ଜେନେଭା, ୩୦।୩ : ମିଳିତ ଜାତିସଂଘ କହିଛି ଯେ ପୃଥିବୀର ପ୍ରାୟ ୫୦ ପ୍ରତିଶତ ଗର୍ଭଧାରଣ ଅନିଚ୍ଛାକୃତ ଏବଂ ଏହା ଏକ ମାନବିକ ଅଧିକାର ସଙ୍କଟ। ୟୁକ୍ରେନ ଯୁଦ୍ଧ ଯୋଗୁ ଏହି ସଙ୍କଟ ଆହୁରି ବିଗିଡି ଯାଇପାରେ ବୋଲି ଜାତିସଂଘ ଚେତାବନୀ ଦେଇଛି। ମିଳିତ ଜାତିସଂଘର ଜନସଂଖ୍ୟା ଫଣ୍ଡ(ୟୁଏନଏଫପିଏ) ଏହାର ସଦ୍ୟତମ ରିପୋର୍ଟରେ କହିଛି ଯେ ପୃଥିବୀରେ ପ୍ରତିବର୍ଷ ୧୨ କୋଟି ଅନିଚ୍ଛାକୃତ ଗର୍ଭଧାରଣ ଘଟିଥାଏ। ଏଥିପାଇଁ ପୂର୍ବରୁ କୌଣସି ଯୋଜନା କରା ଯାଇ ନ ଥାଏ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
ଏଭଳି ଘଟଣାରେ ୬୦ ପ୍ରତିଶତରୁ ଅଧିକ ଗର୍ଭପାତ କରାଯାଇଥାଏ। ସେଥିରୁ ପ୍ରାୟ ଅଧା ଅସୁରକ୍ଷିତ ଭାବରେ ହୋଇଥାଏ। ୟୁଏନଏଫପିଏ କହିଛି ଯେ ଏହା ଲିଙ୍ଗଗତ ଅସମାନତା, ଦାରିଦ୍ର୍ୟ, ଯୌନ ହିଂସା, ଗର୍ଭନିରୋଧକ ପଦକ୍ଷେପ ଗ୍ରହଣ ନକରିବା ଏବଂ ଗର୍ଭପାତ ପଦକ୍ଷେପ ନ ଆପଣେଇବାକୁ ଅଧିକ ଗୁରୁତର କରୁଛି।
ଆଫଗାନିସ୍ତାନରେ ଜାରି ରହିଥିବା ସଙ୍କଟ ଯୋଗୁ ୨୦୨୫ ସୁଦ୍ଧା ୪୮ ଲକ୍ଷ ମହିଳା ଅନିଚ୍ଛାକୃତ ଗର୍ଭବତୀ ହେବାର ଆଶଙ୍କା ରହିଛି। ୟୁଏନଏଫପିଏ କହିଛି ଯେ କରୋନା ମହାମାରୀରେ ସ୍ବାସ୍ଥ୍ୟ ସେବା ତଥା ଗର୍ଭନିରୋଧକ ସାମଗ୍ରୀ ଯୋଗାଣ ଗୁରୁତର ଭାବରେ ବ୍ୟାହତ ହୋଇଛି ଏବଂ ମହାମାରୀର ପ୍ରଥମ ବର୍ଷରେ ୧୪ ଲକ୍ଷ ଅନିଚ୍ଛାକୃତ ଗର୍ଭଧାରଣ ରିପୋର୍ଟ ପଞ୍ଜିକୃତ ହୋଇଛି। ପ୍ରତିବର୍ଷ ଅସୁରକ୍ଷିତ ଗର୍ଭପାତ ଯୋଗୁ ୭୦ ଲକ୍ଷରୁ ଅଧିକ ମହିଳାଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡ଼ିଥାଏ। ଏଭଳି ସ୍ଥିତି ସାମ୍ପ୍ରତିକ ରୁଷିଆ ୟୁକ୍ରେନ୍ ଯୁଦ୍ଧ ଯୋଗୁ ପୁଣି ବୃଦ୍ଧି ପାଇବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
