ଦିଗପହଣ୍ଡି,୮|୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବି. ତୁରୁବୁଡ଼ି ପଞ୍ଚାୟତ ପିଲିକାଢ଼ିଅ ଗ୍ରାମ ନିକଟ କେରାଣ୍ଡି ମାଳ ପାହାଡ଼ ବାଙ୍କେଶ୍ୱରୀ ଘାଟି ରାସ୍ତାରେ ରବିବାର ପୂର୍ବାହ୍ନ ପ୍ରାୟ ୧୦ ଟାରେ ଏକ ପିକ୍ଅପ୍ ଭ୍ୟାନ (ନଂ.ଓଆର୦୭ ଟି -୪୧୫୭)ନିୟନ୍ତ୍ରଣ ହରାଇ ରାସ୍ତାକଡକୁ ଓଲଟି ପଡ଼ିବାରୁ ୧୨ ଜଣ ଆହାତ ହୋଇଛନ୍ତି। ଆହାତଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି। ଗୁରୁତରମାନେ ହେଲେ ସାନଖେମୁଣ୍ଡି ବ୍ଲକ ପାଟପୁର ଥାନା ହରିଣା ଗ୍ରାମର ସୁବାସି ମହାଙ୍କୁଡ(୬୦),ଲକ୍ଷ୍ମୀ ମହାଙ୍କୁଡ(୫୦),ଶୁଭସ୍ମିତା ମହାଙ୍କୁଡ଼(୧୭), ସୁୁଦେଷ୍ଣା ଗୌଡ଼(୪୫) ଏବଂ ଧର୍ମପୁର ଗ୍ରାମର କୁନି ଗୌଡ଼(୫୦)।ସମସ୍ତ ଆହାତମାନଙ୍କୁ ଦିଗପହଣ୍ଡି ଅଗ୍ନିଶମ ବାହିନୀ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।
ପ୍ରାଥମିକ ଚିକିତ୍ସା ପରେ ୫ ଗୁରୁତରଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଆହାତ ମାନଙ୍କ ପରିଚୟ ମିଳିପାରିନାହିଁ। ଧର୍ମପୁର ଗାଁର ଜଟିଆ ଗୌଡ଼ ତାଙ୍କ ପୁଅଙ୍କ ମୁଣ୍ଡନ ପୂଜା କାର୍ଯ୍ୟ ପାଇଁ କେରାଣ୍ଡିିମାଳ ପର୍ବତ ଶିଖରରେ ପୂଜା ପାଉଥିବା ମା’ ବାଙ୍କେଶ୍ୱରୀଙ୍କ ପୀଠକୁ ପରିବାର ଲୋକେ ବନ୍ଧୁବାନ୍ଧବଙ୍କ ସହ ଯାଇଥିଲେ। ସେଠାରେ ଅନୁଷ୍ଠିତ ହେଉଥିବା ଭୋଜିରେ ଯୋଗଦେବା ପାଇଁ ଜଟିଆଙ୍କ ବନ୍ଧୁ ବାନ୍ଧବ ପିକ୍ଅପ୍ ଭ୍ୟାନରେ ବସି ଯାଉଥିବା ବେଳେ ଚାଳକ ନିୟନ୍ତ୍ରଣ ହରାଇବାରୁ ଭ୍ୟାନଟି ରାସ୍ତାକଡକୁ ଓଲଟି ପଡ଼ିଥିଲା। ଚାଳକ ଭ୍ୟାନରୁ ଡେଇଁ ପଡ଼ିବାରୁ ସେ ଆହାତ ହୋଇ ନ ଥିବା ଜଣାପଡ଼ିଛି ।ଦିଗପହଣ୍ଡି ଥାନା ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗସ୍ତ ଭ୍ୟାନକୁ ଜବତ କରିଛନ୍ତି।
