ଚାନ୍ଦବାଲି,୯ା୫(କିଷାନ ପାତ୍ର): ଭଦ୍ରକ ଜିଲା ଚାନ୍ଦବାଲି ରାଜନୀତି ଘଡ଼ିକେ ଘୋଡ଼ା ଛୁଟୁଛି। ନିର୍ବାଚନ ପରିବେଶ ସରଗରମ ଥିବା ବେଳେ ଚାନ୍ଦବାଲିର ପୂର୍ବତନ ବ୍ଲକ୍ ଅଧ୍ୟକ୍ଷା ମାନସୀ ସାହୁଙ୍କର ଏକ ଭିଡିିଓ ଭାଇରାଲ ହେବା ଓ ବିଧାୟକ ବ୍ୟୋମକେଶ ରାୟଙ୍କ ଫେସ୍ବୁକ ପୋଷ୍ଟକୁ ନେଇ ହଟଚମଟ ସୃଷ୍ଟି ହୋଇଛି। ତାଙ୍କର କିଛି ହେଲେ ସ୍ବାମୀ ଓ ବିଧାୟକ ଦାୟୀ ରହିବେ ବୋଲି ମାନସୀ କହୁଥିବା ଉକ୍ତ ଭିଡିଓରୁ ଜଣାପଡ଼ିଛି।
ମାନସୀ କହିଛନ୍ତି ଯେ, ସେ ଭୁବନେଶ୍ୱରରେ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ଯଦି ତାଙ୍କର କିଛି ହୋଇଯାଏ ତେବେ ସେଥିପାଇଁ ଚାନ୍ଦବାଲି ବିଧାୟକ ଏବଂ ସ୍ବାମୀ ରଞ୍ଜନ ସାହୁ ଦାୟୀ ରହିବେ। ଅନ୍ୟପକ୍ଷେ ଚାନ୍ଦବାଲି ବ୍ଲକ୍ ଧାମରା ଅଞ୍ଚଳରେ ୪ ଯୁବନେତା ବିଜେଡି ଛାଡି ବୁଧବାର ଭାଜପାରେ ଯୋଗ ଦେଇଛନ୍ତି। ତେବେ ବିଧାୟକ ରାୟ ନିଜର ଫେସବୁକ୍ ପୋଷ୍ଟରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏବଂ ଚାନ୍ଦବାଲି ବ୍ଲକ୍ ୨ନଂ. ଜୋନ୍ର ଜିଲା ପରିଷଦ ସଦସ୍ୟା ତଥା ପୂର୍ବତନ ବ୍ଲକ୍ ଅଧ୍ୟକ୍ଷା ମାନସୀଙ୍କ ସ୍ବାମୀ ରଞ୍ଜନ ସାହୁଙ୍କ ଫଟୋ ଛାଡ଼ିଥିବା ନେଇ ରାଜନୀତି ସରଗରମ ହେବାରେ ଲାଗିଛି। କିଛିଦିନ ହେବ ପୂର୍ବତନ ବ୍ଲକ୍ ଅଧ୍ୟକ୍ଷା ମାନସୀ ଓ ତାଙ୍କ ସ୍ବାମୀ ରଞ୍ଜନ ଭାଜପାରେ ଯୋଗ ଦେବେ ବୋଲି ଚର୍ଚ୍ଚା ଜୋର ଧରିଥିଲା। ଏହା ପରେ ରଞ୍ଜନ ଘରୁ ପଳାଇଯାଇଥିବା ବେଳେ ଏବେ ବିଧାୟକଙ୍କ ଫେସ୍ବୁକ୍ ପୋଷ୍ଟରେ ପ୍ରଣବଙ୍କ ସହ ତାଙ୍କ ସ୍ବାମୀଙ୍କ ଫଟୋ ରହିଥିବା ଦେଖିବା ପରେ ମନସୀ ଏଭଳି ପ୍ରତିକ୍ରିୟା ରଖିଥିବା ଦେଖାଯାଇଛି।
