ କାର୍ଯ୍ୟ ଶେଷ କଲେ ରାଜ୍ୟ ସରକାରଙ୍କ ତରଫରୁ ୨୦ ହଜାର ଟଙ୍କା, ୬ ମାସ ମଧ୍ୟରେ ଶେଷ ହେଲେ ୧୦ ହଜାର ଟଙ୍କାର ପ୍ରୋତ୍ସାହନ ମିଳିବାର ବ୍ୟବସ୍ଥା ରହିଛି। ଏଭଳି କ୍ଷେତ୍ରରେ ହିତାଧିକାରୀ ପ୍ରୋତ୍ସାହନ ରାଶିରୁ ବଞ୍ଚତ୍ତ ହେବାର ସମ୍ଭାବନା ରହିଛି। ଏନେଇ ପ୍ରଭାତଙ୍କ ବାପା ଆନନ୍ଦ ସାହୁ ଭିଏଲଡବ୍ଲ୍ୟୁଙ୍କୁ ସାକ୍ଷାତ କରି କାରଣ ପଚାରିବାରୁ ଦୁର୍ବ୍ୟବହାରର ଶିକାର ହୋଇଥିବା କହିଛନ୍ତି। ଏ ନେଇ ସେ ଆନନ୍ଦପୁର ଉପଜିଲାପାଳଙ୍କୁ ବୁଧବାର ଦାବିପତ୍ର ପ୍ରଦାନ କରିଛନ୍ତି। ଅଭିଯୋଗର କପି ଜିଲାପାଳ, ୫-ଟି ସଚିବଙ୍କ ଉଦ୍ଦେଶ୍ୟରେ ପ୍ରେରଣ କରିଛନ୍ତି। ଅଭିଯୋଗକୁ ଆଧାର କରି ଘଟଣା ଦିଗରେ ତଦନ୍ତ ପୂର୍ବକ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ଅନିଲ କୁମାର ସେଠୀ କହିଛନ୍ତି।
ସୂଚନାଯୋଗ୍ୟ, ପ୍ରଭାତ ଜଣେ ମେଧାବୀ ଛାତ୍ର। ପରିବାରର ସମସ୍ୟାକୁ ନେଇ ଆବାସ ତାଲିକାରେ ଅନ୍ତର୍ଭୁକ୍ତ କରିବା ନିମନ୍ତେ ପୂର୍ବରୁ ୫-ଟି ସଚିବଙ୍କ ନିକଟରେ ନିବେଦନ କରିଥିଲେ। ପରେ ଜିଲାପାଳଙ୍କ ଅଭିଯୋଗ ଶୁଣାଣିରେ ନିବେଦନ କରିଥିଲେ। ବ୍ଲକ୍ କର୍ତ୍ତୃପକ୍ଷ ଆବଶ୍ୟକ ତଦନ୍ତ ପରେ ଆବାସ କାର୍ଯ୍ୟାଦେଶ ମଞ୍ଜୁର କରିଥିଲେ।
