ରାୟପୁର,୨୭ା୪: ଦାନ୍ତଓ୍ବୋଡାରେ ବୁଧବାର ମାଓବାଦୀଙ୍କ ଆକ୍ରମଣରେ ୧୦ ଯବାନଙ୍କ ସମେତ ଜଣେ ଡ୍ରାଇଭରଙ୍କ ମୃତ୍ୟୁ ଘଟିଥିଲା। ଆକ୍ରମଣର ଗୋଟିଏ ଦିନରେ ପରେ ଅର୍ଥାତ୍ ଗୁରୁବାର ଏହି ଘଟଣାର ଭୟଙ୍କର ଭିଡିଓ ସାମ୍ନାକୁ ଆସିଛି। ଏହି ଭିଡିଓରୁ କିପରି ଆକ୍ରମଣ ପ୍ରତିଆକ୍ରମଣ ହୋଇଥିଲା ତାହା ସ୍ପଷ୍ଟ ଦେଖିବାକୁ ମିଳିଛି। ଭିଡିଓଟି ଆକ୍ରମଣର କିଛି ସମୟ ପୂର୍ବର ବୋଲି ଜଣାପଡ଼ିଛି। ଆକ୍ରମଣ ସମୟରେ ଜଣେ ଯବାନ ଗାଡ଼ି ପଛରେ ଆଶ୍ରୟ ନେଇଥିଲେ। ଏହା ସହିତ ଯବାନ ମାଓବାଦୀଙ୍କ ଉପରେ ଗୁଳି ଚଳାଇବାରେ ସଫଳ ହୋଇଥିଲେ।
#WATCH | Viral video surfaces showing moments after Dantewada Naxal attack in Chhattisgarh
(Source: Unverified) pic.twitter.com/6UXfOOhz5c
— ANI (@ANI) April 27, 2023
ଗ୍ରାମବାସୀ ମଧ୍ୟ ଏହି ଆକ୍ରମଣର ରେକର୍ଡ କରିଥିଲେ। ଯଦିଓ ପୋଲିସ ଏପର୍ଯ୍ୟନ୍ତ ଭିଡିଓକୁ ନିଶ୍ଚିତ କରିନାହିଁ। ଭିଡିଓରେ, ବିସ୍ଫୋରଣ ପରେ ଜଣେ ଯବାନ ରାସ୍ତା କଡ଼ରେ ଘୁଷୁଡି ଘୁଷୁଡ଼ି ଯାଇ ମାଓବାଦୀଙ୍କ ଉପରକୁ ଗୁଳି ଚଳାଇଥିବାର ନଜର ଆସିଛନ୍ତି। ଏକ ସୂତା ପରି ବସ୍ତୁ ମଧ୍ୟ ରାସ୍ତାରେ ପଡ଼ିଥିବାର ଦେଖିବାକୁ ମିଳେ, ଯାହା ବିସ୍ଫୋରକ ଉପକରଣ ବୋଲି ଅନୁମାନ କରାଯାଉଛି। ଏହି ଲ୍ୟାଣ୍ଡମାଇନ୍ରେ ସୁରକ୍ଷାକର୍ମୀଙ୍କୁ ନେଇ ଯାଉଥିବା ଗାଡ଼ି ଉଡ଼ିଯାଇଥିଲା।
ଜଣେ ବ୍ୟକ୍ତି ଭିଡିଓରେ ‘ଉଡ୍ ଗୟା, ପୂରା ଉଡ୍ ଗୟା’ ବୋଲି କହୁଥିବାର ମଧ୍ୟ ଶୁଣିବାକୁ ମିଳେ। ତେବେ ଏହା ସ୍ଥାନୀୟ ଲୋକ କିମ୍ବା ଆକ୍ରମଣକାରୀ କିମ୍ବା ସୁରକ୍ଷା କର୍ମୀଙ୍କ ସ୍ବର ବୋଲି ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ।
ପ୍ରକାଶ ଯେ, ବୁଧବାର ଅପରାହ୍ନରେ ଦାନ୍ତଓ୍ବୋଡାର ଆରନପୁର ରୋଡରେ ମାଓବାଦୀମାନେ ଏକ ପାଟ୍ରୋଲିଂ ପାର୍ଟି ଉପରେ ଆକ୍ରମଣ କରିଥିଲେ। ଜିଲା ରିଜର୍ଭ ଗାର୍ଡ (DRG)ର ଏକ ଟିମ୍ ଏକ ଗାଡ଼ିରେ ନିଜ ମୁଖ୍ୟାଳୟକୁ ଫେରୁଥିବା ବେଳେ ଆରନପୁର ରାସ୍ତାରେ ଲଗାଯାଇଥିବା ଲ୍ୟାଣ୍ଡମାଇନ୍ ବିସ୍ଫୋରଣ ହୋଇ ଅତି କମ୍ରେ ୧୧ ଜଣଙ୍କ ମୃତ୍ୟୁ ଘଟିଥିଲା।
ଇନ୍ସପେକ୍ଟର ଜେନେରାଲ ପୋଲିସ (ବସ୍ତର ରେଞ୍ଜ) ସୁନ୍ଦରରାଜ ପି କହିଛନ୍ତି, ଆରନପୁର ପୋଲିସ ଷ୍ଟେଶନ ସୀମା ମଧ୍ୟରେ ରାତି ୧ଟାରୁ ୧.୩୦ ମଧ୍ୟରେ ଏହି ବିସ୍ଫୋରଣ ଘଟିଥିଲା, ଯେତେବେଳେ ରାଜ୍ୟ ପୋଲିସର ଜିଲା ରିଜର୍ଭ ଗାର୍ଡ (ଡିଆର୍ଜି)ର ଏକ ଟିମ୍ ସର୍ଚ୍ଚ ଅପରେଶନରେ ବାହାରିଥିଲେ।
