ନୂଆଦିଲ୍ଲୀ,୧୦।୧୦: କକରୋଚ ଜନତା ପାର୍ଟିର ପ୍ରତିଷ୍ଠାତା ଅଭିଜିତ ଦୀପକେଙ୍କୁ ଦିଲ୍ଲୀ ବିମାନବନ୍ଦରରେ ଅଟକ ରଖାଯିବା ଘଟଣାକୁ ନେଇ ତାଙ୍କ ପିତାମାତା ସରକାରଙ୍କ ଉପରେ ଗମ୍ଭୀର ପ୍ରଶ୍ନ ଉଠାଇଛନ୍ତି। ସେମାନେ କହିଛନ୍ତି ଯେ ବିମାନ ଭିତରେ ଏଭଳି ଗିରଫଦାରୀ ଅତ୍ୟନ୍ତ ଭୁଲ। ମୋ ପିଲା ଏପରି କ’ଣ ଅପରାଧ କରିଥିଲା? ଯଦି ମୋ ପୁଅର କିଛି କ୍ଷତି ହୁଏ, ତେବେ ଆମେ ସରକାରଙ୍କୁ ଦେଖିନେବୁ।
ପିତା ଭଗବାନ ରାଓ ଦୀପକେ କହିଛନ୍ତି ଯେ ଭାରତ ଇତିହାସରେ ଏହା ଏପରି ପ୍ରଥମ ଘଟଣା, ଯେଉଁଠି ଗଣତନ୍ତ୍ର ବଞ୍ଚାଇବାକୁ ଚେଷ୍ଟା କରୁଥିବା ଜଣେ ଛାତ୍ରଙ୍କୁ ବିମାନ ଭିତରୁ ହିଁ ଅଟକ ରଖାଗଲା। ସେ କହିଛନ୍ତି ଯେ ଆତଙ୍କବାଦୀ ଏବଂ ବଳାତ୍କାରୀମାନେ ଧରାପଡ଼ନ୍ତି ନାହିଁ, ବରଂ ଜଣେ ସାଧାରଣ ସଚ୍ଚୋଟ ମଣିଷକୁ ତୁରନ୍ତ ଗିରଫ କରାଯାଉଛି। ଏଥିସହ ସେ ନିଜ ପୁଅକୁ ବାର୍ତ୍ତା ଦେଇ କହିଛନ୍ତି ଯେ ତୁମକୁ ଏବଂ ତୁମ ବନ୍ଧୁମାନଙ୍କୁ ଆମର ସମ୍ପୂର୍ଣ୍ଣ ସମର୍ଥନ ରହିଛି, ତୁମେ ଲଢ଼େଇ ଜାରି ରଖ।
ଅଭିଜିତଙ୍କ ଗିରଫଦାରୀର ଆଶଙ୍କା ସମ୍ପର୍କରେ ପଚରାଯିବାରୁ ତାଙ୍କ ପିତା କହିଥିଲେ ଯେ ଘରୁ ବାହାରିବା ସମୟରେ ସେ ଜଣାଇ ଯାଇଥିଲା ଯେ ତାକୁ ଗିରଫ କରାଯାଇପାରେ। ସେ କହିଛନ୍ତି ଯେ ତାଙ୍କୁ ଲାଗୁନାହିଁ ଭାରତରେ ଆଉ ଗଣତନ୍ତ୍ର ବଞ୍ଚିଛି। ତାଙ୍କର ଅଭିଯୋଗ ହେଉଛି, ଯେଉଁମାନେ ଗଣତନ୍ତ୍ର ରକ୍ଷା ପାଇଁ ସୱର ଉତ୍ତୋଳନ କରୁଛନ୍ତି, ସେମାନଙ୍କୁ ଦବାଇବାକୁ ଚେଷ୍ଟା କରାଯାଉଛି। ସେ କହିଛନ୍ତି ଯେ ସରକାରଙ୍କ ଲକ୍ଷ୍ୟ ’ୱାନ ନେସନ, ୱାନ ପାର୍ଟି’ ଆଡ଼କୁ ଆଗକୁ ବଢ଼ିବା ଏବଂ ଅନ୍ୟ ରାଜନୈତିକ ଦଳଗୁଡ଼ିକୁ ଶେଷ କରିଦେବା।
ଅଭିଜିତଙ୍କୁ ଅଟକ ରଖାଯିବା ନେଇ ତାଙ୍କ ମାଆ ଅନୀତା ଦୀପକେ ମଧ୍ୟ ସରକାରଙ୍କ ଉପରେ କ୍ଷୋଭ ପ୍ରକାଶ କରିଛନ୍ତି। ସେ କହିଛନ୍ତି ଯେ ଟିଭି ଏବଂ ଫୋନ କଲ ମାଧ୍ୟମରେ ସେ ଗିରଫଦାରୀ ବିଷୟରେ ଜାଣିବାକୁ ପାଇଲେ। ପୁଅ ତାଙ୍କୁ ଟିଭି ଓ ମୋବାଇଲ ନ ଦେଖିବାକୁ ମନା କରିଥିଲା, କିନ୍ତୁ ମାଆର ମନ ମାନିଲା ନାହିଁ। ବିମାନ ଭିତରେ ଏଭଳି ଗିରଫ କରିବା ଅନ୍ୟାୟ। ମୋତେ ବହୁତ ଖରାପ ଲାଗୁଛି। ସେ ଏପରି କ’ଣ ବଡ଼ ଅପରାଧ କରିଦେଇଥିଲା?
ସେ କହିଛନ୍ତି ଯେ ସରକାର ଏହା ବହୁତ ଭୁଲ କରିଛନ୍ତି। ମୋ ପିଲାର କିଛି ହେଲେ ଆମେ ସରକାରଙ୍କୁ ଦେଖିନେବୁ। ଦେଶ ପାଇଁ କାମ କରୁଥିବା ପିଲାମାନଙ୍କୁ ଗିରଫ କରାଯାଉଛି, ଅଥଚ ଅପରାଧ କରୁଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ। ଅଭିଜିତ ଘରୁ ବାହାରିବା ସମୟରେ ହିଁ ସତର୍କ କରାଇ ଦେଇଥିଲା ଯେ ତାକୁ ଗିରଫ କରାଯାଇପାରେ।
ମାଆ ଭାବବିହୱଳ ହୋଇ କହିଛନ୍ତି ଯେ ପୁଅ ଯିବା ବେଳେ ସେ କାନ୍ଦି କାନ୍ଦି ବିଦାୟ ଦେଇଥିଲେ, କିନ୍ତୁ ଅଭିଜିତ ତାଙ୍କୁ ବୁଝାଇଥିଲା ଯେ କାନ୍ଦ ନାହିଁ, ଯାହା ହେବ ଭଲ ପାଇଁ ହିଁ ହେବ। ସରକାରଙ୍କ ଆଭିମୁଖ୍ୟ ଉପରେ ଅସନ୍ତୋଷ ପ୍ରକାଶ କରି ସେ କହିଛନ୍ତି ଯେ ବର୍ତ୍ତମାନର ପରିସ୍ଥିତି ତାଙ୍କୁ ଆଦୌ ଭଲ ଲାଗୁନାହିଁ। ସରକାର ତାଙ୍କ ପୁଅ ସହିତ ଅନ୍ୟାୟ କରିଛନ୍ତି ଏବଂ ଏହି କାର୍ଯ୍ୟାନୁଷ୍ଠାନ ତାଙ୍କୁ ଗଭୀର ଆଘାତ ଦେଇଛି।