ନୂଆଦିଲ୍ଲୀ, ୧୯।୮: କେନ୍ଦ୍ର ସରକାରର ମନ୍ତ୍ରୀ ଏବଂ ରିପବ୍ଲିକାନ ପାର୍ଟି ଅଫ ଇଣ୍ଡିଆ (ଅଠାୱଲେ)ର ମୁଖ୍ୟ ରାମଦାସ ଅଠାୱଲେ ‘କକରୋଚ ଜନତା ପାର୍ଟି’ (CJP)ର ପ୍ରତିଷ୍ଠାତା ଅଭିଜିତ ଦୀପକେଙ୍କୁ ନ୍ୟାଶନାଲ ଡେମୋକ୍ରାଟିକ ଆଲାଏନ୍ସ (NDA)ରେ ସାମିଲ ହେବାକୁ ପ୍ରସ୍ତାବ ଦେଇଥିଲେ। ଏହି ପ୍ରସ୍ତାବ ଉପରେ ଅଭିଜିତ ଦୀପକେଙ୍କ ପ୍ରତିକ୍ରିୟା ଆସିଛି, ଯାହା ସେ ବ୍ୟଙ୍ଗାତ୍ମକ ଢଙ୍ଗରେ ଦେଇଛନ୍ତି।
ଅଭିଜିତ ଦୀପକେ ନିଜ ଇନଷ୍ଟାଗ୍ରାମ ଏହି ପ୍ରସ୍ତାବର ଜବାବ ପୋଷ୍ଟ କରି ବ୍ୟଙ୍ଗ କରିଛନ୍ତି। ନିଟ ପେପର୍ ଲିକ୍ ବିରୋଧରେ ଜନ୍ତର-ମନ୍ତରରେ ଛାତ୍ର ଆନ୍ଦୋଳନ ଆରମ୍ଭ କରି ଅଭିଜିତ ଦୀପକେ ଚର୍ଚ୍ଚାକୁ ଆସିଥିଲେ। ଏହି ଆନ୍ଦୋଳନରେ ମଧ୍ୟ ସେ ସଫଳତା ହାସଲ କରିଥିବା ଦାବି କରାଯାଇଛି।
ଅଭିଜିତ ଦୀପକେଙ୍କ ନେତୃତ୍ୱରେ ଦେଶର ବିଭିନ୍ନ ସ୍ଥାନର ଛାତ୍ରୀଛାତ୍ର ଏବଂ ଯୁବପିଢ଼ିଙ୍କ ଆନ୍ଦୋଳନ ପରେ କେନ୍ଦ୍ର ସରକାର ଚାପରେ ଆସିଥିଲେ ଏବଂ ଫଳରେ ଧର୍ମେନ୍ଦ୍ର ପ୍ରଧାନଙ୍କୁ କେନ୍ଦ୍ର ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେବାକୁ ପଡ଼ିଥିଲା ।
ରାମଦାସ ଅଠାୱଲେଙ୍କୁ ଜବାବ ଦେଇ ଅଭିଜିତ ଦୀପକେ ନିଜ ଇନଷ୍ଟାଗ୍ରାମର ଏକ ପୋଷ୍ଟ ଲେଖିଥିଲେ ଯେ, ମାତ୍ର ଗୋଟିଏ ମାସ ପୂର୍ବରୁ ମୁଁ ‘ଆଣ୍ଟି-ନ୍ୟାଶନାଲ’, ‘ଦେଶଦ୍ରୋହୀ’ ଏବଂ ‘ଦେଶ ବିରୋଧୀ’ ଥିଲି। ଜନ୍ତର-ମନ୍ତରରେ ଆନ୍ଦୋଳନ ସମୟରେ ତାଙ୍କ ସମେତ ଅନ୍ୟ ପ୍ରଦର୍ଶନକାରୀଙ୍କୁ ମଧ୍ୟ ଟାର୍ଗେଟ କରାଯାଇଥିଲା। ଧର୍ମେନ୍ଦ୍ର ପ୍ରଧାନ ତ ପ୍ରଦର୍ଶନକାରୀଙ୍କୁ ଆତଙ୍କବାଦୀଙ୍କ ‘ବି-ଟିମ’ ବୋଲି କହିଥିଲେ। ସେହିପରି ଭାଜପାର ଜାତୀୟ ଅଧ୍ୟକ୍ଷ ନୀତିନ ନବୀନ ପ୍ରଦର୍ଶନକାରୀଙ୍କୁ ‘ଭାଇରସ’ ବୋଲି କହିଥିଲେ।
କେନ୍ଦ୍ର ସରକାରର ମନ୍ତ୍ରୀ ଏବଂ ରିପବ୍ଲିକାନ ପାର୍ଟି ଅଫ ଇଣ୍ଡିଆ (ଅଠାୱଲେ)ର ମୁଖ୍ୟ ରାମଦାସ ଅଠାୱଲେ ଅଭିଜିତ ଦୀପକେଙ୍କୁ NDAରେ ସାମିଲ ହେବାକୁ ପ୍ରସ୍ତାବ ଦେଇଛନ୍ତି। ଅଠାୱଲେ ଦୀପକେଙ୍କୁ ଆମ୍ବେଦକରବାଦୀ ବୋଲି କହିବା ସହ ତାଙ୍କୁ ନିଜ ପାର୍ଟିରେ ସାମିଲ ହେବା ନେଇ ବିଚାର କରିବାକୁ କହିଛନ୍ତି।
