ନୂଆଦିଲ୍ଲୀ,୧୨।୧୦: ରଣଜୀ ଟ୍ରଫିର ନୂଆ ସିଜନ ଅକ୍ଟୋବର ୧୧ରୁ ଆରମ୍ଭ ହୋଇଛି। ବଙ୍ଗଳା ଓ ଦିଲ୍ଲୀ ମଧ୍ୟରେ ଖେଳାଯାଉଥିବା ମ୍ୟାଚରେ ବଙ୍ଗଳା ଦଳ ଦିଲ୍ଲୀ ଉପରେ ଚାପ ସୃଷ୍ଟି କରିଛି। ପ୍ରଥମେ ବୋଲିଂରେ ମହମ୍ମଦ ଶାମି ଚମତ୍କାର ପ୍ରଦର୍ଶନ କରିଥିବା ବେଳେ, ପରେ ବ୍ୟାଟିଂରେ ଅଭିଷେକ ପୋରେଲ ଶତକ ହାସଲ କରିଛନ୍ତି। ଦୀର୍ଘ ୩୬ ଦିନ ଜେଲରେ ରହିବା ପରେ ଦଳକୁ ଫେରିଥିବା ପୋରେଲ ପ୍ରଥମ ମ୍ୟାଚରେ ହିଁ ଶତକ ମାରି ଚର୍ଚ୍ଚାକୁ ଆସିଛନ୍ତି। ଶତକ ପରେ ସେ ଭାବବିହ୍ବଳ ହୋଇ କାନ୍ଦି ପକାଇଥିବା ଖବର ସାମ୍ନାକୁ ଆସିଛି।
ଅଭିଷେକ ପୋରେଲଙ୍କ ବିରୋଧରେ ଯୌନ ଉତ୍ପୀଡ଼ନ ଏବଂ ଅପରାଧିକ ଧମକ ସମ୍ପର୍କିତ ଏକ ମାମଲା ରହିଥିବାରୁ ତାଙ୍କୁ ୩୬ ଦିନ ଜେଲରେ ରହିବାକୁ ପଡ଼ିଥିଲା ବୋଲି ରିପୋର୍ଟରେ ଦାବି କରାଯାଇଛି। ଏହା ପରେ ବଙ୍ଗଳା ଦଳକୁ ଫେରି ସେ ପ୍ରଥମ ମ୍ୟାଚରେ ଶତକ ହାସଲ କରିଛନ୍ତି।
୨୪ ବର୍ଷୀୟ ପୋରେଲ ଦ୍ୱିତୀୟ ଦିନର ଖେଳ ଶେଷ ସୁଦ୍ଧା ଅପରାଜିତ ରହିଛନ୍ତି। ସେ ୧୬୧ଟି ବଲରେ ୧୧୪ ରନ ସଂଗ୍ରହ କରିଛନ୍ତି। ତାଙ୍କ ଇନିଂସରେ ୧୩ଟି ଚୌକା ଓ ଗୋଟିଏ ଛକା ସାମିଲ ରହିଛି।
ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ଦିଲ୍ଲୀ ୭୭.୩ ଓଭରରେ ୨୪୦ ରନ କରିଥିଲା। ଦିଲ୍ଲୀ ପକ୍ଷରୁ ହ୍ରିତିକ ଶୌକିନ ସର୍ବାଧିକ ୫୬ ରନ କରିଥିଲେ। ସେ ୯୮ଟି ବଲର ସମ୍ମୁଖୀନ ହୋଇଥିଲେ। ସେହିପରି ଆୟୁଷ ଦୋସେଜା ୯୨ଟି ବଲରେ ୪୫ ରନ କରିଥିଲେ। ବଙ୍ଗଳା ପାଇଁ ମହମ୍ମଦ ଶାମି ମଧ୍ୟ ଚମତ୍କାର ବୋଲିଂ କରିଛନ୍ତି। ସେ ୧୭.୩ ଓଭର ବୋଲିଂ କରି ୪ଟି ଉଇକେଟ୍ ନେଇଥିଲେ। ଏହି ସମୟରେ ସେ ୯ଟି ମେଡେନ ଓଭର ପକାଇବା ସହ ମାତ୍ର ୧.୭୧ ଇକୋନୋମି ରେଟରେ ରନ ଦେଇଥିଲେ। ତାଙ୍କର ଏହି ପ୍ରଦର୍ଶନ ପରେ ଭାରତୀୟ ଦଳକୁ ପ୍ରତ୍ୟାବର୍ତ୍ତନ ନେଇ ଚର୍ଚ୍ଚା ଆରମ୍ଭ ହୋଇଛି।
ପୋରେଲ ଏଯାଏ ୩୨ଟି ପ୍ରଥମ ଶ୍ରେଣୀ ମ୍ୟାଚ ଖେଳି ୩୧.୨୮ ହାରରେ ୧,୪୦୮ ରନ କରିଛନ୍ତି। ଏଥିରେ ଗୋଟିଏ ଶତକ ଓ ୧୨ଟି ଅର୍ଦ୍ଧଶତକ ରହିଛି। ୨୩ଟି ଲିଷ୍ଟ-ଏ ମ୍ୟାଚ୍ରେ ସେ ୪୩.୮୪ ହାରରେ ୮୩୩ ରନ କରିଥିବା ବେଳେ, ୬୧ଟି ଟି-୨୦ ମ୍ୟାଚରେ ୧,୫୯୦ ରନ ସଂଗ୍ରହ କରିଛନ୍ତି।
ଆଇପିଏଲ ୨୦୨୬ରେ ସେ ଦିଲ୍ଲୀ କ୍ୟାପିଟାଲ୍ସ ପକ୍ଷରୁ ଖେଳିଥିଲେ। ସେହି ସିଜନ୍ରେ ୪ଟି ମ୍ୟାଚକୁ ୧୦୮ ରନ କରିଥିଲେ। ଏହା ପୂର୍ବରୁ ଆଇପିଏଲ ୨୦୨୫ରେ ୧୩ଟି ମ୍ୟାଚରେ ୧୩ଟି ଇନିଂସରେ ୩୦୧ ରନ କରିଥିଲେ।