ଇଡେନବର୍ଗ,୧୨।୧୧ : କେବଳ ଘରେ ବସି ନିଜର କେଶ ଧୋଇ କେହି ଜଣେ କୋଟିପତି ହେବା ଶୁଣିଲେ ଯେ କେହି ଆଶ୍ଚର୍ଯ୍ୟ ହୋଇଯିବେ। ତେବେ ଏହା ସ୍କଟଲାଣ୍ଡର ଜଣେ ମହିଳାଙ୍କ କ୍ଷେତ୍ରରେ ସମ୍ଭବ ହୋଇଛି। ସେ ସୋସିଆଲ ମିଡ଼ିଆ ପ୍ଲାଟଫର୍ମରେ ୟୁଜରଙ୍କ ସହିତ ଯୋଡି ହୋଇ ଏପରି କରିପାରିଛନ୍ତି। ଏହି ମହିଳାଙ୍କ ନାମ ହେଉଛି ଜିୟା ଓସଙ୍ଗନେସି। ଦିନେ ସେ ଗରିବ ଥିଲେ। ତାଙ୍କ ଉପରେ ୮ ଲକ୍ଷ ଟଙ୍କାର ଋଣଭାର ଥିଲା। ସେଥିପାଇଁ ସେ ଚିନ୍ତାରେ ପଡ଼ିଥିଲେ। ମାତ୍ର ପରିସ୍ଥିତିର ସାମନା କରିବାକୁ ସାହସ ବାନ୍ଧିଥିଲେ।
ଏହାପରେ ସେ ସୋସିଆଲ ମିଡ଼ିଆ ମାଧ୍ୟମରେ ଟଙ୍କା ରୋଜଗାର ପାଇଁ ଉଦ୍ୟମ କରିଥିଲେ। ସେ ଇନଷ୍ଟାଗ୍ରାମ ଏବଂ ଟିକଟକ୍ରେ କେଶ ଧୋଇବାର ଭିଡିଓ ଅପଲୋଡ କରିଥିଲେ। ଧୀରେ ଧୀରେ ତାଙ୍କର ଫଲୋୟର୍ସଙ୍କ ସଂଖ୍ୟା ବଢ଼ିବାରେ ଲାଗିଥିଲା। ତାଙ୍କର କେଶ ଧୋଇବା ଭିଡିଓକୁ ୪ କୋଟିରୁ ଅଧିକ ଲୋକ ଦେଖିଥିଲେ। ଏହା ପରେ ପରିସ୍ଥିତି ବଦଳି ଯାଇଥିଲା। ତାଙ୍କ ପାଖରେ ସୋସିଆଲ ମିଡିଆରୁ ଟଙ୍କା ପହଞ୍ଚିବାରେ ଲାଗିଛି।
ଫଳରେ ସେ ମାତ୍ର ୨୯ ବର୍ଷ ବୟସରେ ୧.୮ କୋଟି ଟଙ୍କାର ଏକ ବିଳାସପୂର୍ଣ୍ଣ ଘର କିଣି ପାରିଥିଲେ। ଦୁଇ ସନ୍ତାନଙ୍କ ଜନନୀ ଜିୟା ସୋସିଆଲ ମିଡିଆରେ ଏବେ ଟ୍ରେଣ୍ଡିଂରେ ରହିଛନ୍ତି। ଗୋଟିଏ ଭିଡିଓ ପାଇଁ ସେ ପ୍ରାୟ ଏକ ଘଣ୍ଟା ସମୟ ନେଇଥାନ୍ତି । ଏହା ପରେ ଏହାକୁ ସେ ଅପଲୋଡ କରିଥାନ୍ତି ବୋଲି କହିଛନ୍ତି। ତାଙ୍କ ଭିଡିଓକୁ ୟୁଜର ପସନ୍ଦ କରିବାରେ ଲାଗିଛନ୍ତି। ଜିୟା ଏବେ ଅନ୍ୟ ମହିଳାମାନଙ୍କ ଲାଗି ପ୍ରେରଣାର ଉତ୍ସ ପାଲଟିଛନ୍ତି।
